駕世遊: 2013濟州釜山賞櫻遊Day5上

釜山賞櫻遊東萊溫泉川櫻花路

Day 5 - 2013年3月30日星期六陰

濟洲 - 釜山 - 東萊溫泉川櫻花路 - 南浦洞

住宿: 東橫INN 釜山站1 (包早餐及免費WiFi, 約80000韓元一晚)

今早會搭十點半飛機返釜山, 繼續下半部分賞櫻之旅, 吃了昨天準備的麵包及咖啡就起程, 原定昨天晚飯後, 會到龍頭岩睇下, 但係有啲攰無去到, 所以打算先去機場附近的龍頭岩行下, 才去還車, 點知出發時, 竟然無咗件事, 就直接去租車公司的機場Outlet還車, 真係無記性

還車前, 先在租車公司隔離間油站入油, 今次濟州四天旅程總共行咗351km, 用咗62000韓元油費, 油價約1960韓元1公升, 除落大約HK$1.29行1km

去到租車公司就跟指示駛去還車處, 職員好快驗完車, 就叫我們去Office門口坐Shuttle Bus去機場

辦好Check-in手續後, 就在機場周圍行下, 估不到機場內, 大多數人都係學生, 不時見到一車一車的學生, 再周圍睇下有無土產手信可以買, 點知未入閘前的機場, 只係得一間手信舖, 又細間又喺角落頭, 分分鐘走漏眼

無嘢睇又無嘢好行, 唯有食多次早餐, 食店係二樓, 只有四間餐廳, 一間未開檔, 揀咗間最多款式, 買完先發現係Food Court

Order完就會收到個Call機, Call機響就可以去攞食物

點了個素壽司, 3500韓元

原本諗住加個牛骨湯餸壽司, 點知忽然轉軚點咗個石頭鍋伴飯, 8000韓元

完成品, 味道兩款都OK

今次釜山航空的登機証, 回港後先留意到連價錢都印在登機証上

架機好細架, 航班上無嘢食, 只有一杯小飲品

臨近釜山時, 會見到海岸邊有好多小島嶼, 又幾靚, 不過趕唔切影

由香港帶來的韓幣都用得七七八八, 所以到達釜山機場, 立即去換錢, 當日的匯率是136.62, 跟在香港換的差不多, 關於貨幣對換資料, 可參考預備篇

餘下行程會停留釜山五天, 安排住在釜山站東橫INN, 選擇佢的原因係Package包兩晚釜山酒店, 而佢係可選擇的酒店之一, 加上直覺上覺得釜山站應該是釜山市最方便的位置, 就咁就是是旦旦揀咗佢, 後來才發覺西南站是地鐵轉車站的中樞, 幾乎每天的行程都要往返西南站, 加上西南站也有東橫INN, 如果住在這裡會更加方便, 可以慳返唔少時間

由機場到釜山站, 可選擇坐機場巴士(Limousine), 鐵路或公巴, 由於機場巴士及鐵路的收費不太貴, 所以沒有考慮及搜查公巴的相關資料, 以下是關於機場巴士及鐵路的資料:
1. 機場巴士(Limousine)就最方便, 每四十分鐘一班, 車程約一小時多, 每位6000韓元, 而巴士站就在東橫INN對面
2. 鐵路方面, 首先要坐單軌輕鐵由機場站坐三個站到沙上站, 每位1300韓元, 再轉乘地鐵去釜山站, 需在中途的西面站轉線, 而票價分1區及2區收費, 分別為1200韓元及1400韓元, 沙上站至釜山站, 屬2區票價, 每位1400韓元, 總車程約一小時, 釜山地鐵站好近東橫INN, 出咗地鐵站, 約行兩三分鐘, 另外地鐵有一日票, 票價4000韓元, 基本上一日坐上四程就已經有賺, 但一日票不適用於單軌輕鐵

由於機場巴士是每四十分鐘一班, 時間不太啱, 所以選擇坐地鐵, 單軌輕鐵站在機場右手邊, 出咗機場就見到, 由機場行去單軌輕鐵站約兩三分鐘

單軌輕鐵自助售票機, 有中英文選項, 好方便, 由機場站到沙上站, 每位1300韓元

入了3000韓元, 出咗兩個入閘Coins, 同台灣捷運一樣

跟著就發生件奇怪事情, 本應自動找回400韓元, 點知好似玩老虎機中安慰獎咁, 跌咗廿幾個100won出來, 咁攪法部機咪日日幫公司倒米

輕鐵係無人駕駛列車, 車頭有個好開陽的窗, 睇風景一流

在第一個站(西釜山流通地區)附近已經見到櫻花樹

在第二個站(掛法)附近見到仲多櫻花樹, 簡直見唔到盡頭, 這一刻, 已經決定會抽時間來行下

到達沙上站後就搭電梯落去地鐵站, 由於今日會去東萊溫泉及南浦洞, 而中途又會返酒店攞房, 因為酒店要四點後先可以攞房, 最少會坐四程地鐵, 所以買一日票比較划算, 每位4000韓元, 買一日票的時候, 當時又要幫佢測試下部老虎機, 入了8100韓元, 結果正常地找回100won

