意大利北部山區自駕遊 Forcella del Sassolungo 纜車線
Day 6 - 6月18日 星期二 間中天晴
行程: Ortisei - Piz Seteur 纜車線 - Gran Paradiso 纜車線 - Sassolungo 纜車線 - Rifugio Toni Demetz - Rifugio Emilio Comici - Mont Sëura - Monte Pana - Santa Cristina - Ortisei - Alpe di Siusi 纜車線 - Ortisei
住宿: Residence Magdalena (Studio Apartment, 三晚277歐, 另加City Tax每人每晚2.1歐)
今日安排去遠少少嘅Passo Sella玩Sassolungo纜車線, 位置距離Ortisei約18公里, 如果揸車過去, 除咗要計劃環迴路線, 又要擔心泊低架車大半日, 話晒意大利治安都唔係咁好聲譽, 所以決定搭巴士過去Passo Sella做起點, 再研究下張Gardena card可以接到邊條纜車線及遠足徑, 由Passo Sella玩返轉頭, 最後方案由Passo Sella坐Sassolungo纜車線上山頂, 然後行下圖綠線行去Mont Sëura吊椅站, 轉乘兩程吊椅落去St. Cristina, 再坐巴士返回Ortisei, 唔走回頭路
朝早天色比昨天更好, 全藍天, 無雲, 又再希望可以keep到全日好天就好 沿Strada Rezia步行街行去巴士總站, 發現街上多咗幾個新雕像
由總站坐471號8點鐘班次去Passo Sella
由於Google map無Forcella del Sassolungo纜車線嘅資料, 當初只記低附近嘅Hotel Sella, 到站後發覺唔妥, 周圍唔似想去嘅纜車站, 再核對GPS位置, 的確係我記低嘅地㸃, 好明顯係做錯功課, mark錯位置, 唯有再等下班巴士。趁空閒喺酒店周圍行下, 呢度睇到Sassolungo側面, 雖然山頂開始起雲, 不過啲雲好靚 再行去酒店旁邊嘅纜車站八掛下, 原來係Gardena card所包嘅Piz Seteur纜車線, 之前査過官網, Piz Seteur及Paradiso纜車線要到22號先開始運行, 所以預咗無得坐呢兩條纜車線 點知錯有錯著來到纜車站, 而且仲已經運行, 即刻試下拍卡入閘, 得咗, 咁又可以玩多兩條纜車線, 你話好彩唔好彩 沿途景色, 雖然越來越多雲, 但啲雲仲係好靚, 出閘後眼前有3個纜車站
最遠嗰車站至係Gran Paradiso, 持Gardena card免費, 自行拍卡入閘就得
嘩！呢款吊椅車好長喎, 一字排開八個位, 架車新到好似今日先第一次用, 仲有個立立令嘅藍色外殼, 咦, 嗰外殼仲可以打開, 過隱喎！
玩咗一陣都唔見有其他人坐, 睇來真係唔多人知道吊車開咗
轉眼間, Sassolungo山頂已經被雲霧遮著, 要快行喇, 向前行一陣就見到Forcella del Sassolungo纜車站
由Gran Paradiso吊車站行去Forcella del Sassolungo纜車站, 大約廿分鐘路程, 沿途唔會悶, 因為不斷見到一個個成人size嘅長方型車箱喺天上飄
中途有個影相位, 呢架吊車叫coffin lift, 聽落就幾唔吉利, 不過出來玩就要百無禁忌
仲要不斷見到44號車㖭 😱！
原來纜車站旁邊間酒店叫Hotel Passo Sella Dolomiti Mountain Resort至真, 所以我誤以為係Hotel Sella, 入去借個方便再出發
大約十點, Sassolungo山頂幾乎被雲遮晒, 點解日日都係咁🙈！呢架纜車係無位坐, 最多只可企兩位成人, 仲要好似沙甸魚咁, 一前一後企, 如果孭著背囊, 想交換位置都有啲勉強。上落車都要留心, 上車時職員會從後推一把, 令人較易登入車廂, 落車更要小心, 先要轉向車門, 由於時間緊迫, 而慣性力會令人後傾, 所以職員會幫手扶人落車企定定, 懶醒嘅話, 分鐘鐘向後仆, 真係上車容易落車難。喺車廂入面感覺有啲牙煙, 雖然興奮, 但又唔敢太大動作, 沿途景色好靚
山路非常陡峭, 但都見到有人行上山, 佩服
見到山頂, 左邊係Forcella del Sassolungo山頂站, 右邊係山屋Rifugo Toni Demetz
山頂面積好細, 只有個小型纜車站同一間山屋仔, 行出車站, 就係咁細, 一係向前行上兩至三米嘅雪坡, 一係行入右邊嘅山屋
先爬上雪坡睇下環境先, 根本未溶雪, 積雪有成半間山屋咁高, 山屋叫Rifugo Toni Demetz, 標高2685米
打算行嘅525路線仲係條雪路, 無得行喇, 早有準備嘅山友就換上冰抓才起行
影完相返去山屋嘅露台睇下, 見到老闆喺斜坡清雪, 同時又有班山友已經上到來, 佩服佩服
車廂內的簡介, 有各座山峰介紹, 其中有坐山藏有聖母像
