西班牙自駕遊-大城小鎮之旅 Sevilla 西維爾
Day 6.2 - 9月19日 星期四 晴
行程: 哥多華 - 西維爾 149km
住宿: Monte Triana (Double Room & Garage, 兩晚253.3歐)
十一點左右離開哥多華轉去下站西維爾, 呢個係西班牙第四大城市, 所以比之前幾日去過嘅鎮城大得多, 景點分佈範圍自然較大, 不過我哋唔太鍾情大城市, 所以只係住兩晚, 重點出擊, 睇下啲大路景點就算！高速公路上, 又遇上企定定嘅黑牛🐮
舊城位置集中在市內的Centro區, 唔太適合揸車出入, 所以揀咗喺一河之隔嘅Triana區留宿, 搵咗間近河邊啲、新淨啲、經濟啲及有停車場嘅酒店。經過約兩小時車程到達酒店, 大約一點半職員已經安排好房間, 房間如預期般新淨、企理、光猛, 可惜間格不夠方正令空間不足, 亦唔夠空間同時打開一大一細喼
反而浴厠空間就闊落得多
酒店大堂
酒店外觀
酒店地庫停車場, 入口在大門囗旁邊, check in後職員已安排好泊車位置, 叫我們按照車位號碼來泊車, 車位比上一間酒店嘅地獄車場闊, 但都係窄窄哋, 穩陣啲就要十手八手軚先泊好, 泊好之後, 左右兩邊不夠位同時打開車門, 唯有將司機果邊貼近牆邊, 然後由另一邊離開車箱, 比較麻煩, 不過呢兩日都唔諗著用車, 泊完就算, 期間見到同我哋一齊check in嘅老外夫婦, 老外泊到發皮四, 話架車係自己都好難搞, 因為住三日都要用車出出入入, 所以佢而家要上去同職員講換位, 睇相啲空間又唔似咁差！ 搞完一大輪後, 出動搵食
酒店附近的Mercado de Triana市場 市場如一般歐式街市, 有肉店, 菜店, 雜貨店及餐廳
心儀嘅餐廳爆滿, 揀過另一間外觀唔錯嘅餐廳食午餐 啤酒(1.8歐)及可樂(1.5歐)
來咗西班牙幾日, 仲未有機會食西班牙海鮮飯, 今日要開齋喇, 選擇時只集中喺海鮮配料上, 個飯來到時, 見到成鑊都紅當當, 當堂O晒嘴😲, 連隔離檯兩位女仕都來八掛下, Red Abanda (with scarlet prawns, sea urchins and palo cortao sherry) 2人份, 27歐, 好彩味道很好, 只係影相唔吸引 跟住由Puente de Triana橋行過去對岸開始遊城, 河畔景色 橋邊的Capilla Virgen del Carmen教堂
過河後行去最近的景點鬥牛場, 鬥牛場前的Capilla de los Toreros天主教教堂 Plaza de toros de la Real Maestranza de Caballería de Sevilla西維爾鬥牛場, 它是西班牙歷史最悠久的鬥牛場, 每年舉行的鬥牛節日「阿布利爾節」的場所, 鬥牛場的正面被天主教教堂遮擋住一半, 所以睇唔到整個鬥牛場的外觀 正門外有觀光馬車等客上釣
既然是西班牙最悠久的鬥牛場, 當然要去參觀一下, 鬥牛場以導賞團型式進行, 每位8歐, 下一團時間是16:50 離開場時間還有大半小時
把握時間, 買飛後行去附近景點的Torre del Oro黃金塔睇下, 黃金塔共有三層樓, 可付費入內參觀 沿河景色
回來後隨即可以接住入場, 每人派了一個導覽機 就正試開始揼波鐘時間, 導賞員帶大家到各個展覽廳, 講故仔聽歷史 另一展廳
再一個展廳
終於來到最想睇嘅鬥牛場
牛隻等候出場的牛廄, 出去之後就無回頭👋 人多加鬥牛場個內圈大, 很難影到張乾淨全景相
停咗約十分鐘, 導賞員就吹雞散埸, 啦屎一刻總算影到一幅無乜人的鬥牛場景 鬥牛場外的Monumento a Pepe Luis Vázquez記念碑
繼續行去最近的景點, 途經一個市場, 內部不及外觀, 閃人
Catedral de Sevilla西維爾主教座堂, 其後才知道它是西班牙最大的教堂及哥倫布埋葬地, 亦是世界第三大教堂, 而教堂的鐘樓Giralda曾是清真寺的宣禮塔, 現在保留下來成為教堂的鐘樓, 西班牙每個城鎮都有好多教堂, 所以無打算參觀, 知多咗之後, 又覺得有啲後悔無入去參觀！ 西印度群島綜合檔案館
天氣熱, 買咗杯喺香港唔再買嘅咖啡飲下, 5.1歐 Palacio de San Telmo聖特爾莫宮, 政府辦公室Universidad de Sevilla塞維亞大學
之後來到Plaza de España西班牙廣場, Torre Norte北塔 Torre Sur南塔
陽光普照下周圍的景色好靚, 而且周圍唔多人, 好舒服
呢個橋景, 係遊客的打咭位
河上有四座橋, 原來背後代表西班牙的四個古代王國Castille, Aragon, Navarre及Leon
而呢條人工河稱為運河, 沿著廣場的整個周邊, 全長515米, 遊客亦可以租艇遊河
廣場內的建築物全是地方政府辦事處
西班牙廣場內, 最為人所知的是半圓形建築物下彩繪瓷磚的長椅, 包含共56幅瓷磚畫代表49個西班牙省份 期間同伴去咗睇Flamenco街舞表演
我就無無聊聊去影彩繪瓷磚長椅 會合之後, 上埋二樓睇下
環境好舒服, 再慢慢周圍行 不知不覺已經到咗日落黃昏時份
過咗八點先走, 天都開始黑, 索性打的去食飯, 用咗4歐, 慳返啲腳骨力, 點知去到門口, 鬼咁多人圍著個帶位, 原來已經冇位, 職員介紹我哋去旗下另一姊妹餐廳, 如果唔係就要等第二輪9:30後, 咁就訂好位, 返酒店休息下, 夜啲再來
九點半後來到, 職員好厲害咁記得我個名, 再等一陣就有位
先來兩支西班牙啤酒, 每支1.5歐, 抵飲
Risotto with Idiazabal cheese and mushrooms, 12歐
Tuna Takaki with bulgur wheat and Thai-style vegetables, 5.9歐(半份)
Grilled octopus with vegetables and soy mayo, 7.2歐(半份)
Grilled beef tenderlion with potatoes and thyme, 20歐, 總括來講, 呢餐味道好, 價錢唔算貴, 唔錯, 加上今日天氣好, 算是大滿足了
西維爾觀光地圖
沒有留言:
張貼留言