買飛過程很簡單, 先準備銀兩, 自助售票機不接受萬元紙幣, 站內一般都設有自助找換機

一樣有中英文選項

中文Menu, 選擇車票種類

及數量

車票

由沙上站去釜山站, 需在西面站轉線, 轉線要落一層月台, 無電梯, 要拎住個喼行樓梯, 周圍人又多, 我又慢吞吞, 結果同伴上了車後才發現我還在車外, 而車門已經關上了

在釜山站4號出口, 有電梯接駁上地面, 唔駛拎住個喼行樓梯, 這個就係釜山火車站

隔離就係釜山站東橫INN, 先去攪入住登記及寄存行李, 原本兩晚附加酒店房要164000韓元, 櫃臺小姐話如果做會員, 入會費15000韓元, 房價即時有Discount, 會費加房價總共159100韓元, 比正常收費平, 結果被利誘入會了

寄存好行李已經一點多, 咁就無咗半日, 首先坐地鐵到東萊站附近的東萊蔥餅醫肚, 蔥餅非常出名, 在網上看到很多到釜山的遊客, 都會推薦到這裡吃著名的海鮮蔥餅

東萊站對面有好多街邊小食檔口

大大盤士多啤梨都係4000韓元, 好抵!

沿路條街好似好旺, 有好多食店

亦有少量櫻花樹, 樹下都散佈不少櫻花花瓣

當接近目的地時, 如果沿馬路行, 會經過一些類似時鐘酒店的旅館, 如果穿過停車場會快少少

在東萊站二號出口, 沿左手邊直路行, 再穿過停車場就到達東萊蔥餅, 步行約五至十分鐘, 食店資料
東萊蔥餅 동래할매파전
地址: 釜山市東萊區福泉洞367-2
電話號碼: 051-552-0792 (11:00-22:00) 每週一公休

東萊蔥餅店, 老闆娘穿著住傳統韓服在收銀處把關

店內內觀

餐牌

原本打算點一個小份的海鮮蔥餅再加另一款食品, 但個待應大嬸好似唔滿意我們點個小份, 指示我們點個中份, 小份是一人份量, 中份是二人份量喎, 即時對間舖大打折扣, 跟海鮮蔥餅的前菜, 右下角個沙拉帶有陣腥嗅味, 但入口味道又正常喎

主角海鮮蔥餅 (中份), 30000韓元

配料很少, 只有幾粒中蠔及少量海鮮, 主菜的蔥無乜香味, 餅底又淋又散, 味道一般, 可以不吃, 以這個價錢來說, 更加不值

石頭伴飯, 味道OK, 10000韓元, 對相海鮮蔥餅, 伴飯價錢屬合理

跟石頭伴飯的泥鰍湯

跟石頭伴飯的前菜, 分量超"的式"

合共40000韓元

大廳有個大廚窗對住煎蔥餅的廚房, 可以睇住煎蔥餅過程, 臨走時想行過影幅相, 但廚房大嬸指意唔好影

店外的車場, 滿佈了滿開的櫻花

地上也散佈櫻花花瓣

稍有大風吹過, 就出現飄花情景

食完飯就開始釜山賞櫻行程, 近年來, 韓國亦是賞櫻旅遊熱門地點之一, 可能係韓國好積極咁推廣旅遊發展關係, 可惜在準備釜山賞櫻資料, 官方的觀光網找不到太多有用資料, 相反網上有一些流傳資料說, 釜山有四大賞櫻地點, 分別是東萊溫泉川櫻花路, 海雲台迎月路, 南川洞櫻花路, 及金井山櫻花路, 前三處地方的資料不難找, 反而金井山櫻花路就較少資料, 有些資料提及是在東萊區金剛公園, 有些資料就提及是在蓮堤區蓮山洞山180-10一帶, 還說明交通方法, 坐釜山地鐵1號線市廳站, 換乘1號巴士, 於水滿谷終點站下車步行十分鐘, 比較實在, 可信性亦較高

除釜山市外, 打算到釜山賞櫻的遊客, 也會考慮到附近幾處著名賞櫻勝地, 首當其中當然是鎮海鎮, 在四月初期間, 不但可以看到余佐川浪漫橋, 慶和火車站及帝皇山公園的櫻花, 還有鎮海軍港節, 可以順道參觀海軍鎮海基地及海軍士官學校, 另外還有河東郡的花開場十里櫻花道, 及慶州也是著名賞櫻勝地, 但這兩處地方都離釜山市較遠, 不作考慮

今次釜山行程只會考慮釜山市及鎮海, 希望可以去晒以下地點:-
1. 東萊溫泉川櫻花路
2. 東萊區金剛公園
3. 海雲台迎月路
4. 冬柏公園
5. 南川洞櫻花路
6. 金井山櫻花路(未能確定是否正確) - 蓮堤區蓮山洞山一帶 (近南川洞)
7. 龍頭山公園
8. 鎮海鎮 (余佐川浪漫橋, 慶和火車站, 帝皇山公園, 及鎮海軍港節)
9. 掛法站附近的櫻花路 (在到達釜山時, 意外發現的櫻花大道)

今日安排到東萊蔥餅吃午餐, 目的當然係方便飯後去東萊溫泉川櫻花路, 由東萊站行去櫻花路, 最方便唔駛過馬路方法係由4號出口開始, 出口有樓梯行落車站底, 再沿河邊向前行, 幾分鐘後就可以見到櫻花樹