原定嘅路線(下圖藍線)仲未溶雪, 要改行另一條路線, 山下纜車站外面有幅大圖介紹兩條路線, 現在改行綠線到山屋Rifugio Emilio Comici食午餐, 再行去Mont Sëura吊椅站
跟路牌指示行526路線往Comici方向, 大約40分鐘, 非常輕鬆
首先經過剛才乘搭的Gran Paradiso吊椅站
呢到有張吊車椅放喺度做擺設, 對正Sella Group山群, 不過俾班山友霸著睇風景, 無得玩
路線係沿著Sassolungo山, 所以沿途都見到Sassolungo嘅側面喺左邊
右邊打橫掃過去嘅山景
沿路有526線路標, 方向正確, 繼續前行, 全段路以平路為主, 唔難行
邊行邊影相, 一個鐘左右到達山屋Rifugio Emilio Comici, 標高 2154米, 外型比一般山屋新式, 見門口無人帶就自己入去揾位, 同一般山屋唔一樣, 呢度要侍應帶位, 失禮晒
先點凍飲消暑, 大細Radler各一, 5.5歐及3歐
維也納炸豬扒Wiener Schnitzel with French fries, 20歐, 肉質酥脆, 好味
Tagliatelle with roasted porcini mushroom, 15.5歐, 意粉味道亦不錯, 呢間山屋的價位, 係去過咁多間之中最貴, 仲要收坐枱費每位2.5歐, 係今次旅程最高檔嘅餐廳
睇埋個洗手間, 嘩！係自動門, 水龍頭係Dyson貨, 廁格發光又電子門鎖, 好豪呀, 簡直係間五星級山屋
餐廳休憩區, 對著Sella Group山景, 可借餐後天色變得烏雲佈, 留多陣都無意思, 都係早啲返去Ortisei去多個行程
由山屋Rifugio Emilio Comici可以選擇行去Mont Sëura吊椅站或Ciampinoi纜車站, Gardena card都皆可免費乘搭, 睇落行去Ciampinoi纜車站會近少少, 不過繼續照計劃行去Mont Sëura吊椅站, 行526B線, 路標顯示45分鐘路程
一開始就係落山路, 條路都幾崎嶇, 仲落咗一陣冰雹, 俾佢嚇一跳。向前望隱隱若若睇到全條路線, 盡頭位置就係Mont Sëura吊椅站
下午二點半到達Mont Sëura, 坐上吊椅車後, 大雨殺到都無問題, 皆因吊椅車有雨擋
好彩係過雲雨, 落車前已經停雨, 吊椅線Monte Pana - Mont Sëura, 1626m - 2042m, 車站周圍環境
行過對面坐埋另一段吊椅線Monte Pana - St. Cristina落去St. Cristina
咁趕係為咗去埋Ortisei嘅Alpe di Siusi纜車線, 四點前來到, 大約有兩個鐘時間玩, 好彩返到來仲有些少藍天
行出Alpe di Siusi纜車站, 眼前就係今日去過Sassolungo山群
先過去左邊坐另一段吊椅線Sole落去Alpe di Siusi高山平原行下, 因為呢條吊椅線收五點
下邊有間外觀好新淨嘅酒店
時間唔多, 只係喺Sole吊椅站周圍行下
有個小池塘景
收車前返上Alpe di Siusi山頂站
纜車站外觀及旁邊的餐廳Mont Seuc剩返嘅時間就留喺餐廳嘅露天休憩區欣賞風景, Sassolungo纜車線就在山群背面, 而兩座山峰之間有雪嘅位置就係山屋Rifugo Toni Demetz
望返大斜坡果邊, 俾陽光曬著, 天色好似仲好過呢邊
纜車站下面的停車場, 收費好抵, 每小時只收0.5歐
今晚晚餐原本有兩個選擇, 但兩間餐廳都無開, 見到單cone雪糕只係1.5歐, 食住雪糕再諗
最後去咗另一間超市買食材自煮晚餐
加多兩件蛋糕做甜品
晚餐食材及製成品
呢到只係用紙包裝蛋糕, 7.9歐
食完飯, 外面又再落雨, 非常涼快
總結全日行程, 非常豐富, 合共坐咗7條纜車線, 由Ortisei出發, 坐471號巴士到Hotel Sella開始, 首先坐Piz Seteur纜車線(紅線), 接著坐超新嘅Gran Paradiso吊椅線(橙線), 再坐特色嘅Sassolungo纜車線(黃線)遊覽Sassolungo山, 落山後走一小段行山徑(綠線)到五星級山屋Rifugio Emilio Comici食個Lunch, 之後行去Mont Sëura(綠線)坐兩程吊椅線Mont Sëura(藍線)及Mont Pana(紫線)返落St. Cristina, 再坐巴士返回Ortisei
最後仲玩埋Alpe di Siusi纜車線(1號線)及Sole吊椅線(59號線), 過咗充實嘅一日
好豐富既行程, 風景好靚!
回覆刪除我之前玩北意, 係驚 Milan 治安, 北意其他地方感覺安全
#11 纜車站旁間酒店好似幾靚
新吊車靚呀. 企車好特別, 可惜烏雲蓋頂.
印象中當時去都係一邊好天, 一邊陰天, 落雹真係驚
午餐和洗手間好出色^^
新淨嘅酒店係咪係山上, 開車可以上到去嗎?
紙包裝蛋糕賣相唔錯, 味道ok嗎?
新淨嘅酒店係咪係山上, 開車可以上到去嗎? 應該唔可以。
刪除紙包裝蛋糕賣相唔錯, 味道ok嗎? 唔錯！