駕世遊: 2012冰島自駕遊 Day 9

冰島自駕遊海上觀鳥團

Day 9 - 2012年6月10日星期日晴

Akureyri - Glaumbaer - Blonduos - Thingeyrar - Stykkisholmur - Grundarfjordur (457 km)

住宿: Grundarfjordur Hostel and Apartments (ISK 19400 四人價錢)

今日的車程也是比較長的一天, 所以要一早出發, 目的地是東部的Stykkisholmur鎮, 參加坐船Tour, 除了觀看雀鳥外, 最重要是可以試食即撈扇貝及海膽, 雖然擔心會再次暈船浪, 但係可以食最新鮮刺身, 唯有括出去, 不過網上見到隻船都幾大, 又有船艙, 比較放心, 對這個Tour期望好大

食過簡單早餐就出發

離開鎮之前去了N1油站入油, 不過入完油離開時, 入錯了行車線, 以至逆線進入迴旋處, 唯有匆匆離開, 搵地方修正, 見到Bonus超市就在附近, 馬上駛入去, 好彩周圍都無車, 咁就順便去Bonus影返張相, 記錄事發現場, 順帶一提, Bonus營業時間一般是十二點至十八點, 所以又無得行超市

第一站先去Glaumbaer, 主要是看冰島傳統草屋(Turf house), 沿路都見到好多雪山, 加上藍天白雲, 周圍的環境好似瑞士

今日天氣好好, 所以這裡的冰島傳統草屋看起來更靚

其中一間草屋是收費博物館, 裡面還有Tea House

之後途經Blonduos鎮稍作休息, 順道到教堂看看, 它好像是依照偽火山的形態來建造

教堂對面的油站, 有間餐廳, 室內都幾企理, 好想在這裡吃午餐, 但時間尚早, 我們只借用洗手間

然後去Thingeyrar教堂, 它是用石頭建造

遊客中心, 外牆跟教堂的外觀一樣

今日所到的三間教堂, 全都鎖了, 不能內進, 當離開教堂時, 看見了冰島馬, 其實來了冰島數天, 都見過多次冰島馬, 但沒有停下來, 所以今次要停低影相, 它們身形比較矮小, 毛髮非常粗糙

本來計劃去Hvitserkur, 看海中一座似驢的怪石, 但是沒有足夠時間, 只好放棄, 就直接去Stykkisholmur鎮, 由Thingeyrar教堂到Stykkisholmur的路程, 個GPS不太準確, 找不到預定及最短的路線, 只提供以一號公路為主的路線, 與預定的路線相差約百五公里, 所以只好靠路牌行預定的路線經由61,59及54公路到Stykkisholmur, 好彩友人幫手用自己的Android phone, 上Google Map睇實條路線有無行錯, 預定的路線, 全是沙石路, 所以行駛時間較長, 沿路風景都幾靚

大約三點十五分到達船公司, 它就在碼頭附近, 我們參加了Unique Adventure Tour, 每人ISK6690, 夏季每日有兩班Tour, 分別為11:00及15:30, 行程大約兩小時, 剛剛能趕上三點半的Tour, 如果再遲就無得玩

上船前, 先同個船員合照, 就匆匆上船出發, 返到香港先發現無影到隻船, 今個Tour只有十幾人參加, 比我們預期少好多, 心諗莫非又上賊船, 再諗下咪當上船食刺身, 少啲人咪可以食多啲囉

開船後, 我們就到船艙休息及食個輕盈午餐, 不過就無選擇, 小食部只剩下三件批, 再加幾款冰島飲品

食完之後, 同伴從舺板跑回來, 告訴我們看到一隻Puffin鳥, 而且距離好近, 可惜出到去舺板, 巳經看不到了, 心諗堅唔堅呀? 過咗一陣, 船長廣播發現白尾鷹(white-tailed eagle), 還說是非常罕見

其它雀鳥

還能看到Puffin鳥, 不過距離也很遠

沿途風景, 周圍乜都無, 但係島上就有一間小屋, 究竟點解決水電問題呢

隻船會穿梭不同小島去搵雀島

今日天朗氣清, 溫度清涼, 四周又風平浪靜, 完全估唔到個Tour會咁舒服, 咁遊閒, 而家的感覺就好似著羽絨, 係間開咗强勁冷氣的房入面晒太陽咁, 四周圍好平靜, 海面只有船行過所帶起的細小波浪

