【享受大自然~瑞士之旅】Day2 世遺葡萄園區Lavaux

享受大自然~瑞士之旅  Day2 世遺葡萄園區Lavaux

Day 2 - 9月4日  星期日  多雲有雨

行程: Bern - Montreux - Chexbres - Lavaux - St-Saphorin - Vevey - Montreux

住宿: Eurotel Montreux (雙人房, 210郎)

今次行程雖然話以行山為主, 但都唔想日日行山咁單調, 除咗行山以外, 在瑞士遊湖都好受歡迎, 所以一於揀返個湖區住幾日, 又可以遊下湖, 叫做遊覽過瑞士嘅湖光山色！最後揀咗日内瓦湖區, 以蒙特魯Montreux為住宿據點, 因為覺得蒙特魯風景比較優美, 湖畔有條幾公里長嘅步道, 由Vevey一直申延至西庸城堡, 加上日内瓦一帶都有唔少地方玩, 地理上蒙特魯在日内瓦湖最東邊, 北面係洛桑, 兩地之間有出名葡萄園區Lavaux, 而西面係日内瓦, 坐火車都係一個鐘就到, 南面屬於法國國境, 可以坐船去兩個法國小鎮Evian及Yvoire, 由蒙特魯去以上提及嘅地方都算方便, 更重要就係蒙特魯去Glacier 3000都算係必經之路

酒店早餐都幾豐富, 連煙三文魚都有

天氣預測未來幾日天氣都好差, 蒙特魯仲有雨, 見今朝仲有太陽, 所以行下伯恩再出發, 火車站前的電車站

Church of the Holy Spirit

沿著主路行去玫瑰花園, 經過Prison Tower, Clock Tower及各主要噴泉

Untertorbrucke橋附近景色

朝早在玫瑰花園睇到嘅城區比較清楚

再次探訪熊公園

從Nydeggbrucke橋折返舊城區

伯恩教堂前的廣場, 撞正教堂有彌撒, 無得入去參觀

在摩西噴泉, 每人裝咗樽泉水留在路上飲用

返到舊城主路, 見到大批旅客圍住某建築物影景, 原來係愛因斯坦故居, 我哋經過兩、三次都睇漏咗, 拿拿聲返轉頭影相, 一樓係愛因斯坦故居, 地下係愛因斯坦咖啡店Einstein Kaffee AG, 係間出名咖啡店

Casinoplatz

Casinoplatz附近有平台, 可以觀看Kirchenfeldbrucke橋及愛因斯坦博物館一帶

返到聯邦廣場Barenplatz, 有Berner National Bank

Swiss National Bank正在維修中

國會大廈Parliament building

順路行埋另一個觀光地圖列出的View point, 就在國會大廈內的平台, 睇埋就要返酒店退房

由伯恩坐火車去蒙特魯要在洛桑(Lausanne)轉車, 雖然要轉車, 但亦相當方便, 因為瑞士鐵路完全無上落樓梯問題, 每個月台必定有斜路, 方便拖喼旅客, 另外搭火車及轉車時要注意頭等及二等車廂的位置, 相關資訊可透過月台熒光幕或手機Apps查看

我們坐11:34火車去蒙特魯, 車程約個半小時, 大約一點半到達酒店, 可以即時取房, 湖景露台房

酒店標榜所有房間都有湖景, 但我們的房間位於二樓, 位置在內側尾位, 湖景幾乎被樹木阻擋, 除了一樓之外, 相信是同類房間之中第二差了, 同伴覺得有貨不對辦之嫌

酒店外觀

酒店外的湖景

之後立即開始下午的行程, 今日部分火車線有維修工程, 不能直接到Puidoux-Chexbres站, 先要坐兩點火車到沃韋(Vevey), 再轉巴士到Chexbres站

Chexbres站外的葡萄園觀光小火車

Chexbres站是Lavaux葡萄園區的熱門步道起點, 我們揀了最短一段, 由Chexbres站行去St-Saphorin站, 全長約兩公里, 約35分鐘路程

沿途看到的葡萄

葡萄園周圍的景色, 多以梯田形式種葡萄

沿路都有不同自家小酒莊及sell自家釀製的酒

不到一小時已經到達St. Saphorin, 村內的店舖主要是賣酒

今日似乎特別熱鬧, 好似舉行葡萄收盛之類的慶典, 有幾間大屋有表演項目, 我哋入咗其中一間八掛下, 花園正有人表演傳統歌劇, 離開時有人叫我們等下, 話就有buffet食

村內有不少遊人

對酒無興趣, 早啲去沃韋(Vevey)行下仲好, St. Saphorin是個無人火車站, 坐4點幾火車去沃韋

Vevey遊客中心

Vevey觀光地圖

碼頭一帶

沿著湖邊行下

湖畔有啲藝術擺設

雀巢總公司對出的著名景點 - 湖中大叉

雀巢總公司Alimentarium, 門外又有支叉做擺設, 唔通湖邊支叉係佢攪出來 ?

Charlie Chaplin紀念銅像, Vevey係差利晚居之地

沿著湖邊有個市集

行行下天氣開始變差落雨, 諗著去火車站一帶嘅商場行下, 原來星期日休業, 唯有提早返去蒙特魯行超市, 今晚打算買Coop超市嘅燒雞做晚餐, 出咗蒙特魯車站轉左邊, 有Coop及Migros超市, 原來兩間都係好細, 似便利店多過超市, 仲無燒雞賣, 晚餐計劃告吹, 唯有買著明天早餐及午餐, 今晚就食杯麵先, 今次買帶咗6個杯麵及2罐午餐肉做不時之需, 結果第二晚已經解決兩個杯麵了!

上一篇: 享受大自然~瑞士之旅 Day 1
下一篇: 享受大自然~瑞士之旅 Day 3