2019年7月18日 星期四

【台北宜蘭自駕遊】Day2 見晴懷古步道

台北宜蘭自駕遊  見晴懷古步道

Day 2 - 9月26日  星期三  雨

行程: 五結鄉 - 冬山河親水公園 - 見晴懷古步道 - 太平山蹦蹦車站 - 天送埤火車站 - 三星青蔥文化館 - 金車威士忌酒廠 - 吉姆老爹啤酒工場 - 羅東夜市 - 五結鄉  148km

住宿: 旅樹Tree House (地下雙人客房, 包早餐, 每晚2600台幣)

宜蘭有一座跟香港同名的山, 都叫太平山, 但此山卻隱藏一條被選為世界最美步道之一的見晴懷古步道, 受它的稱號所吸引, 我們把它設為今天的主要遊覽點。民宿的早餐時段八點鐘開始, 出來時阿姐還未準備好, 先到外邊看看周圍環境, 民宿外有六個泊車位, 另對面馬路邊看似也可泊車
外邊種了台灣原生種紅藜麥, 原來台灣也有原生藜麥
鄰近的冬山河親水公園
園內設有個大型立體繩網迷宮
民宿早餐有十多款簡單菜式
肉類只有櫻桃鴨肉絲
其餘都是素菜, 當中有我最喜愛的菜脯煎蛋角
還有送粥配菜, 肉鬆、酸齋等等
時令水果
雖然食材簡單, 但每款都新鮮好味, 食後飽而不滯, 相比昨天的晚餐, 簡簡單單的食物更覺好味滿足
地瓜粥, 一碗唔夠要再Encore!
民宿內園是個池塘
我們所住的客房在地下中間的位置, 對正池塘
大約九點出發到大平山園家森林遊樂區的見晴懷古步道, 離民宿約七十公里, 車程超過一個半小時, 進入園區後, 天氣更差, 沿路好大霧
園區入場費每人200台幣, 過了收費亭不久, 先到達白嶺巨木, 它是一棵已經超過2500年的紅檜樹, 樹高30米
路邊不好泊車, 停車影相後繼續行程, 山勢越高, 霧氣越大
見晴步道入口處只有幾個停車位, 到達時已無位, 好彩等了一陣有車走, 如不想等位的話, 可泊在入口處一公里外另一個大停車場, 但我覺得太遠了
見晴懷古步道是昔日見晴線運材軌道, 因步道部份路段崩塌, 現僅開放九百米
步道路線圖, 可在網官下載清晰版本
步道就是昔日的鐵道, 基本上就是沿著路軌行, 今日濛濛細雨, 霧氣很重, 令四周環境更加有Feel
略為不便就是沿路都是水氹, 又要擔遮行
部分路軌有開始崩塌的跡象, 感覺有些少牙煙
首先到達的打卡位就是大轉彎路軌, 路軌位置因有崩塌跡象而封閉, 但沒有進行修葺, 反而另闢木橋改道而行, 維持路軌原味道
木橋有人數限制, 而在木橋上是欣賞這段路軌的最佳位置, 可以清楚看到架空了的大轉彎路軌
繼續行又有一段另闢木橋的路段
之後就到達另一個靚位, 一處由下而上欣賞舊路軌的位置, 不過當時人多, 先跳過, 回頭再玩
繼續前行一小段路就到鐵橋
鐵橋限制人數10人
再前行就到達玩味十足的吊橋, 旁邊建有小徑, 可以選擇行橋或走路, 當然選擇行橋, 霧氣大, 完全看不見橋下險不險, 反而擔遮行橋好玩, 大風一吹, 立時雙手擔遮, 人就跟著擺向橋邊, 即時心都離一離
過了吊橋後
原來仲有條更長的吊橋, 位置比第一條吊橋更當風, 兩人一齊行, 搖得好勁, 又風又雨又要顧著把遮, 好論盡, 同時亦好過隱
過了第二條吊橋, 就到達終點, 需要原路折返
霧大, 在第二吊橋上同樣看不見橋下景况
回程路上
補回之前跳過的路軌底下
除大轉彎外, 另一個靚景位
重溫兩處崩塌路軌
大轉彎位置
