【西班牙自駕遊】Day10.1 Setenil de las Bodegas

西班牙自駕遊-大城小鎮之旅  Setenil de las Bodegas

Day 10 - 9月23日  星期一  晴

行程: 龍達 - Setenil de las Bodegas - 國王步道 - 龍達 139km

住宿: Apartamento Victoria (1-Bedroom Standard Apartment with private parking, 兩晚140歐)

今日安排咗兩個節目, 早上去附近一個小鎮Setenil de las Bodegas睇下, 佢好特別㗎, 啲屋好似起喺岩石下面或裡面咁, 而下午就約咗行El Caminito del Rey國王步道。今朝未夠九點就出門搵食, 喺aparment不遠處, 見到呢間Cafe門口放咗早餐牌, 好正咁喎, 而且有唔少客人, 就決定食佢

牆上的壁畫

裡面人頭湧湧, 不停有人出出入入, 遲啲來都無位, 而阿姐一條友就做到冇停手

我就唔諗叫咗門口個早餐set, 5.75歐有咖啡、鮮橙汁、雙蛋、煙肉、開邊法包, 仲附有一兜蕃茄醬、牛油、果醬及一堆肉醬用來搽麵包食, 放滿張檯, 好豐盛嘅早餐

同伴就叫咗牛角包餐, 2.8歐, 相對奀痴痴, 不過阿姐上餐時亂咗, 最後變咗單點, 收咗5歐, 不過杯咖啡的確係單點份量

食完後, 再周圍行下, Church of Our Lady of Mercy Ronda教堂

又行去公園嘅觀景台望下

今日天氣好好, 觀景台無尋日下午咁多遊客, 好舒服

Bullring of the Royal Cavalry of Ronda龍達皇家鬥牛場, 場外嘅鬥牛勇士像

Monumento al Toro de lidia雕塑

行到鬥牛場見到剛剛開門就出事喇, 因為興起買飛入場, 結果攪到之後嘅行程趕到瀨屎咁, 又俾同伴鬧爆😨

職員準備開檔, 眼見無人排隊, 可以做第一組客入場, 咁就買飛入場, 每位8歐

龍達係鬥牛發源地, 呢度亦係西班牙最古老的鬥牛場

首先直衝鬥牛場參觀

冇人阻擋, 可以獨佔成個場影相

鬥牛圈內都有嘅擋牛板

上觀眾看台玩下

時間尚早, 太陽光仲未照曬整個牛場

看台上的觀眾席

再去睇下場內其他設施

仲有個展覽館

玩咗大半個鐘, 開始有旅行團殺到

梯級邊的瓦磚都印有鬥牛勇士及鬥牛圖案

陸陸續續有遊客入場, 再周圍影下相

全程玩咗大約一個鐘, 呢個鬥牛場相比西維爾鬥牛場好玩得多, 裡面地方及展品都好類同, 但就唔駛限時限刻跟Tour, 又唔駛跟住個Guide行, 又有得上觀眾看台, 自己分配參觀時間, 自在得多

鬥牛場的小册子

返apartment時經過超市, 去補影返尋日食咗但漏影嘅長法包

跟著拿拿淋揸車去Setenil de las Bodegas, 它的特色是大部分房屋都建在岩石下, 小鎮距離Ronda約半小時車程, 途中會經過另一小鎮, 入面有啲路段都窄窄哋, 要留心啲, 首先去咗小鎮嘅觀景台Mirador Balcón De Setenil de las Bodegas, 呢度只係睇到個小鎮全景, 同一般西班牙嘅小鎮差不多, 完全睇唔到佢有乜特別之處

出發前無特別搵停車場資料, 諗住唔難搵, 不過揸到去小鎮外圍搵唔到泊車位, 最後都嘥咗啲時間先搵到個室內停車場Parking Los Caños, 攪到大約12點先到開始遊覽小鎮, 由停車場出來, 就見到呢個景色

成排屋好似被大石壓住咁

左右兩邊都有路, 見到有路牌指示左邊有餐廳, 咁就沿指示方向行過去

開始見到多啲屋喺岩石下面

不過沿路都好冷清, 好無人氣

差不多行到盡頭, 先見到間餐廳, 但只有幾丁遊客

周圍所見, 並不是全部房屋都建於岩石下面或裡面, 大部分房屋反而建在岩石上

行個呢度, 我哋都覺得怪怪地, 雖然啲屋都喺岩石下面, 都係幾特別幾靚, 但係就少咗店鋪少咗熱鬧, 同之前在網上所見嘅相有出入, 唯有反方向再搵下

靜英英有靜英英好, 可以好free咁影下相

返到停車場位置後, 又去另一邊搵下

呢邊啲屋開始密集啲

不過都係無乜人

行多一陣, 終於見到一排房屋隱藏喺岩石之中, 規模亦大好多

而且有多間餐廳店舖, 非常熱鬧

成排屋都喺巨石底下, 好似喺山洞入面咁涼爽

露天座位坐滿遊客

本來計劃喺度食午餐, 由於已經遲咗, 所以再確認下去國王步道要幾耐, 點知要一個鐘車程, 印象中半個鐘車程就得, 我又攪錯了, 今次連午餐都食唔切

結果匆匆忙忙, 圍繞呢度影下就要走人趕下場

再急急腳趕回停車場, 泊車時間一個鐘多啲, 收費1.25歐

因為趕時間加心急, 離開停車場後行錯路口入返小鎮, 仲要經過一條好窄嘅路, 雖然有個當地人幫我哋睇位, 但最後都刮花咗車頭揼把, 都係衰太心急

上一篇: 西班牙自駕遊-大城小鎮之旅 Day 9
下一篇: 西班牙自駕遊-大城小鎮之旅 Day 10.2