2012冰島自駕遊 Day 7

冰島自駕遊  攞命的觀鯨船河

Day 7 - 2012年6月8日 星期五  陰轉晴

Myvatn - Skutustadagigar - Hofdi - Hverfell - Dimmuborgir - Husavik (125 km)

住宿: FossHotel Husavik 包早餐 (Eur120)


冰島除了黃金圈(Golden circle)外, 還有一個叫鑽石圈(Diamond circle)的觀光路線, 它位於冰島北部, 大約以Husavik, Asbyrgi, Dettifoss及Myvatn等地環繞一圈, 遊覽沿途景色

我們今明兩天會進行鑽石圈的行程, 以米湖作起點, 另外會安排參加觀光飛行, 所以行程會取決於飛行時間

早餐八點開始, 估唔到有昨晚試過的三文魚和Hotspring bread, 煙三文魚較昨晚的好味

餐後到遊客中心外的油站加油, 然後到遊客中心查詢Myflug觀光飛行公司地點, 職員告訴我們可以透過他們預約, 經過商議後, 我們決定參加一小時的Askja and Mt. Herdubreid Tour遊覽Myvatn, Askja, Herdubreid and Krafla

職員聯絡完飛行公司後, 告訴我們機師未訓醒及天氣因素, 要下午才可以飛, 暫定起飛時間為三點, 叫我們兩點四十五分到飛行公司check-in, 跟著就碌咭收錢, 每人Euro140

所以早上先玩米湖區景點, 以米湖遊客中心為起點, 作逆時針方向沿湖行走, 先在一觀景處停下, 可以看到Hverfell Crater

第一站去Skutustadagigar睇偽火山(Pseudocrater), 從網上資料知道, 這處地方有好多蚊, Mývatn個名喺冰島語的意思是Mý=midge(蚊), 而vatn=lake(湖), 而米湖(蚊湖)個名亦由此而起, 好彩啲蚊唔咬人, 我們一早都巳經做好準備, 在淘寶網買咗個面罩, 可以有效防蚊, 但每次影相, 又除又戴都幾煩, 所以究竟有無用, 就因人而異 (Photo from 淘寶)

這處行一圈估計最多一小時, 我們由停車處行到第二個火山口就回頭

第二個景點去Hofdi, 看湖中的熔岩石, 行了一圈大約三十分鐘

第三個景點, 去Hverfell Crater, 慢慢行十五分鐘就可以到頂, 我們在山頂行咗一小段就回程, 不過行一圈估計至少要一小時

山頂可以看到米湖的偽火山

另一邊可以看到昨天到過的地熱區

最後一個景點就係Dimmuborgir, 行之前, 我們就在這裡食午餐, 這裡還有66 North店

Dimmuborgir有幾條步行徑, 而我們就選擇行Church Circle(Kirkjan), 行一圈約需一小時, 我們打算快快行一圈, 就趕返飛行公司check-in, 下圖解釋它的形成

途中收到遊客中心的電話, 由於天氣問題取消飛行, 但我們覺得可能係人數不夠而取消, 無辦法, 唯有慢慢行埋這段路, 再返去攪退款

行上個窿, 可以看到Hverfell Crater

返去遊客中心攪退款時, 職員就游說我們參加明天的飛行, 應該一定成行, 但我們唔知有無足夠時間, 所以只好取消, 在信用咭戶口一收一退, 因匯率差額, 結果退款就令我們白白損失了HKD215, 之後就過隔離超市食雪糕

出發去Husavik鎮, 沿路天氣越來越好

五點左右到達Husavik的碼頭, 這裡有兩間公司, 首先去了North Sailing查下有無Combo Tour(即是Whale Watching + Puffin Watching) 可惜今日的Combo Tour巳經出發了, 所以到了另一間公司Gentle Giants, 它們的Combo是以套票形式包兩個獨立的Tour, 比分開買平少少, 每位EUR82, 今日只有最後一班六點鐘出發的Puffin Watching及八點鐘出發的Whale Watching, 咁就參加了這個Combo Package, 還有在報名時, 遇到個外國亞伯, 佢話會見到好多Puffin, 所以對個Tour好大期望

