駕世遊: 【意大利多羅米提山區自駕遊】Day9 Passo Pordoi

意大利北部山區自駕遊 Passo Pordoi

Day 9 - 6月21日星期五多雲有暴雨

行程: Passo Gardena - Passo Sella - Passo Pordoi - Passo Pordoi 纜車線 - Lake Carezza - Passo Pordoi 56km

住宿: Hotel Col di Lana (Double or Twin Room, 包早餐, 113歐, 另加City Tax每人每晚0.7歐)

住完Passo Gardena兩晚之後, 今日要搬去另一個山口Passo Pordoi住一晚, 行程安排首先坐Sass Pordoi纜車線上山玩, 之後去埋第四個山口Passo Campolongo, 尾站就去Lake Carezza遊湖。早上七點半嘅景色, 天氣又係好似好好, 仲有大片雲海景

早餐款式不變, 好彩還有至愛嘅蜜瓜

由Passo Gardena出發, 以逆時針方向行, 過咗Sassolungo後不久, 見到有建築物及有車輛泊底, 我哋亦停低睇下, 睇來呢度先係Passo Sella, 有旅館、紀念品店及最緊要地標牌, 呢到好熱鬧, 聚集咗電單車友及單車友

從左至右嘅景色

離遠望見另一個Val Gardena嘅地標牌, 一定要過去睇下

呢度原來好近Col Rodella纜車線, 中間嗰山頂就係車站

來到Passo Pordoi, Sass Pordoi纜車站對面就係今晚住嘅酒店Hotel Col di Lana, 先將車泊喺酒店門外位置

根據多日以來嘅經驗, 通常山上下午天氣都會轉差, 雖然現在有雲, 但總算有少量藍天, 所以先上為妙。Sass Pordoi纜車站

纜車套票Gardena Card唔包呢條線, 每位來回19.5歐, 好貴！

Sass Pordoi纜車線(2240m - 2950m)由Passo Pordoi直上Mt. Sass Pordoi山頂, 車程四分鐘, 山頂天氣唔好, 烏雲蓋頂

另一邊有少少藍天, 但意外地山頂幾乎被白雪完全覆蓋

向東面有條雪路, 跟大隊行落去玩下, 不過行起上來有啲困難

睇方向, 前面個平台都係Sella Group, 而被雲霧遮著就係Sella Group最高嘅山峰Piz Boè, 海拔高度3152米

大部分遊客都係來到呢度就算, 我哋一樣到此為止⛔

天氣又差咗, 回望山頂站, 開始一片白茫茫

行咗一陣, 終於見到Sella Group最高嘅山峰Piz Boè

從車站可以行去下面兩間山屋, 而山屋Rifugio Forcella Pordoi較近, 約十五分鐘步程, 原本計劃行去山屋Rifugio Forcella Pordoi食午餐, 可惜積雪, 無得行！

因為積雪及寒冷關係, 大部分遊客都聚集在車站餐廳Rifugio Maria, 職員做到踢晒腳, 我哋自助買了兩杯Latte(共6歐)及Tiramisu(5歐), 入去避寒、抖下, 及等運到, 希望變好天🌄

休息完, 再出到車站觀景台繞圈行下

全靠呢幅圖幫助, 先攪清各座山峰

車站西面有座十字架, 沿欄杆邊緣已經清咗雪, 做咗條路俾人行, 當然要落去行轉

望向Sassolungo右邊, 烏雲密佈兼落梗大雨

等咗一陣, 前景又清返好多, 雖然不是全藍天, 但叫做有啲陽光, 前面嘅山群都轉返高清台

而呢度嘅山頂依然烏雲蓋頂

Sassolungo右邊果嚿巨石係Piz Ciavaces 2831米

仲有好清楚嘅Piz Boè

行下行下, 又返到纜車站

Mt. Sass Pordoi高度2950米

唔同之前嘅纜車線有Pass, 呢度無得再重遊, 磨到最後, 睇來無乜希望, 決定早啲落山搵其他節目, 而今日最可惜係無得按計劃行去山屋Rifugio Forcella Pordoi食午餐, 因為呢間山屋嘅位置幾特別, 位於兩個山峰之間, 無得行兼無得食, 雙重損失

落山後, 周圍巡下, 酒店門口又有隊電單車黨, 呢到四個山口係電單車黨嘅熱點, 沿路嘅車黨一群接一群, 佢地會不斷嘗試爬頭, 揸車行呢條線都幾煩下, 想慢慢行欣賞風景都好有壓力

下午一點, 天氣再轉差, 仲有雨, 試下提早check in, 外面落雨, 好多人湧去酒店餐廳開餐, 老闆做到踢晒腳都來招呼我哋, 仲叫佢老婆安排房間, 呢啲就真係nice, 又要俾酒店老闆幾個Like👍！今日住最相宜嘅房類, 房間四四正正, 仲好新淨好舒適, 應該裝修過無耐, 正！

酒店內裝潢

安頓後, 出去周圍貢下, 但係天色都係陰陰沉沉

本來打算四點先去Lake Carezza, 呢度可以睇到据齒山加湖上倒影, 所以想睇下有無機會見到日落、据齒山及倒影, 既然山口呢度天色麻麻, 不如早啲去Lake Carezza一趟, 或者可以離開雲雨帶, 點知越行越唔妥, 雨勢越來越大, 勁過黑雨, 連水撥都掃唔切啲雨, 嚇Q死, 喺路過小鎮避咗一陣, 但依然勁大雨, 又驚隨時山洪暴發, 返唔到山頂, 所以都係轉軚盡快返酒店, 好彩有驚無險返到酒店, 不過成個人謝晒, 要立即去補眠。一覺醒來已經停雨了, 落完大雨, 個天都光晒清晒, 藍天都出返來, 但已經五點了, 加上受驚後, 個人沉實返, 唔再多心, 唔再周圍去, 老老實實留喺山口行下就算