駕世遊: 【享受大自然~瑞士之旅】Day13 崖邊旅館Gasthaus Ascher

享受大自然~瑞士之旅 Day13 崖邊旅館Gasthaus Ascher

Day 13 - 9月15日星期四多雲有雨

行程: Luzern - Zurich - Wasserauen - Ebenalp - St. Gallen - Zurich

住宿: Sorell Hotel Rütli (雙人冷氣房, 連早餐, 214郎)

經過一連九日晴天後, 天氣預報話今日起天氣開始轉差, 未來三日多雲有雨, 今日叫做好啲, 所以先去有行山行程嘅Ebenalp, 計劃喺山頂行1號線兜個細圈, 睇下山洞木屋、山洞教堂Wildkirchli、及崖邊旅館Gasthaus Ascher, 途中會走入山洞, 穿過山洞之後, 就可以陸續去到幾個崖邊景點

又或者由Ebenalp纜車站經Seealpsee行落山

今朝天未光嘅花橋, 寧靜又美麗, 住琉森嘅决定真係正確

睇返Google地圖, 花橋右後邊座山應該就係尋日去過嘅皮拉圖斯山

雖然今朝睇唔到日出, 但係就有個好靚嘅橙紅色天空

從方向睇, 對正東面座山應該就係Rigi

酒店嘅餐廳都幾靚

可以揀坐室外, 全部都有花橋景, 不過早餐時候已經落雨, 要坐返室內

早餐都算得上豐富

因為天色唔多好, 又落著雨, 都係唔急住去Ebenalp, 再喺花橋一帶行下

花橋嘅橋頂有好多彩畫, 從號碼來睇, 起碼有近百幅, 影低幾幅較精彩嘅彩畫留念

金色Hotel字上面位置果兩格就係我地住嘅客房

Dolce Amore雪糕店, 佢嘅意大利雪糕好出名

再沿著羅依斯河畔(Reuss)行去Spreuebrucke, 另一條好似花橋嘅舊木橋

Spreuebrucke, 尋晚就喺前面座城塔回頭

橋頂亦有少量彩畫

附近一帶舊建築物, 好似混合咗德國及捷克特色咁, 天氣唔好亦依然好靚

由琉森到蘇黎世, 車程約一小時, 放低行李到酒店後立即出發, 見到蘇黎世火車站有獎券抽獎, 跟人排隊

中咗一個安慰獎及一張彩栗, 不過職員知道我哋過兩日走人, 就叫建議我哋要兩個安慰獎, 各人一盒糖

Ebenalp纜車站在Wasserauen, 由蘇黎世去Wasserauen要喺Gossau轉火車, 全程約兩小時, 都幾遠架 !

喺Gossau站影火車時, 車長見我個款都幾啱做車長, 就叫我不如留喺呢度揸火車, 所以我決定留低, Hi, 你自己返香港, 我會留喺度揸火車喇, Yeah ! 人工一定好過香港 !

第一次知道Ebenalp、Appenzell及St Gallen呢幾個地方, 係喺好多年前睇過TVB嘅一套旅遊節目現代塵世美, 覺得Ebenalp嗰幾個崖邊景點好靚, 所以加入今次行程內, 今日坐火車經過Appenzell時, 真係見到一群牛係馬路行梗, 可惜手腳太慢, 錯過影相機會

