【意大利多羅米提山區自駕遊】Day13 水都威尼斯

意大利北部山區自駕遊  水都威尼斯

Day 13 - 6月25日  星期二  晴

行程: Lago di Misurina - 威尼斯  170km

住宿: Venice Halldis Apartments (Two-Bedroom Apartment, 三晚522歐, 另加City Tax每人每晚3歐)

結束十二日多羅米提地區旅程之後, 今日會去聞名已久嘅水都威尼斯, 普遍玩法係一日主島, 另外一日去Burano(玻璃島)及Murano(彩色島), 我哋都以呢個主流玩法, 但如果只住兩晚再加第一日遲到達的話, 就會好趕, 所以住夠三晚, 又可以前後留有緩沖時間, 至於行程景點就無乜概念, 淨係知威尼斯主島一定要去嘅有聖馬可廣場、嘆息橋及里阿爾托橋, 其他就去到再諗！今朝唔趕時間, 可以八點幾先去食早餐, 比昨日多咗啲人, 但係不只食物補唔切, 連碟都無, 要用碗頂住先, 感覺只係待應懶散, 唔願做, 連點咖啡都唔睬你

食完早餐, 仲有多餘時間去散步

去三尖峰巴士站就喺Grand Hotel Misurina前面

行埋幾間手信店, 都仲有時間環湖散步, 欣賞多次倒影景色

原來遊客中心就喺酒店附近

跟著返酒店收拾細軟, 正式結束多羅米提山區嘅旅程

開始南下落威尼斯, 當初計劃時, 一直都掙扎繼續租車直至返到米蘭定係威尼斯還車, 而住宿方面在威尼斯主島定係島外的Mestre市, 最後決定威尼斯還車及住威尼斯主島！由Lago di Misurina至威尼斯大約170公里, 入島必須經由Liberty Bridge進入, 駛出橋後, 右手邊就見到幾間租車公司office, 一落車就完完全全感受到酷熱天氣, 同北部清涼截然不同, 好似入咗蒸籠咁, 非常悶熱翳焗, 還車手續好快, 入office放低車匙就搞掂, 亦無職員驗車

今日訂咗一連三晚離火車站不遠的公寓, 還車後先要拖喼跨過Constitution Bridge(憲法橋)到火車站, 行完條橋成個人濕晒！因為一點已經搞掂還車手續, 未夠鐘check in, 先喺火車站電聯公寓, 原來公寓地下有個office, 當時有職員喺度, 可以即時check in, 由火車站行去公寓, 大約五分鐘, 程路唔遠, 但在酷熱天氣下, 拎著個大喼過埋公寓所在大廈果條橋, 成個人散晒😵

公寓內籠, 個廳超大, 只放基本傢俬, 又無擺設, 兩個人住倍感冷清, 而廚房電器就幾新淨, 仲有最最緊要嘅冷氣及洗衣機

有兩間睡房, 都係雙人床

有兩間浴厠, 兩pair人share住就最理想

客廳景觀

涼夠冷氣之後, 要出去周圍視察及去超市買啲補給品, 兩手空空咁由公寓行去火車站真係好近, 行出橫街之後轉右就係火車站Venezia Santa Lucia

火車站對出的廣場就有個水上巴士站及售票處

由公寓條橫街行出之後, 就對著Ponte degli Scalzi赤足橋, 呢啲建築物個名全部都靠姑哥大神而知道

Chiesa di San Simeon Piccolo小聖西門教堂

天氣實在太熱, 所以喺超市買埋個frozen pizza做午餐, 返公寓嘆著冷氣食, 超市食材價錢pizza 3.99歐, 六支大水1.8歐, 檸檬茶0.69歐, 桃加食物袋1.8歐

大約四點, 等太陽無咁猛再出動

島上房屋好多都好殘舊

每行一陣就會見到水道同小橋

好多橫街窄巷都係靜英英, 如果俾人打劫老笠都求助無門

有啲水道旁嘅建築物大門口同水道嘅水位相差無幾, 水瀑時真係會湧入屋, 睇來地下果層要空置

Campo San Polo聖保羅廣場

紀念品店有各式各樣以臉譜為題的手信

Chiesa di San Giacomo di Rialto里奧多聖雅各伯教堂

Ponte di Rialto里阿爾托橋,  威尼斯最著名景點之一, 亦係最多遊客聚集地點之一

橋上景致

橋上兩旁都係紀念品店為主

Gondola威尼斯特有的傳統划船, 在大大小小水道中都會見到

路經售賣Bialetti專門店, 各款咖啡壼及咖啡用品, 必買手信之一

來到最著名的Piazza San Marco聖馬可廣場

威尼斯最具代表性嘅建築物都係廣場一帶, 有Campanile di San Marco聖馬可鐘樓

Basilica di San Marco聖馬爾谷聖殿宗主教座堂

Torre dell'Orologio聖馬可時鐘塔

Palazzo Ducale總督宮

Gondola碼頭

Ponte della Paglia麥桿橋, 好多遊客都會喺呢度欣賞嘆息橋

Ponte dei Sospiri嘆息橋

行完聖馬可廣場又到搵食時間, 之前喺公寓已經搵咗間平平哋嘅餐廳, 食pizza同意粉

Basilica dei Santi Giovanni e Paolo聖若望及保祿大殿(紅磚建築物)及Scuola Grande di San Marco聖馬可大會堂(白色建築物)

途中隨影

原來今日係定休日, 門口有紙寫著叫人去附近嘅姊妹餐廳,  睇梗之際, 有個待應出來話帶我哋過去, 咁就跟著去咗

點知間餐廳都有啲高級, 仲有人即場演奏鋼琴, 算喇, 午餐已經慳咗, 今晚就食好啲

中生啤(每杯6歐)及水(3.5歐)

呢度坐枱費每位收2歐, 有個免費小食

麵包

可能喺山區酒店食慣二道主菜, 咁就每人點二道菜, 第一道菜Tagliolini with Shrimp and Courgette from Estuary(18歐)

及Fish soup slightly spice with garlic croutons(20歐)

第二道菜Venetian Style liver of veal served with grilled polenta (20歐)

及Duck breast cooked pink, orange frosted(22歐), 四個菜都好味, 食到好飽

之後慢慢散步返公寓, 沿路隨影

Chiesa Cattolica Parrocchiale dei Santi Apostoli教堂

已經八點半有多, 個天仲係好光

玩到九點先至日落, 返到公寓附近嘅Santa Maria di Nazareth Church及赤足橋, 仲見到少少晚霞景

明天要跳島遊, 喺碼頭買定48小時船飛, 由起用計, 每張30歐

上一篇: 意大利多羅米提山區自駕遊 Day 12

下一篇: 意大利多羅米提山區自駕遊 Day 14