【享受大自然~瑞士之旅】Day12 皮拉圖斯山Silver Round Trip

享受大自然~瑞士之旅  Day12 皮拉圖斯山Silver Round Trip

Day 12 - 9月14日  星期三  晴

行程: Grindelwald - Luzern - Pilatus - Luzern

住宿: Hotel Des Alpes (雙人河景露台房, 連早餐, 272郎)

琉森市附近有三條出名的登山路線, 分別有鐵力士山(Titlis)、瑞奇山(Rigi)及皮拉圖斯山(Pilatus), 由於時間所限, 揀咗交通最方便的皮拉圖斯山作為今日行程。網站介紹以循環線遊覽皮拉圖斯山為最佳方式, 並提供金圈及銀圈行程, 路線由琉森開始, 到達Alpnachstad後轉齒輪火車上山頂, 回程由山頂坐纜車到Kriens, 然後坐巴士到琉森市中心, 或以相反方向進行, 金圈銀圈的分別在於往來琉森及Alpnachstad之間的交通工具, 金圈是坐船而銀圈即坐火車, 網站所登的路線圖, 印有每段所需的時間, 非常簡潔清楚

山頂上有5條行山徑, 最長的行山徑, 單程只需35分鐘

酒店早餐由七點半開始, 唔食總覺唔抵, 食又會延遲出發時間, 如果早餐可以提前至六點半開始就最好

早餐後, 坐08:19火車出發到琉森, 中途須於Interlaken Ost轉車, 全程2h36m

途經一個小湖區, 景色好靚

大約十一點到達酒店, 未到攞房時間, 寄存行李後馬上出發去皮拉圖斯山

見有陽光, 忍唔住喺花橋Kapellbrucke一帶影下相

花橋頂的彩畫

今日住宿嘅酒店Hotel Des Alpes, 對正花橋

花橋Kapellbrucke

十一點半左右, 坐火車去Alpnachstad

約十二點去到皮拉圖纜車站, 但估唔到已經有好多人等車

來回車費每位72郎, 有Swiss Travel Pass可享半價優惠, 即36郎, 不過由2017年起Swiss Travel Pass可免費乘搭皮拉圖斯山的交通工具, 點解唔係由2016年開始免費呀 ! 

由於太多人, 買飛嗰時會用個色牌分別班次, 我哋坐一點鐘嘅班次, 要等超過一個鐘, 好彩係唔駛排隊等, 可以周圍行下, 打發時間, 纜車站旁的酒店及建築物

Alpnachstad碼頭, 由琉森坐船出發, 就喺度落船

車站旁邊的餐廳只賣蛋糕飲品, 唯有食下甜筒消暑等上車

終於可以上車了, 沿路景色

山頂站景色

車站嘅建築群包含咗兩間酒店、纜車站及齒輪火車站, 其中一間酒店Hotel Pilatus-Kulm

Trail 2(藍線)嘅起點, 頭段喺山洞之內

皮拉圖斯峰2132m

首先行最長嘅Trail 5

由Hotel Pilatus-Kulm開始至Tomlishorn, 單程預計約需40分鐘

全段大致係平路, 沿途景色

基本上全段路都沿著山邊鑿出嚟

跨過一個小山頭後

眼前完全被雲霧遮蓋

之後就到最尾一段路, 除咗要上斜外, 仲要係好崎嶇嘅石頭路, 好彩旁邊有欄杆扶手, 否則都幾難行

行埋最後一段石頭路

就到達2131m嘅Tomlishorn

山頂四周嘅景色, 左邊一個矮啲山峰有間小教堂

纜車站嗰邊嘅Hotel Bellevue

停留咗十分鐘左右便沿路折返

返到Hotel Pilatus-Kulm, 仲有時間行埋剩低幾條行山徑, Trail 1、2、3各有重複嘅地方, 所以索性一次過行晒, 喺Hotel Pilatus-Kulm轉左走入鐵門內的山洞, 穿過山洞後就係山頭嘅背面, 轉左接著Trail 2嘅路線行

呢度可以更清楚睇到小教堂

向上行穿過山洞之後就到山脊

上到山脊後, 眼前係個好開揚嘅觀景, 可以腑視整個皮拉圖斯山, 有近啲嘅Oberhaupt、遠啲嘅Esel, 以及Hotel Pilatus-Kulm、圓筒型嘅Hotel Bellevue、左邊嘅纜車站及右邊嘅齒輪火車站

Oberhaupt 2106m

Esel及車站建築群

纜車站

之後沿著Trail 3行返落火車站平台

Oberhaupt及下面係Trail 1、2(藍線)起點嗰段喺山洞內

繼續行埋Trail 4上Esel

山頂景觀, 向琉森市嘅方向

望向Tomlishorn方面, 可以睇到幾條行山徑嘅路線

Esel 2118m

回望Trail 4嘅梯級路

纜車站內有自助餐廳

薯餅, 可樂及蛋糕共31郎

最後行一次全段嘅Trail 1

回程纜車分為兩段, 頭段係大型纜車

後段係小型纜車, 呢段差不多排咗半個鐘至上到纜車

之後跟住指示行去搭巴士, 返到琉森火車站已經五點四十分

琉森火車一帶的景物

被花橋所吸引, 兜路經花橋行返去酒店, 順便影下花橋

穿過花橋去到酒店附近嘅Zunfthaus Pfistern

後面係Altes Luzerner Rathaus

終於返到酒店, 今日嘅客房係無冷氣, 感覺被舖有啲蠟, 清潔度只係一般

客房有個長騎樓

有個對著花橋嘅無敵景觀, 不過要行出騎樓先睇到, 房入面係完全望唔到個景

影相時唔小心坐爆玻璃, 睇真啲櫃面同玻璃之間條罅有成厘米闊, 有無攪錯, 擺明陰人啫!

收拾心情後, 出動到市內行下

當然由花橋開始, 位處河邊嘅Jesuitenkirche

夕陽下嘅花橋

Altes Luzerner Rathaus

Restaurant Fritschi

Stadtkeller Restaurant

霍夫教堂Hofkirche

教堂有彌撒, 無得入去參觀

Old Swiss House, 呢間餐廳嘅外觀好有德國風

除花橋外, 垂死獅子像Lionmonument可以話係琉森第二地標, 所以巡例到此一遊

前面聚集大堆强人

之後行去城牆

跟著位老伯行

以為上面個鐵閘係入口, 點知上到去, 阿伯先至同我哋講private !

沿著斜路行上去公園, 終於見到城牆入口

其中一個城塔Clock Tower, 而家改為類似博物館, 入面無乜好睇, 外觀仲靚

其他城塔

再沿著城牆行落去河邊, 就會去到Spreuebrucke, 另一條好似花橋嘅木橋

因為要行返去影Clock tower正面, 所以行返回頭路

今晚係迎月夜, 所以月亮已經好圓

慢慢行, 全程用咗兩個鐘已經返到起點花橋

返回酒店放低行裝後, 再出動搵地方食晚餐

沿路影下花橋夜景

經過Dolce amore, 呢間意大利雪糕好出名, 未食飯先食甜品

因為坐爆玻璃, 有啲影響心情, 決定返酒店食埋兩個剩低嘅杯麵, 結束今日行程, 好彩最後都唔駛賠錢

上一篇: 享受大自然~瑞士之旅 Day 11
下一篇: 享受大自然~瑞士之旅 Day 13