2012冰島自駕遊 Day 3

冰島自駕遊  南部海岸

Day 3 - 2012年6月4日 星期一   晴後轉密雲有雨

Selfoss - Seljalandsfoss - Skogafoss - Solheimajokull - Skogafoss - Solheimajokull - Vik I Myrdal (213 km)

住宿: Guesthouse Steig 包早餐 (ISK 14150)


今日主要行程係去冰島南面, 沿路會去看二個較出名的瀑布, 行Solheimajokull冰川及最南端的Vik鎮 

早餐前, 係Cottage附近行下, 周圍環境幾靚

早餐有冰島出產的牛奶及蛋糕 

食完早餐, 大約八點多就出發, 行咗一陣架衰車就叫救命, 個Panel顯示車胎有氣壓問題, 落車望望又唔覺漏氣, 安全起見就係下一個鎮 - Hella的油站問問, 個職員個樣有啲惡, 好似美國揸Harley電單車的肥佬, 長頭髮又有紋身, 不過佢都好幫忙, 出去架車睇睇, 佢話都唔知乜事, 不過多數車胎問題, 教咗我們去間叫EET車房問問, 之後發現原來係前胎胎針爛咗, 好快咁就拆胎剪胎針再換支新, 盛惠ISK2500, 咁就白白浪費咗半個鐘, 不過都好彩可以咁快攪掂

到達第一個景點Seljalandsfoss瀑布, 有人叫佢水濂洞瀑布, 因為佢後面有個大山窿, 有步行徑可以去瀑布後面

我們由右邊行入瀑布後面, 再由左邊行出來, 不過又係人同相機都濕晒, 條路慢慢行的話, 最多需要二十分鐘, 不過我地玩下停下影下相, 咁就用咗一個鐘

跟著沿一號公路去第二個景點Skogafoss瀑布, 而今日的好天氣就到此為止, 越向南走, 天色越差, 途中又見到另一個瀑布, 又有停車位, 咁當然停車睇睇

當接近Skogafoss時, 沿路就會見周圍都係紫色的Lupins, 簡直係花海一樣, 第二個景點Skogafoss

瀑布旁邊有步行徑, 行上瀑布頂

睇完影完就去路口睇下Lupins花

然後就出發去第三景點Solheimajokull, 參加Mountain Guide一個兩小時的冰川Tour, 叫Blue Ice Adventure IMG11, 在夏季期間, 每日有三班, 分別在9:30, 13:00及15:30, 費用ISK6500, 沿一號公路再轉入221公路行到盡頭就到達Solheimajokull, 但要留心221公路係條碎石路

十二點半左右到達, 打算即時報名參加一點鐘的Tour, 但只看到它的公司車及疑似檔口，沒有工作人員, 等了一陣, 友人嘗試電聯它們, 但沒人接聽, 現場有個旅遊巴司機就順便問下, 佢話所有Guide都去咗帶團, 叫我地等下, 之後有個德國亞伯由架旅行車走出來同我地講, 應該等多陣就返來啦

之後我地用望遠鏡看見冰川上有三組人群, 而最終亦等到其中一隊回來, 但個Guide話一點鐘個Tour唔開, 因為早上太多人, 叫我們參加三點半個Tour, 如果人數足夠, 佢會負責帶隊, 就咁又白白浪費咗一個鐘

之後就返去Skogarfoss, 行返頭先無行到嗰條步行徑

行完之後就返冰川報到, 食咗些乾糧當午餐, 就去試冰抓, 個Tour一共有八人，我們四人加一個冰島四人家庭, 我們在Skogarfoss見過佢地

出發後, 個guide一路行, 一路講解冰川的情況及如何形成, 以及暖化對冰川帶來的影響, 沿途上, 他對我們都好照顧, 怕發生意外, 睇到我們實一實, 又容忍我們影相, 就算令行程慢咗, 都無所謂, 對冰島家庭提出的問題, 亦好耐心的回答

我們覺得這冰川的冰太多黑色泥，唔夠乾淨唔夠大，又少藍冰，比我們期望有好大出入，真係覺得唔太靚，仲有我原本諗會有多些冰洞行下睇下，點知完全沒有，同佢地個Site的相, 簡直係兩回事，好在有個好Guide帶隊補數

個冰川Tour攪攪下都玩咗差不多成二個半鐘, 比預算長半個鐘, 呢個Guide真係無得頂呀, 去旅行遇到呢種人真係非常開心, 之後同個Guide傾下, 又問下我們明天的行程, 我們話會去行另一個冰川玩個四小時的Tour, 佢就話冰島有好多冰川各有特色, 各有各靚, 仲提我們最好預約, 因為都幾爆, 心諗網上都無乜提過會爆, 多數都係即場報名, 我們今日只係唔好彩啫, 玩唔到一點鐘個Tour, 明天一定唔會......點知真係滿額

之後沿一號公路往Vik方向走, 順路先到Steig Guesthouse check-in, 估唔到間房幾靚, 又夠新, 床舖又夠乾淨, 浴室花灑水力十足, 又包早餐, 抵住

然後立刻出發去Dyrholaey, 是一個環境保護區, 可以由高處看南海岸風景及黑沙灘, 可惜到達時, 發現出入大閘已經關閉, 原來開放時間至下午六時

跟著開車到Reynisdrangur去睇怪石, 風化石柱及黑沙灘

睇睇下, 見到海上有好多puffin鳥, 佢地係離沙灘十多米處外游水, 立刻走返去架車換支300鏡, 可惜都係影得好細粒

睇完就落去Vik鎮食晚飯, 去咗Strondin

叫咗冰島的Gull beer

Soup of the day

Strondin Pizza

Grilled chicken-breast

Icelandic fishstew Chefs style with rye bread and butter, 呢餐都幾好食

飯後, 其實我仲想去鎮入面間教堂附近行下影下相, 可惜雨越落越大, 唯有走人返Guesthouse