看到一些方形石柱

簡直是海天一色

開始拖網, 打撈海鮮

有二位船員負責將打撈到的扇貝分給客人試食, 只有一位船員會幫手開扇貝, 海膽就無開到, 在網上看到去過人, 一般都說外國人只會淺嘗生食物, 但在船上的大人及小孩, 幾乎係搶著來食, 如果想吃多啲, 就要自己動手, 但只有刀叉工具, 我們每人大約吃到三至四粒扇貝, 好新鮮, 不腥不鹹, 可惜無日本豉油, 我們都試過開海膽, 但不太成功

之後會經過一個小島, 再次見到Puffin鳥, 不過今次距離就近些, 大約十米八米

回程時, 沿途可以看見遠處一大群雪山

碼頭外的燈塔

到達碼頭

今次個Tour, 雖然食方面跟期望有出入, 但係天氣及環境因素, 令到個行程好舒服及遊閒, 所以對個Tour, 都非常滿意

落船後, 先去找超市, 預備明日早餐, 去到Bonus超市入口, 巳經落閘, 不過好彩地有個職員開門比兩個外國人入去, 我們就乘勢跟著入去, 匆匆行咗一小圈, 買咗冰島朱古力及蛋糕仔, 啲嘢真係比一般超市平, 不過收銀職員就苦口苦臉, 可能遲咗收工

跟著就返碼頭, 上去個山坡仔睇下個港口及燈塔, 這個鎮真係好舒服, 連個山坡上都無風

蒲公英在香港巳經好耐無見過喇, 在冰島就時常看到

之後就去教堂, 大門也是鎖著

剛巧教堂人員帶一對男女進入教堂參觀, 我們就乘機跟進去看看, 今日又再次跟尾成功

晚餐就去鎮內的Narfeyrarstofa餐廳

這餐味道很好, 可以算是在冰島膳食中, 三甲之內, 今餐全部都是海產, 其中青口最好食

Klofningur, Starter - 主要是冰島傳統食品, 有冰島魚子(紅/黑), 鯊魚乾, 雀肉等等

Icelandic Blue Mussel with iced mug filled wih Icelandic White Ale, 無喱頭跟壼啤酒, 唔知點食, 我們以為用來點或浸, 但侍應話就咁飲

Fishsoup and fish

Grilled Salmon

Fillet of Cod, 今餐都幾滿足, 餐廳仲有Cake食, 啲Cake仲好靚, 但我們就無試到啦

這個教堂就在餐廳隔離

準備出鎮之前, 經過Olis油站, 由於用了大半缸油, 以防萬一, 先行加油, 第一次在其它油站加油, 先確定可以以信用咭簽賬加油, 入油後到收銀處付款, 但等了好耐, 原來前面兩位女士在買軟雪糕, 見到個收銀哥仔, 把軟雪糕倒入一個大量杯, 我心諗冰島人都幾環保喎, 帶買量杯買軟雪糕返屋企食, 但睇睇下見佢加滿雪糕, 超過一公升, 再磅下重量, 再問個位女士要加乜Topping, 加完後就把雪糕和Topping攪混, 再倒入個大紙杯, 之後個位女士就立即大快朵頤, 個位收銀哥仔跟住就洗下個量杯, 再重覆以上動作一次比另一位女士, 原來雪糕唔係買走共享, 而係獨食, 我就睇到O晒咀, 碌完咭都忘記簽名, 要哥仔叫先識簽

另外原本打算留宿在這個鎮, 但在Booking.com只找到教堂對面的Hotel Stykkisholmur, 而只餘下一間平少少的房, 其它都是Euro150以上的房類, 所以索性住在其它地方及選擇最便宜又有獨立浴室的住宿, 最後選了Grundarfjordur鎮的四人Apartment, 離這鎮車程大約四十分鐘, 睇相見間Apartment就殘殘舊舊, 去到見到原來都好新好大, 不過有間房是碌架床, 不過無所謂, 另外間Apartment不在主樓, 是在海邊一座似貨倉的建築物, 大約五分鐘車程