【享受大自然~瑞士之旅】Day5 高海拔酒店3100 Kulmhotel Gornergrat

享受大自然~瑞士之旅  高海拔酒店3100 Kulmhotel Gornergrat

Day 5 - 9月7日  星期三  晴

行程: Montreux - Zermatt - Gorner gorge - Gornergrat - Riffelsee - Gornergrat

住宿: 3100 Kulmhotel Gornergrat (雙人房, 馬特洪峰景, 連早、晚餐, 490郎)

策馬特係瑞士最受旅客歡迎地點之最, 原因非主角馬特洪峰莫屬, 市内有一條登山火車線及兩組䌫車線, 提供咗最佳方式去觀賞呢位主角, 今次安排在策馬特連住四晚, 希望有足夠間目睹馬特洪峰嘅全相之餘, 亦可以一次過玩晒三條觀光線, 分別係左邊的Rothorn paradise䌫車線, 中間的Gornergrat登山火車線, 及右邊的Matterhorn glacier paradise䌫車線

今日先玩Gornergrat登山火車線, 海拔3089米嘅Gornergrat, 山頂除咗有個大觀景平台Aussichtplattform, 仲有間酒店叫3100 Kulmhotel Gornergrat, 上到Gornergrat之後, 就直接入住呢間高海拔酒店, 希望可以近距離欣賞馬特洪峰嘅日與夜

簡單早餐

臨走先有咁靚嘅日內瓦湖景 !

坐07:38出發, 全程約兩個半小時, 由Montreux到Zermatt要在Visp轉車

沿途天氣好到無得頂, 第二程車開始見到些少雪景

早上十點半前到達策馬特, 時間尚早, 把大喼存放在locker後, 就按計劃先去Gorner gorge, locker在月台下一層, 大locker收費8郎

locker鎖匙

策馬特火車站外是個廣場, 市內嚴禁汽車進入, 主要交通工具係電能的士, 都集中在廣場一帶

火車站對面就係Gornergrat登山火車站

長長的指示牌

主街Bahnhofstrasse

沿著主街行, 路過舊房區

直行到Matterhorn Museum前的廣場

轉左行落河邊就是Kirchbrucke, 即係好多遊客聚集影馬特洪峰嗰個photopoint

橋後嘅Hotel La Couronne擁有同一山景, 有馬特洪峰景嘅客房都唔算貴

附近有策馬特與日本妙高高原的結盟記念碑

在Kirchbrucke繼續直行, 過咗䌫車站之後, 眼前嘅馬特洪峰景, 變得更加開揚

附近草坪設有幾張大躺椅, 對著馬特洪峰全部滿坐, 其他方向就無人吼

沿路有牌指示往Gorner gorge的方向, 途中會經過地盤

進入樹林後不久, 會去到一間小木屋, 就係Gorner gorge入口及收費處, 每位5郎, Gorner gorge係策馬特十大景點之一, 沿途景色

最尾上一段梯級就行完, 全程約行半小時, 景色只屬一般

行到最頂可以望到入口處的小屋

回程走另一條路, 望著策馬特市行, 再經䌫車站上方的路折返市內, 沿路環境寧靜, 景色更覺優美, 而且可以從另一角度欣賞馬特洪峰

回到市內又見到另一間傳統房屋, 底部有幾條小木柱及石片撐起間屋, 估計係防止小動物爬入屋

Matterhorn Museum

Museum前的土撥鼠水泉

好多人都介紹Fuchs麵包店, 買咗兩款酥皮包做午餐, 另加兩個小法包帶上山做下午茶

順路搵下明日入住嘅Apartment

時間差不多喇, 攞返嗰喼, 準備坐兩點鐘火車上山之際, 又撞正旅行團大軍, 唔想逼唔想嘈, 改搭下班車, 全程車費每位45郎, Swiss Travel Pass有半價優惠, 22.5郎

Gornergrat登山火車

呢程好少人, 火車內部

上山段記著揀坐右邊, 因為沿路可以睇著馬特洪峰, 初段景色有山有屋

之後變為山巒景色

天氣真好, 可以睇清楚馬特洪峰嘅全貌, 最可惜係唔夠雪, 無咁壯觀

Gornergrat登山火車線頭尾有六個站, 由策馬特到山頂順序係Zermatt, Findelbach, Riffelalp, Riffelberg, Rotenboden及Gornergrat, 話咁快就去到Riffelberg