另外, 因為之前試過暈船的慘痛經驗, 所以對於坐船Tour, 都有啲保留, 而傾向唔坐, 但係唔知乜事, 一到達Husavik, 就衝入碼頭去報名處查詢Combo Tour, 並且立刻報名, 事後回想, 為何沒有再次諮詢大家意見, 就作出決定, 可能是觀光飛行告吹, 心想要揾其它活動代替, 再加上Husavik是一個坐船睇鯨魚熱點項目, 無理由不參加

鎮內的教堂就在碼頭對面, 所以順道過去參觀一下

跟著就去酒店Check-in, 而酒店位置都幾方便, 就在教堂後面兩條街

整理好行裝後, 就行落去碼頭集合,  先知原來要穿著"夾乸衣"及自動充氣救生衣, 著咗後好似太空人咁

今次個團有六個人, 我們四個人加一對外國情侶, 男的是意大利人, 女的是俄羅斯人, 帶隊是個冰島女人, 幾好人, 連船長共八個人, 這程是坐以下的快艇, 一開始時, 先掟個大彎才駛出港囗, 好似玩機動遊戲咁

個Tour主要是環繞這個島(Lundey)看Puffin, 船程約五至十分鐘

坐完之後, 好失望, 雖然有好多Puffin, 但係距離就好遠, 大約十至二十米, 加上隻船又搖下搖下, 好難影到啲Puffin, 不過估唔到全程都幾舒服, 浪唔大又無暈船浪, 回程時, 個Guide仲比咗啲酒我們飲, 用來暖身

海上有好多Puffin

之後襯有空檔, 返酒店吃少少乾糧加冰島乳酪, 就再次出發去坐船睇鯨魚

返碼頭集合時, 見到Puffin watching tour個對情侶, 他們也參加了Whale watching tour, 都係話對之前個tour好失望

這程是坐下面的船, 又係要著"夾乸衣", 但唔需要著救生衣, 今次個團好似有十一個人

上到船, 起初還幾好, 影完這幾張相後, 無端端被啲浪, 由船兩邊的門隙沖濕咗對腳, 之後成程再無影相

但過了一小時後, 船就越來越拋 , 同伴開始唔舒服, 好似想嘔, 未見到鯨魚巳經嘔咗, 再加上之前啲浪沖濕咗隻腳, 令到個人又凍又唔舒服, 咁就諗著落船艙休息下, 點知個船艙, 又黑又細又焗, 環境仲差過偷渡船, 留咗一陣就快快走返出來, 最後我都嘔埋

之後回想, 我們覺得個Tour都幾危險, 隻船又細, 兩邊船身的欄杆又矮, 浪大的時候, 船好拋又會左右搖晃, 一個不留神, 都會容易跌落海, 再加上海水會從兩邊門隙湧入船上, 真是不爽

講返睇鯨魚, 我們只係見到幾次鯨魚噴水, 鯨魚擺尾就無喇, 我們覺得係因為船員一見到有鯨魚噴水, 就馬上開船衝過去, 似趕魚走多過等佢擺尾, 記得在紐西蘭, 佢地係發現鯨魚後就慢慢咁接近佢, 等到鯨魚換完氣, 睇佢擺尾潛水, 真係對個Tour好失望, 捱足三個鐘, 仲得個桔

坐完船, 巳經成十一點, 本來之前諗著玩完去食飯, 而家我們攪到咁, 一啲胃口都無, 連累我們的朋友都無去食飯,  就要返酒店休息, 不過佢兩個就勁, 一啲事都無, 仲多得佢地照顧我們

有關米湖區觀光資料, 可以在此下載