【享受大自然~瑞士之旅】Day9 少女峰山區小鎮Grindelwald

享受大自然~瑞士之旅  Day9 少女峰山區小鎮Grindelwald

Day 9 - 9月11日  星期日  晴

行程: Zermatt - Grindelwald - Schynige Platte - Interlaken - Grindelwald

住宿: Hotel Cabana (雙人房, 艾格峰景, 連早餐, 214郎)

策馬特嘅四天行程順利完成後, 又要開始少女峰行程了, 住宿地方一早已經鎖定住Grindelwald, 因為睇網上遊記嘅相, 就已經覺得呢度嘅環境好正好吸引, 所以安排咗三日都住在Grindelwald, 今日會按計劃取房後先去Schynige Platte, 跟著行下Interlaken, 最後到Harder Kulm睇日落及食晚飯

臨走前, 在露台睇多次日出金光, 好好彩可以一連四日睇到金光嘅馬特洪峰

之前已約好屋主今早07:15交匙退房, 然後坐07:37火車去Grindelwald

瑞士火車通常每卡車箱頭尾都有行李架, 由於出發前睇到近期有偷行李個案出現, 所以盡量坐近行李架

策馬特係冰河列車總站, 對面月台剛好泊咗冰河列車, 因為全程要坐八個鐘, 所以今次無安排坐冰河列車, 希望下次可以坐返轉

由策馬特到Grindelwald, 中途要轉3次車, 分別在Visp, Spiez及Interlaken OST, 全程約三小時, 相中係轉車站Spiez

到達Grindelwald站之後, 要行五至十分鐘先去到酒店Hotel Garni Cabana

酒店周圍嘅環境真係好靚好優美

十一點去到酒店, 仲未可以攞房, 唯有放低行李先去Schynige Platte, Grindelwald站前嘅大街

Grindelwald站

黃綠色火車就係Wengernalp火車線, 即係上少女峰嘅頭段火車線, 往來Kleine Scheidegg及山下的Grindelwald

要上Schynige Platte, 先要坐普通火車去到Wilderwil站, 再轉搭Schynige Platte登山小火車

前往Wilderwil沿途, 可以睇到艾格峰Eiger嘅景色

到達Wilderwil站時, 可以趕得到12:05登山火車, 因為兩點前, 山上有瑞士長號角Alphorn演奏表演

Schynige Platte登山小火車係傳統木製小火車, 行駛速度較慢, 每列火車有兩個車卡, 估唔道非常旺場, 人多到一車都唔夠坐, 職員要即時加多一班車, 但依然滿坐, 所以無得兩邊走影相, 另外持有Swiss Travel Pass可免費乘坐

沿路上山可以見到左右兩邊嘅Thunersee湖、Brienzersee湖、以及兩湖之間嘅Interlaken

呢程車要坐五十分鐘先到Schynige Platte, 坐坐下已經覺得有啲悶, 沿途恰咗幾轉

由上午11點至下午2點, 山上有瑞士長號角樂器Alphorn表演, 有啲失望, 因為同網站所登嘅相有好大分別

之後沿著山上的小徑周圍行下

山上有段Trail圍繞著Alpine Garden行, 主要係介紹阿爾卑斯山嘅花花草草

留著行山時旁身用嘅energy bar, 差不多要食啲, 唔係就要帶返香港

山上放咗一排牛鈴

另一邊有間酒店Hotel Schynige Platte, 兩點後, 演奏者們會移師到酒店餐廳內演奏瑞士長號角

酒店餐廳有兩部分, 上層係餐廳而下層係自助快餐, 我哋喺快餐買咗啤酒、大腸及芝士蛋糕共27.5郎

雖然Schynige Platte嘅景色唔講得靚, 但可以隊下啤、食下嘢、聽下Alphorn, 欣賞周圍環境, 都幾輕鬆自在

逗留咗兩個鐘, 坐三點鐘火車走人, 回望山上酒店餐廳

沿途景色

我哋就係坐呢架舊款無車窗嘅登山小火車上山

車站上有張Schynige Platte舊貌油畫, 同而家嘅酒店餐廳都幾似

跟著坐火車到Interlaken

沿著大街Höheweg行下睇下, 主要係酒店、名店, 整體感覺較為商業化

Casino

中央位置有個大公園, 反而環境幾好, 背後有雪山景

仲有好多滑翔傘都喺度降落

Hooters最近亦在香港開咗分店, 之前記低咗, 如果無其他好選擇就去Hooters食飯

最後都係心掛掛, 驚太夜返到酒店, 剩低最last最衰嘅房, 所以決定放棄上Harder Kulm睇日落食晚飯, 早啲返酒店攞房, 回程途中

基本上去到Grindelwald, 抬頭就會見到艾格峰, 站外景物

虛驚一場, 原來老闆娘已經安排好房間, 亦把行李送到房內, 客房相當新淨闊落, 第一次見到房內設有一張小餐枱兩張餐椅, 非常好用, 整體上, 非常滿意

客房及浴室似裝修不久, 不過陶磚款式好老土

小台露

露台對正艾格峰, 景觀一流

安頓後, 到鎮內走走

呢間酒店嘅二樓餐廳好正

Mont-bell店嘅門柄

路過見到橱窗上登咗個新景點Glacier Canyon

走咗一轉, 最後決定今晚食杯麵、飲瑞士可樂

今晚本來諗著試下影星軌, 可惜有月亮, 太光, 都係早啲訓

上一篇: 享受大自然~瑞士之旅 Day 8
下一篇: 享受大自然~瑞士之旅 Day 10