2013濟州賞櫻自駕遊Day4上

濟洲賞櫻自駕遊  競技場櫻花

Day 4 - 2013年3月29日 星期五  晴

濟州競技場 - 萬丈窟 - 茶喜然高空滑索 - 東門傳統市場 - 七星路購物街 - 濟州競技場 - 黑豬肉一條街 (81km)

住宿: Hotel W (HK$743, 包免費WiFi)

今日好似有啲作病, 所以無胃口, 無食早餐就直接起程, 首先去濟州競技場, 由於在第一天已經發現GPS沒有原先預備的競技場電話記錄, 所以這段路程就只好依靠簡單地圖及路牌, 去找尋它的位置, 最後亦順利找到, 其實只要進入大路後, 再往舊濟州市方向行駛, 就會看到英文路牌指示, 在到達濟州競技場時, 看到場內有個小形停車場, 就立即停泊在這裡

再沿著外圍行去競技場的入口, 這時已經可以看見競技場外圍有很多櫻花樹

樹上的櫻花好似一串串的葡萄

行到競技場入口處就見到場內有好多免費泊車位

走到競技場內, 就發現有很多旗幟及看到路傍兩邊, 有很多攤檔在準備中, 才記起今日是濟州櫻花祭第一天, 日期由三月二十九日至三十一日, 原先都無打算睇櫻花祭, 所以無特別留意日期, 估唔咁啱撞正櫻花祭

再行到盡頭河邊的草皮地, 這裡櫻花樹的數量更多更密

有條行人小路行落斜坡, 發現很多櫻花樹傍都裝有臨時大燈, 相信是用作晚上照射櫻花, 所以就決定晚上再來行下櫻花祭及睇夜櫻

再行回場中, 工作人員已經開始在舞台上準備各樣設備

行返轉頭, 部份攤檔已經開始營業

競技場位置圖, 紅線標示位置有櫻花樹

跟著就出發去在濟州市東面的萬丈窟, 它亦被列入世界文化遺產, 約四十五分鐘車程, 由於剛用了一半汽油, 所以中途先加一次汽油, 其實在濟州只餘下大半天行程, 不加油也足夠使用, 但安全起見也先加滿汽油

售票處及入口

據觀光網資料, 萬丈窟總長13,422公尺，為世界上最長的熔岩洞, 向遊客開放的部分約一公里長, 入口處

洞內都幾凍, 單程約一公里, 大約行二十分鐘, 沿路地面又濕又凹凸不平, 不太好行

行到盡頭會看見這座熔岩柱, 回程要走回頭路

離開岩洞才注意到, 洞外的雕刻外形是仿照洞內的熔岩柱

景點資料: 萬丈窟 Manjanggul Cave (만장굴)
地址: 濟州道濟州市舊左邑 金寧里 山3341-3
泊車處: 景點外的停車場, 免費
導航用的電話號碼: 783-4818
開放時間: 09:00~18:00
入場費: 每人2000韓元

下一個目的地就去茶喜然玩高空滑索(Zip Line), 茶喜然是茶葉博物館及茶園, 但在茶園內設置了高空滑索, 入場費每人w5000, 但如果說是來玩高空滑索的話, 就會括免入場費, 可以直接進場

去到報名處, 亦只有我們兩人

報名處內有提供Locker放貴重及隨身物品, 這裡的職員可以說一點簡單英語, 職員會先給一張生死狀之類的表給我們填寫, 在填寫時, 就分別有兩個韓國家庭來報名, 其中有幾個小朋友只有五, 六歲左右, 連同我們共十二人

首先到外出穿裝備, 頭盔及繩索帶, 然後職員向各人簡單講解注意事項, 不過就沒有再用英語向我們講解, 之後兩位隨行職員就帶領我們出發

滑索一共分為四段滑行, 其中一位隨行職員先出發給我們示範及在下一站接應

之後小朋友就爭著要開始, 速度其實不太快, 在高空上可以看到茶園內的景色

不過, 因為人太多, 等候的時間比較耐, 而且在高台上也很大風, 所以比較凍, 不過這裡的職員比較親切, 每次滑索前, 也會跟小朋友或大人傾談, 搞搞氣氛, 雖然聽唔明佢地講什麼, 但感到他們比較有心去令客人開心

在最後一段, 會安排做一個Couple running, 意思是二人一同滑行

茶喜然茶葉博物館除了可以玩高空滑索, 還有一間幾特別的咖啡廳, 是建於洞窟內, 所以當然要去這間洞窟咖啡廳睇下及食返個下午茶啦

先要經過一小段洞穴路

這裡氣氛及環境都幾好

只有一般飲品及糕點, 主要是綠茶類產品

點了熱朱古力, 抺茶Latte, 抺茶Muffin, 及抺茶Fermented Bread, 味道OK, 好過雪綠茶博物館

咖啡廳內設有Photo Point供客人拍照

離開時又要行返這段洞穴路

之後再行下茶園, 睇下其他人玩高空滑索, 如果唔想行, 可以在茶園內租高爾夫球車代步

茶園內還有一些世界縮影的建築物

景點資料: 濟州高空飛索 Zipline Jeju (짚라인제주)
地址: 濟州市朝天邑善屹里600號
泊車處: 景點外的停車場, 免費
導航用的電話號碼: 782-0005
開放時間: 09:00~18:00
入場費: 每人28000韓元(包括入場費), 入場卷韓幣$5000韓幣, 高爾夫球車遊園韓幣$10000/車

離開茶喜然茶葉博物館, 就出發去下一個目的地, 濟州市東門傳統市場, 車程大約半小時, 接近濟州市時, 又有警察影快相, 如果自駕遊人士記住留意車速

濟州市主要分為新舊兩區, 我們住的酒店在蓮洞區, 屬於新區, 而東門傳統市場即位屬於舊區, 鄰近港口, 進入舊區後, 可以見到區內沒有特別規劃, 較雜亂, 馬路都比較狹窄, 由其接近市場時, 所以一見有停車場就馬上駛進去, 以免浪費時間, 泊車地點在市場附近, 是個露天收費停車場, 在收費處取票後, 當猶豫該住那個方向時, 車場大叔已經邊講邊指手劃腳, 真醒目, 唔駛講就知我地去邊, 抵我們泊佢個場, 真係Thank you晒

原來東門市場都幾大, 有分乾貨濕貨及水產

好想買這種半乾的魚返香港, 但又怕焗到個行李箱成陣魚味

東門水產市場

5000韓元就有一大碟魚生刺身, 不過唔太夠膽試

條紅魚有成個身嘅Size, 好似都係10000韓元

漢拏橘子, 都幾貴

散買咗一個試下味道, 留返今晚做飯後果, 2500韓元

之後就行去七星路購物街, 經過中央地下街, 地下街就真係唔太掂, 落去係想過馬路, 連影相意欲都欠奉

七星路購物街, 見到過氣的Evisu, 都幾抵, 就血拼一下

景點資料: 東門傳統市場 Jeju Dongmun Traditional Market (동문재래시장)
地址: 濟州市一徒一洞1436-7
泊車處: 鄰近的停車場, 約1500韓元一小時
導航用的電話號碼: 752-3001
營業時間：星期一 ~ 星期五 0900 ~ 1800, 星期六 0900~ 1200, 星期日休市
入場費: 免費