Ebenalp纜車站就在Wasserauen火車站外面, 去到纜車站已經喺01:20

天色都係好差, 似要落雨, 所以唔行咁多喇, 買來回纜車票, 每位31郎, Swiss Travel Pass有半價優惠, 即15.5郎

唔到十分鐘就到山頂

行去教堂Wildkirchli及崖邊旅館Gasthaus Ascher只需20分鐘, 去Seealpsee要1h25m, 而行落去山下纜車站就要1h45m

山上的纜車站

同車有一班著得好pro嘅藍衣大嬸已經好快咁搶先行喺我哋前面

唔駛十分鐘就去到山洞入口, 大嬸們已經急不及待喺洞口休息開餐

洞口前嘅位置可以睇到纜車上落, 亦喺個影纜車嘅好位

山洞之內

回望洞口

行兩、三分鐘就去到出口, 尾段有啲濕滑

出口就係山洞木屋

回望山洞出口

山洞木屋裡面設成展示館, 可以入內參觀

轉個靚彎就到山洞教堂Wildkirchli

再繼續沿著崖邊行落些少

就到最想睇嘅崖邊旅館Gasthaus Ascher

Gasthaus Ascher嘅正面及側面

對著嘅山景, Seealpsee就在前面不遠處

今日無pack lunch, 喺Gasthaus Ascher開餐, 一開口點餐時, 就俾個阿姐粗聲粗氣咁話, 要order飲品先, 之後點餐, 仲重覆一次, 真係巴Q閉! 枱上張紙枱墊好靚

凍凍哋, 唔想飲啤, 點咗兩杯熱Latte

1/2 Rosti with 2 eggs, 不過呢個Potato Rosti係全程最好食嘅Rosti dish, 煎得夠脆及香口, 亦唔太鹹, 值得一試

仲有雪糕新地, 全部共28.5郎

食到咁上下, 班藍衣大嬸又入來食嘢, 究竟佢哋食嘢定行山呀? 食完之後又喺門口影下相, 呢度啲客房, 全部對著呢個山景

行前些少有個分义位, 左邊落山或者去Seealpsee, 右邊行返上去纜車站

回程條路都有啲難行, 又要上斜, 行近半個鐘, 似乎直接行落山仲更加好

沿路景色

由Gasthaus Ascher行咗近半個鐘至到山頂

03:40返到山下面, 即係全程用咗2h20m, 估唔到咁快, 所以即刻去埋St Gallen。Ebenalp、Appenzell及St Gallen呢幾個地方屬於一區, 如果今日有一個full day, 應該可以玩得晒

Wasserauen火車站

途中天色轉好, 加上景色優美, 所以喺火車上不停影相, 沿路景色

五點前來到St Gallen, 跟著Google Map向聖加侖大教堂方向行

Gallusplatz廣場一帶, 有好多好靚嘅舊屋

經過聖加侖大教堂

先入去睇下, 原來裡面嘅禮堂好大, 啲雕刻裝飾天花壁畫非常華麗

周圍一帶嘅建築物

聖加侖大教堂及修道院

最想去睇嘅修道院圖書館, 可惜已經過咗開放時間, 不過照入去睇下, 當然無奇蹟出現, 唯有下次再來過!

聖加侖大教堂另一面

呢堆聖加侖建築群好集中, 全部都係世界文化遺產

仲有Kirche St. Laurenzen, 亞伯準備鎖門之際見到我哋行入來, 就叫我哋睇埋先, 多謝晒呀!

Gallusplatz廣場一帶好靚

離遠見有個鐘塔, 行過去睇下係乜東東, 經過Marktgasse有個okomarket

原來係間教堂, 叫Kirche St. Mangen

St Gallen車站

之後坐火車返蘇黎世酒店攞房, 今晚客房有冷氣, 內籠幾闊落乾淨, 唔錯

今晚同伴安排去瑞士廚房Swiss Chuchi食瑞士火鍋, Oh No!

今晚好多人, 要排隊等位, 等咗大約15分鐘, 餐廳張枱墊又係好靚

點咗Turbinenbräu draught beer, 4.5郎, Traditional Vaudois fondue, made with four cheeses, white wine, cherry liquor and garlic, 26.5郎, 呢餐招呼我哋嘅侍應大叔非常有禮貌, 仲好好人, 臨尾見我哋無食到火鍋底燶燶哋嘅芝士, 就教我哋一定要食個芝士底, 仲幫我哋鏟起個底, 真係幾好味, 情況就好似煲仔飯個底咁, 燶燶哋至好食!