【意大利多羅米提山區自駕遊】Day8 重遊 Sassolungo and Seceda

意大利北部山區自駕遊  重遊 Sassolungo 及 Seceda

Day 8 - 6月20日  星期四  多雲有雨雹

行程: Passo Gardena - Forcella del Sassolungo 纜車線 - Ortisei - Seceda 纜車線 - Ortisei - Passo Gardena   47km

住宿: Hotel Cir (Double room with twin beds, half board, 兩晚260歐, 另加City Tax每人每晚2歐)

來到第八日, 終於可以嘆個酒店早餐, 款式都算OK, 但最令人回味係蜜瓜, 味道媲美北海道蜜瓜, 因為出得唔多, 每人淺嚐兩片即止

今朝望出窗外時, 已經決定早餐後先上對面山坡最高點走一轉

早上天朗氣清, 無乜雲霧, 終於可以見到Sassolungo嘅真身

行上對面山坡, 回望酒店, 酒店處於小山坡之上, 有條私家車路隔開大路, 有效隔開閒雜人車, 我哋住嘅房就喺最右邊果兩隻窗嘅位置

回望Passo Gardena山口景色, 全個山口就只有幾個建築物, 左邊有小教堂、山屋Passo Gardena、紀念品店及Cir吊椅車站, 而右邊只有Hotel Cir及山屋旅館Rifugio Frara

行上最高處, 景觀都係差不多

既然有Gardena card在手, 可以任搭, 又無無聊聊咁坐一轉Cir吊椅車上Dantercepies山頂站行下

山頂隨影

Dantercepies山頂站, 向Sassolungo方向的景色

另一邊向Hotel Cir方向的景色

今日原意係留來補去一啲有阻滯或者想重遊嘅景點, 所以未有計劃行程, 既然Sassolungo果邊天色咁好, 決定重遊兩個景點, 先去附近的Sassolungo, 之後再遊Seceda, 約十五分鐘車程來到Passo Sella, 將車泊在纜車站旁的停車場, 收費續次計, 每次6歐, 今日天氣比上次好, 好清楚睇晒三個山峰

用Gardena card免費坐多次纜車登頂,  可能無咗新鮮感, 今次再坐, 無乜興奮緊張感覺, 不過纜車上嘅風景依然好靚

沿途都見有人挑戰徒步上山, 犀利

山屋Rifugo Toni Demetz嘅背後依然被雪覆蓋著

纜車時間表及收費

返去山屋Rifugo Toni Demetz嘅露台睇下風景, 見到一對山友差不多就到山頂, 但係果位女仕好似有啲淆底, 始終都跨唔過雪地, 見到佢卡咗喺峭壁前嘅雪地好耐, 睇見都戥佢驚

落山路段所見的景色

之後返去Ortisei, 準備第四次上Seceda大斜坡, 將車泊喺Seceda纜車站下嘅停車場, 收費每小時0.5歐, 不過天氣轉差, 開始有雨, 先去Strada Rezia步行街食飯兼避雨, 揀咗街尾好搶眼嘅藍屋餐廳Caffè Corso, 坐低無耐, 仲由落雨變落雹, 好彩行快幾步！午餐簡簡單單, 飲杯嘢食件餅, Latte Macchiato(每杯3.3歐), 蛋糕(4.6歐)

火腿沙樂美腸多士, 4.6歐

餐後喺步行街行下

見天色有好轉跡象, 出發上大斜坡

上大斜坡係要搭兩段纜車, 第一段係小型纜車, 第二段係大纜車(下圖), 天氣唔好, 好少人搭, 如果唔係最後一刻有兩個單車友上車, 我哋仲可以包車上山

沿途天色都唔係太好

上到山頂, 地上仲有些少雪花

睇真啲, 原來係冰雹

雖然大片雲層蓋頂, 但仍有少量藍天, 能夠清楚見到大斜坡, 總好過落雨天

天色變得好快, 未行到大斜坡前, 僅餘的藍天都被烏雪快速佔據了

跟著又灑一陣細雨

之後又滲少少陽光出來, 真係玩謝我哋

堅持到最後, 所有人都走晒, 天色都無乜改善, 仲開始大雨, 無奈地回頭

返到車站, 又見到另一場大雨嚟緊

車站前放咗大斜坡海報, 我哋總共分咗三日, 上過來四次, 都無緣見呢個陽光美景

大雨終於殺到, 我哋就咁坐左喺纜車站消費咗一個鐘有多, 間期節目就係睇著上來嘅人, 個個都好失望咁落山

將近四點半, 雨勢稍為轉細, 因為之後日子有行程, 唔再過來呢邊, 所以留低同伴在車站, 自己出去周圍再影下相, 好彩都無再落大雨

偶然間有少許陽光喺雲隙透出, 我就跟著陽光來來回回, 成個山頭就得我一條友喺度跑來跑去

差不多到走嘅時間, 烏雲先開始有散開跡象, 太遲喇！

呢度尾班車喺五點半, 唔可以太抆先走, 最後五點前返到車站會合同伴, 坐纜車落山

揸車返到酒店, 將車泊喺酒店房望到嘅位置, 心理上安心啲

呢邊天氣幾好, 有藍天

今晚晚餐試下House Wine及啤酒, 酒水大約17.5歐

前菜都係Buffet Bar

今晚嘅菜單轉咗啲款式, 第一主菜都係意粉類, 三選一, 揀了兩款不同意粉, Paccheri with sausage ragout and cheese shavings

及Trofie with Genovese pesto and concasse tomatoes

而第二主菜係肉類, 亦係三選一, 今晚揀豬牛各一, Pork belly with potatoes and broccoli sauce, 港式燒肉一嚿

另一款肉類主菜Beef stew with mushrooms and polenta from Storo, 待應話唔小心, 嚿肉送來時, 跌咗落來, 令擺盤扣分, 兩個肉類主菜嘅分量都係好的骰

甜品Short pastry tart with custard and fresh fruit

甜品Mixed ice cream

今日好似無乜嘢做過, 嘥咗一日咁, 入夜後, 雲霧開始湧上山, 連想出去睇下星夜都唔得！

上一篇: 意大利多羅米提山區自駕遊 Day 7

下一篇: 意大利多羅米提山區自駕遊 Day 9