尾二站是Rotenboden

之後右邊有冰川景

而左邊是山景加個小湖

山頂總站Gornergrat, 落車後要行一段小斜路先去到酒店, Front在二樓梯邊一個小角落, 唔明點解做到咁屈質

Junior Suite with Matterhorn view以4478米嘅馬特洪峰為房號及房名, 對比我們入住嘅馬特洪峰景觀客房, 只係貴多100郎, 本來想book呢間, 但係怕有高山反應, 會嘥咗

所以揀返馬特洪峰景觀客房, 今晚入住4053 Durrenhorn客房, 即係相中酒店左邊圍柱第二個扇窗嗰間房

酒店每間客房都以阿爾卑斯山峰及高度作為房名房號, 夠晒特別

客房環境, 比估計闊落, 完全唔覺迫, 好新淨, 好舒服

仲有係熱水夠熱, 水壓夠力, 非常好

窗外嘅馬特洪峰景

房內有兩支免費水, 有氣無氣各一, 仲有兩片朱古力

明天嘅pack lunch

行出酒店, 望向左邊已經清楚見到Gornergletscher冰川

酒店外有間小教堂

Gornergrat火車站

山上第一個節目係落去Rotenboden站嘅Riffelsee湖睇倒影

先由Gornergrat站坐火車去Rotenboden站, 來回車費每位22郎, Swiss Travel Pass有半價優惠, 11郎

然後行五至十分鐘落去Riffelsee

Riffelsee係睇馬特洪峰倒影嘅好地方

張車飛都係呢度取景

回望車站

對著個靚景, 嘆著個自制瑞士火腿Fuchs小法包, 仲想點呀 !

雖然午後開始背光, 又有啲風, 個倒影唔太清晰, 但已經非常滿足

坐咗大半個鐘, 又係時候要坐火車返上山頂

Gornergrat火車係行齒輪車軌

17:18返到Gornergrat

車站同樣享有Gornergletscher冰川景

忍唔住, 由Gornergrat車站落咗一段山路睇睇

唔係太難行, 明天可以由山頂開始行喎!

不知不覺又玩咗一個鐘, 火車已經收工了

火車站內的櫃台放有証書, 可自行蓋印留作紀念

酒店門口的3100牆壁, 可以簽名留名

最後行上最高點, 3131米嘅Aussichtplattform

眺望馬特洪峰及酒店全景, 山頂好舒服, 唔凍, T-shirt加風褸就夠, 最好係無乜風

冰川景色

酒店餐廳

酒店晚餐時西時中, 不定期轉換, 中餐的話一定係Chinese Fondue, 即係滾水淥肉, 香港人多數唔like, 今晚主餐偏偏係佢...Chinese Fondue !

有自助沙律吧

有幾款麵包選擇, 幾款都好味

Chinese Fondue可揀配肉或魚蝦, 食素者的亦可選擇素菜款式

肉類是豬及牛

海類是三文魚及虎蝦, 上枱聞到腥享享, 食落又唔錯喎, 主菜唔夠可以追加

Side dish有薯條或飯

仲有生果, 呢餐質數算中上, 但唔啱口味, 最值得加分係個女待應嘅服務態度相當好, 好有笑容, 感覺係真心嘅笑容

另外食Fondue有個大問題, 就係比較花時間, 阻著睇黃昏日落, 結果未食得切甜品, 自己出去走一轉影相, 可惜已經遲咗

今晚加送娥眉月

返來再快快食埋個甜品, 然後急急走人, 來唔切Thank You就走人, 真係無禮貌 !

山上全景, 已經有人擺陣影梗相

日落後景色

之後在房入面, 再影下馬特洪峰

入黑後, 自己上山頂睇下星星, 點知見到天上面好似有條海參, 拿拿聲返房搵同伴出嚟求證, 証實唔係海參, 應該係傳說中嘅銀河, 好難先見到架 ! 人生第一次睇銀河、影銀河, 好興奮, 加上山頂唔凍, 重點係無乜風, 睇得好舒服, 今日原本已經大滿足, 而家再升級

最後在房入面, 影星空下嘅馬特洪峰就訓覺

上一篇: 享受大自然~瑞士之旅 Day 4
下一篇: 享受大自然~瑞士之旅 Day 6