2013北海道自駕遊Day2

北海道芝櫻自駕遊  札​幌初櫻

Day 2 - 5月12日 星期日  天陰

札​幌場外市場 - 北海道神宮 - 円山公園 - 登別 - 靜內 (292km)
住宿: ホテル アネックス イン Annex Inn (7000円, 免費WiFi及有線上網)
部屋: ◇◆禁煙◆◇ダブルルーム（約15㎡）
房Plan: 安くて便利で快適♪◆素泊まりプラン◆

今日天氣比預期好, 天色幾清, 因為出發前天氣預告, 未來七日都係陰天或雨天, 先落去影下酒店外觀

隔離就係租車公司, 攞車非常方便

預約咗八點鐘出車, 所以周圍行下就返酒店退房, 今次選擇呢間租車公司, 除咗近及方便外, 還有佢地有懂英語, 國語及韓語職員, 以及有Package連租用IC Pass, 可以在指定期間, 無限使用收費高速公路(IC), 跟我們辦手續的職員, 果然講得很清楚, 英文仲好流利, 好快就係門口攞車

今次訂了架Honda FIT, 即港版Jazz, 租八日的費用是48090円, 再加八日IC Pass ETC Card, 費用是8000円, 平均每日都係1000円, 如果行程會行下IC的話, 咁都會幾抵, 例如由札幌去旭川, 行IC的話, 費用就要3650円, 抵唔抵用, 最後當然要睇下成個行程會行幾多IC, 可以參考這個網站關於北海道IC收費

第一站先去中央場外市場的北のグルメ亭食早....飯, 在途中看見北のグルメ的Shuttle Bus, 連GPS都唔使用, 跟住佢行就算, 約十分鐘車程就到達中央場外市場, 在附近行了一小圈就發現一些給客人使用的停車場

景點地址: 札幌市中央区北11条西22丁目4-1
泊車處: 中央場外市場外有免費泊車位
導航用的電話號碼: 011-621-3545

呢度其中有條大街, 兩旁都是海產店, 但遊客不多, 大多數人都去了最大間的北のグルメ亭, 可能因為佢有免費接送客人的專車, 所以最有人氣, 我們亦打算去北のグルメ亭食早飯, 飯前在其中一間店買了帶子乾, 老板娘主動地每包各減１００円給我們, 感覺上, 其他小店生意都幾難做

最大間的北のグルメ亭, 不時都有旅遊車前往, 人來人往

北のグルメ亭內有間食堂, 亦是市場內最多人的食堂, 食堂的Menu

點了トロ三色丼 (拖羅三色丼) 2900円

海鮮丼 2980円

及一條しまほっけ焼 (一夜干) 980円, 好大條呀, 整體上, 味道OK

食堂內的環境

之後就出發去札幌賞櫻熱點, 北海道神宮及円山公園, 雖然今朝新聞話櫻花仲未開, 不過都想去睇下, 加上都未去過, 可能星期日關係, 附近一帶都人多車多, 幾塞車, 最後泊咗係北海道神宮後門的停車場, 估唔到可以唔駛錢泊兩個鐘

景點地址: 札幌市中央区宮ヶ丘他

泊車處: 附近有免費及收費停車場

導航用的Mapcode: 9487339 / 9487284

北海道神宮外有棵開了花的櫻花樹

成個神宮開得最燦爛的櫻花樹

內面有好多非常高的古樹

神宮

神宮外的大道, 兩旁櫻花亦未開

呢邊應該係正門

之後過隔離的円山公園, 因為係櫻花季節, 期間限定, 可以在園內BBQ

大部份櫻花樹的狀態都係咁上吓

跟著就去登別地嶽谷, 途中先經過登別櫻並木, 就在伊達時代村附近

景點地址: 北海道登別市中登別町

泊車處: 附近有免費停車場

導航用的電話號碼: 0143-83-3311 (伊達時代村)

導航用的MapCode: 603 170 590 *28

登別櫻並木, 一樣係零開花

兩旁只有少量櫻花樹, 就算有櫻花, 都應該無乜睇頭

停咗一陣就繼續去登別地獄谷, 首先把車泊在觀光中心附近的停車場, 收費410円, 將泊車飛包咗大湯沼停車場

景點地址: 登別市登別溫泉町60番地

泊車處: 外有收費停車場

導航用的MapCode: 603 288 425

觀光中心外的地獄谷展望台, 呢度有幾條散步小徑

再行入去地獄谷遊步道

盡頭係鐵泉池

鐵泉池條石柱牌都冧咗

之後就行返回頭路, 再揸車去日和山展望台, 可以睇下大沼湯全景, 其實地獄谷果邊有條小徑, 可以直接行去大沼湯, 唔係太遠, 唔想揸車的話, 可以行, 我地唔夠時間行, 所以揸車過去

再揸車落去大沼湯, 呢度有兩個湯, 分別係大沼湯及奧の湯

行入啲就係奧の湯

奧の湯隔離有條路上去另一個叫日和山大沼湯展望台, 呢度可以睇到大沼湯了及奧の湯, 個View好過剛才嗰個日和山展望台

大沼湯

奧の湯

因為時間唔多夠, 所以唔去大正地獄及大湯沼川天然足湯, 揸車離開時, 經過觀光中心附近的鬼祠, 停低行下, 行完已經三點有多

因為今朝食完個丼好飽，到三點幾先去登別附近的白老, 食個遲來的午餐 - 白老和牛烤肉

景點地址: 北海道白老郡白老町社台271-44

導航用的電話號碼: 0144-82-5093

白老牛の店いわさき

順便同架車影返幅相

店內環境

每枱枱上都有一排炭爐

點了個サーロインセット (Sirloin Set) 4200円, 包飯及湯, 一心諗住食烤牛會好食啲, 結果同普遍和牛一樣, 得個油, 雖然都好軟熟, 但就無乜牛味, 唔識欣賞, 叫做試過下就算

上バラ (肋骨的腹側部位) 1575円, 反而呢個單品仲好食

可能塊肉薄薄地, 燒走咗啲油!?

食店外有個大草地及燒烤場, 不過今日星期日都無人幫襯

可能白老啲牛都幾出名, 連坑渠蓋都有隻牛樣

吸飽牛油後就立刻出發去今晚住宿的地方, 日高郡的靜內本町, 行IC大約個半小時就到達, 去呢度的原因係想去睇日本賞櫻100選之一的靜內二十間道路櫻並木, 剛好在六點天黑前到達靜內, 酒店外觀及房間, 同一般商務酒店, 細細間但整潔, 又有免費WiFi

跟著就出去靜內火車站行下, 不過沿途就真係靜過鬼

火車站隔離係遊客中心

站外

呢區最出名就係櫻花及馬, 所以周圍都有關佢嘅裝飾

酒店門口對面係條食街-靜寶通, 亦係我地選擇呢間酒店原因之一, 方便揾食, 點知人影都唔多個, 而且條食通有好多食店都在星期日休業, 所以揸車去附近一間之前在網上搵過的食店－お料理あま屋, 但去到後, 又係無開門, 明明今日唔係定休日

燈柱都用馬及櫻花做裝飾

好在揸車入來果時, 留意到外面沿途有好多Shopping Mall及食市, 所以再揸車出去睇下, 相差唔夠五分鐘車程, 但係呢邊就旺好多, 見到有間ちょいす回転壽司, 都幾多人等, 所以就決定食呢間, 等了二十分鐘就有位

季節期間盛產的日高春日海膽, 呢餐盛惠2997円

食完之後, 行下附近的吉之島超市, 買咗Haagen Dazs雪糕

及新出飲品