2012冰島自駕遊 Day 5

冰島自駕遊  冰川湖

Day 5 - 2012年6月6日 星期三  密雲有雨

Skaftafell National Park - Fjallsrlon - Jokulsarlon - Vatnajokull - Hofn (156 km)

住宿: Hvammur Guesthouse 連早餐 (ISK 34950 四人價錢)


今日的行程全是冰川有關的項目, 上午是遊Fjallsrlon冰川湖及到Jokulsarlon坐水陸兩用船遊冰湖, 下午就去Vatnajokull冰川參加Tour玩雪上電單車(Snowcat), 行程應該比較輕鬆

早餐於酒店, 相比之前, 早餐也較豐富及較多選擇, 還有提供冰島出名的魚油, 聽講味道幾難聞, 不是人人可以接受, 所以我們都無試到, 只是試了魚油丸

還有Waffle機玩下 

沿一號公路往Jokulsarlon冰川湖途中, 都可以看見一連串的冰川

在抵達Jokulsarlon前, 我們順路先遊覽Fjallsrlon, 這湖的面積較細, 浮冰亦較少而遠離湖邊, 而且風真是大得要命, 吹來的風仲好冰凍, 睇完差啲凍僵, 遊覽完Jokulsarlon之後, 我們認為沒必要在這裡浪費時間

之後沿一號公路行幾分鐘, 就會看見前方有一條單線雙程大鐵橋, 這表示我們已經到達了Jokulsarlon, 湖就在左手邊, 而我們就順路在橋前左手邊的停車處開始遊覽, 這裡亦是橡皮艇遊湖報名及出發處, 而水陸兩用船遊湖報名處及出發處則在橋的另一端, 即是過橋後的湖邊

可能我們很少機會接觸到冰川冰湖的環境，所以我們認為這裡的景色簡直一流, 成日聽到啲外國人去到邊到都話Amazing, Awesome, 今次我們就真真正正咁感受到Amazing, Awesome啦 

當初在行程篇排上, 已經預留了半天時間遊湖及坐船, 諗住好鬆動, 仲加埋去多一個細冰湖Fjallsrlon, 點知最後要匆匆忙忙咁離開, 所以補充了關於這個景點的資料, 方便有興趣的人士作為參考及編排行程之用, 這裡約可分成五處如下圖 

A-鐵橋西面的湖邊, 是坐橡皮艇遊湖的報名及出發處 
B-鐵橋東面的湖邊, 是坐水陸兩用船遊湖的報名及出發處, 有個小山坡, 視覺上這邊的浮冰較密集, 體積較大及距離較近, 所以較多重裝備的攝影迷在這邊影相 
C-東面海邊, 只有少量的小型浮冰在海邊, 無乜人 
D-西面海邊, 有較多大型浮冰在海邊, 有很多攝影迷在這邊影相 
E-橋上 
總括以上, 我覺得最佳觀看冰湖及浮冰地點是B及E, 而要接觸漂浮在海邊的浮冰就去D點 

我們首先由湖西面開始遊覽, 由於是首個落腳點, 停了較長時間, 有點可惜

還見到不知是海狗定海獅在湖中游水

之後去湖的東面, 先報名坐船遊冰湖, 每位價錢ISK3500

個Guide仲會攞塊冰比大家試食

塊冰就是這位大叔速遞過來的

再到湖邊看浮冰時, 幫個外國人影完相之後, 佢提議我們到海邊行下, 話個邊有很多大型浮冰沖了上海邊

再駕車到東面海邊

發現只有少量細少浮冰，所以立刻再去西面海邊, 嘩!好靚呀

有很多人在這邊影相

由於下午會去玩Snowcat, 所以停留咗一陣就要走, 離開時才注意到很多人在鐵橋上看冰川湖, 這時才發現在橋上看冰川也不錯, 因為很多浮冰被沖至河口處聚集, 加上有小小陽光, 就顯得更靚, 最後帶著依依不捨的心情繼續下午的行程, 匆匆趕去F985公路的集合地點, 如果趕不上下午的時間, 就無得玩

終於剛剛一點鐘去到, 但係無人係到等, 有啲奇怪, 周圍睇下, 都係無人, 原來我們記錯時間, 應該係二點才有Tour, 咁我們就睇下附近有無地方可以食個快午餐

揸咗五分鐘車, 見到有間Country Hotel內有餐廳, 所以就係到食少少嘢, 但order咗好耐, 食物都未到, 唯有催下識員, 終於來了, 但係要好快食晒落肚, 趕著返去F985

這餐整體來說, 沙律好清新, 伴碟的細薯仔, 好甜好好味, 主菜的魚和鴨都不錯, 只不過份量比較少

準時二點鐘到達, Tour架車巳經到了, 我們四人上車後, 就馬上開車, 再遲少少的話, 就無得玩了

沿路行上F985公路, 沿路都是好崎嶇的山路, 周圍好荒蕪, 地形變化也很大

到達山上的辦公室小屋, 周圍好大風同好凍, 然後職員就開始向各人收錢(Snowcat兩人一車價錢是ISK37000), 及分配裝備, 順帶一提, 他們給了一張66North的單次購物九折咭

個Tour連Guide有11個人, 每兩個人一架車, 個Guide講點樣駕駛, 要注意地方, 就算反車雙腳也不可離開腳踏位, 否則雙腳會有機會受傷, 還要一個跟一個不可爬頭, 講完就立刻出發, 行咗一小段路之後, 就停低問下各人有無問題, 可能個Tour唔多人, 之後就全速前進, 速度在60至70Km之間, 我們守尾門, 前面啲外國人個個開得好快, 簡直係爽呀

當穿上套夾乸衣後, 當堂暖晒, 不過塊臉就好凍

之後在一高處停下休息, 帶我們到崖邊看看及影相

休息完就出發, 去到另一處平地作第二次休息

休息完就會出發回程, 每隊可以在這裡互換駕駛, 當然又是高速回程, 之前都玩過幾次雪上電單車, 但就未試過好似今次咁快咁爽, 全程都係掛住玩, 所以無點影相

最後發生臨尾香事件, 當到達終點駛入泊車處時, 一不留神在彎位處有落差位, 失去平衡, 以致出現向外反車跡象, 所以在盡力作最後修正時, 自然將隻腳向外伸出, 轉軚, 加小小油, 這時離心力突然失去, 感覺架車好輕鬆咁入返個灣, 之後回頭一望, 原來同伴已經被拋到雪地上, 好彩完全無事, 除咗瘀之外, 諗深一層, 其實點都不應該將腳伸出來救車, 如果因為咁受傷就好麻煩, 所以反車是小, 受傷是大

接我們落F985公路的四驅車, 個胎足足大半個人咁高

F985公路的沿路風景

坐車回程的時候, 司機在途中停車及講下周圍風景, 仲幫其中一個人影外面風景, 之後成車人, 一個接一個將個相機傳比佢影相, 這張相就是由司機幫我們影的

跟著就返Guesthouse check-in, 今晚住的Apartment是在郵局上面, 三房二廳一個大廚房, Apartment空間好大及設備好新

今晚是在這間龍蝦餐廳食飯, 味道很好 

試了這款本地冰川的啤酒

Local glacier trout

Grilled lobster with garlic butter, 這個龍蝦的味道及肉質, 比上次龍蝦Buffet好好多

Pasta with lobster, 四人當中, 二人覺得好鹹,  二人覺得適中

Pizza Kaffi Hornid style with lobster

食完飯後, 就在鎮周圍行下, 鎮上另一間出名的龍蝦餐廳