步道全長九百米, 途中停下影下相, 來回用了七十分鐘, 景色氣氛真不錯, 果然名不虛傳
本來打算行完步道後就返回宜蘭, 但出發時看到雜誌介紹太平山蹦蹦車今個月重開, 所以順道過去睇下, 泊車後, 還要一段行長路才可以到達車站, 當時大風大霧又有雨, 條路行得好辛苦
原來蹦蹦車站就在太平山莊一帶, 周圍環境好似阿里山。途中聽到響聲, 立即一口氣衝上車站, 好可惜蹦蹦車已經開走了, 無緣一見
車站觀景平台
太平山莊
上車站要走一條長梯級路, 兩旁樹木已經出了紅葉
到宜蘭一定要去食三星鄉名物三星蔥餅, 離開太平山森林遊樂區後, 就返去三星鄉搵食, 天送埤車站一帶有三間人氣三星蔥餅店, 順理成章把車駛去天送埤車站, 同時順遊這個停用的車站, 站內看似不可泊車, 剛好有管理員在, 原來站內可免費泊車, 然後開始搵食, 第一間係阿婆蔥油餅, 呢間嘅蔥餅類似細路時食過的上海蔥餅, 好有童年回憶
第二間係羅家蔥捲餅
三星葱特色係有長長葱白
羅家蔥捲餅類似酒樓的薄餐, 煎好後捲成捲餅
第三間係何家蔥餡餅, 做法是以麵團包裹三星葱餡再炸
三間舖都無坐位, 而天送埤車站環境好, 有長櫈休息, 所以返去車站開餐
咁啱附近種咗葱, 望著三星葱開餐應晒景
上面係羅家蔥捲餅(35台幣), 左下係何家蔥餡餅(35台幣), 右下係阿婆蔥油餅(30台幣), 三款都油油哋, 但幾好味, 各有特色, 難分高下 
天送埤站周邊景物
跟著去埋三星葱文化館
門外的三星葱裝飾
文化館內有各式各樣的三星鄉土產及三星葱產品
新鮮三星葱, 好想試下新鮮三星葱味道, 亦好想買返香港, 105台幣一大袋, 好抵, 葱白長度比旁邊的500ml樽裝水更長
仲有葱小子雪糕, 每杯50台幣, 可惜葱味太淡
館外的葱明小舖有不同口味的三星蔥餅, 跟剛剛食過的三款不同, 以手抓餅做法(40台幣), 葱餡極少, 味道平淡
天氣不好, 改到室內活動, 參觀金車威士忌酒廠, 呢度威士忌攞過獎架
酒廠面積好大, 環境幽靜
到一號廠房參觀釀酒過程
再去埋附近的吉姆老爹啤酒工場, 我好似有閱讀障礙, 成日讀咗粗口
內裡一邊是餐廳, 另一邊是工場
各式各樣的手工啤酒
仲有自家嘜頭啤酒杯買
有好多不同口味的手工啤酒
隨意選擇了三款小杯手工啤試試, 每杯50台幣, 當中一款大麥酒要收雙價100台幣
另加兩款小食送酒, 豬肩肉一口堡(150台幣)及水牛城辣雞翅(180台幣), 一口漢堡飽好味而水牛城辣雞翅就好唔掂
尾站去埋羅東夜市
可能已經好飽, 所以無乜嘢睇得上眼, 呢個炸波算係最好, 不過又係炸嘢, 都係算吧
昨日飲唔到北門綠豆牛奶沙冰, 見到芋頭牛奶(50台幣), 心思思想試下, 又驚會好溜, 最後見幾多人買, 就跟買, 都幾香芋頭味, 不過飲完就真係飽飽滯滯, 衰為食
無乜好選擇之下, 醒起正常鮮肉小湯包, 食少少係個好選擇, 可惜去到已經是日關門大吉, 白行一趟
最後以一芳果茶(共105台幣)來完結今日行程

上一篇: 台北宜蘭自駕遊 Day 1
下一篇: 台北宜蘭自駕遊 Day 3

2 則留言:

  1. 早餐好豐盛。
    加埋霧氣好有feel.
    吊橋上睇唔到下面無咁驚

    回覆刪除
  2. 早餐豐盛, 食完腸胃好舒服!見晴步道真係好正!我估吊橋下面無乜料到, 應該未到有驚嘅情度。

    回覆刪除