【火熱澳洲之旅】Day9 藍山一日遊

烏魯魯自駕遊及悉尼自由行  藍山一日遊

Day 9 - 4月1日  星期日  晴

行程: Central - 藍山Scenic World - Central

住宿: Meriton Suites Campbell Street (Studio Luxury Suite, 素泊, 四晚765澳元)

藍山國家公園附近的Scenic World是悉尼近郊最熱門旅遊地點, 可惜交通時間頗長, 單程超過兩小時, 加上復活節假期, 人多長車程令遊覽意慾大減, 唯有早點出門, 盡量避過人潮。出發前來個自製早餐

前往Scenic World最直接的交通方法是由Central坐火車到Katoombo, 再轉乘686號巴士, 星期日出發的話, 建議使用Opal卡付車資, 因為Opal卡於星期日有特別優惠, 全日車資上限為2.6澳元, 每人可慳近廿澳元交通費。為了趕上九點的巴士到Scenic World, 今早要坐六點二十四分的火車去Katoombo, 超級辛苦

到Katoomba站後, 步行至Carrington Hotel門前的巴士站, 轉乘686號巴士。巴士時間跟火車不太配合, 要呆等半小時, 後來出現一班不守秩序的印度人, 令情況亂七八糟, 相當討厭, 最後亦順利地迫上了九點鐘的巴士,  之後看到有巴士陸續來到, 應該是公眾假期的加班車

Scenic World內有三條景觀纜車線及一條叢林步道, 分別是Railway、Cableway、Skyway及Walkway, 即場門票每位43澳元, 可無限次乘搭樂園的纜車線。出發前看過官網的介紹, 但不夠詳盡, 就連地圖也沒有, 所以引用了網上常見的地圖作介紹。買票後, 職員會建議先坐Railway(紅線)到叢林行Walkway(綠線), 再坐Cableway(藍線)回到原點, 然後坐Skyway(黃線)到東站, 之後可選擇性行去Echo Point觀景台觀看藍山地標三姊妹石

Railway是現時斜度最大的火車, 傾斜角度達52度, 但全長只有310公尺, 如打算只玩一轉, 一定要選搭Railway落叢林, 才可體驗路軌的斜度

坐位設有三段斜度調節, 雖然火車速度稍慢, 刺激感大減, 但仍可感受路軌的斜度

Railway月台可看到三姊妹石

Railway的路軌長度好短, 一眼望晒, 從月台觀看火車落斜比坐在車內感覺更斜

離開月台就是Walkway的起點, 有長短路線選擇, 長路線都只係行廿分鐘左右

起點保留了昔日的礦坑及舊物

全段棧道都在叢林內, 景色變化不大

途中有一些藝術擺設, 感覺有點格格不入

流到爆嘅View of Katoomba Falls

途中幾個叫做較為特出的景物

步道終點是Cableway車站, 官網話纜車全長510公尺, 可乘載80人, 是全澳洲最陡峭的纜車

由上望落去, 纜車站幾乎隱藏在叢林之中

返回原點後, 立即去排Skyway, 官網話全程720公尺的Skyway, 擁有360度絕景, 遊客沿途可從高空俯瞰三姊妹石、Katoomba瀑布、及Jamison Valley, 不過車廂擠滿人, 毫無樂趣可言

到達Skyway東站後, 繼續沿cliff walk向Echo Point進發, 約二、三十分鐘步程, 東站外的景色

行出纜車站不久, 有個小觀景台, 雖然看不到三姊妹石, 但可以看到整個Jamison山谷景色

在這裡發現Scenic World與Skyway東站之間有另一個擠滿人的觀景台, 現在先去Echo Point, 留待回程再過去

途中有個位置勉强看到三姊妹石, 好多遊客已經急不及待爬出圍欄爭影相

中午時份Echo Point觀景台有好多人, 但遊客中心內更多人, 皆因大家都入去避暑買飲品

飲品價格沒有特別調高, 果汁汽水3.5澳元

Echo Point觀景台不但可以俯瞰Jamison山谷的開揚美景, 亦是觀看三姊妹石的最佳位置, 更重要是免費, 所以一車接一車的遊客不斷駕到

再繼續行就是最精彩的Three Sisters walk, 來回路程廿分鐘, 經Honeymoon Bridge踏足第一座三姊妹石

沿路景色

行到一半, 人龍已經出現, 梯級狹窄, 人亦太多, 要排隊慢慢行落去, 連接三姊妹石的Honeymoon Bridge亦企滿人等影相

望過去Echo Point全部都係人

繼續向下行是Giant Stairway, 印象中Giant Stairway好似有嘢睇, 所以繼續衝, 點知落極都有, 而周圍又無人行, 回頭又唔憤氣, 行完終於知道Giant Stairway只係行落谷底條路, 無嘢睇

沿路就只有這個景

回頭路, 上到氣咳, 在谷底遇到一班香港來的小學生遊學圑, 由Scenic World谷底行過來, 我哋覺得佢哋好幸福, 小學已經可以出國遊學

一小時後, 三姊妹石人龍依舊

遠處的Echo Point仍然擠滿遊人

唯一得著就係光線變為正光, 四周景物更清晰, 第一座三姊妹石

第二座三姊妹石

行返去Echo Point途中有個叫Spooners lookout

但Spooners lookout景色一般, 只睇到兩姊妹

返到Echo Point, 第一時間衝去買飲品, 所有汽水售罄, 剩低最貴的chill tea, 原來好多人都咁cheap, 兩支7.9澳元

Echo Point有兩個lookout, 上層叫Three sisters lookout而下層叫Queen Elizabeth lookout

之前浪費了不少時間, Skyway東站仲有個觀景台未行, 又想去坐多轉黃紅綠線, 要加快腳步了

Wollumai Lookout

今朝見到的觀景台就在Skyway東站背面

吓, 仲有咁多地方未去！

Katoomba Cascades

過了Katoomba Cascades, 原來就係影藍山纜車的經典位, 唔肯定呢度係唔係Reids Plateau Lookout

再行又要落長命斜

唔博啦, 放棄Katoomba Falls, 返去東站排Skyway

Skyway纜車中央位置做了個透明底部, 沿途可以欣賞山谷景色

Skyway上所看到的三姊妹景更為廣闊

返到Scenic world, 各款纜車仍然大排長龍, 突然醒覺686號巴士多數大排長龍, 都係早啲走人。Katoombo火車站周邊

今程火車非常多人, 好彩坐到最後兩個連位, 火車上有好多人要罰企兩個鐘

今晚去岩石區的Pancakes on the Rock食飯, 路過Circular Quay時, 準備影夜景之際, 突然爆咗幾發煙花, 咁流, 其實唔放仲好

去到Pancakes On the Rock已經九點多, 但仲要等十分鐘至有位

飲品Mango Tea及Lemon Tea, 各3.95澳元, 以極度肉酸膠杯上

Ribeye Steak味道一般, 32.5澳元

Barbeque Port Ribs, 39.95澳元, 唔掂, 骨肉分離, 肯定用水烚完, 再輕微grill幾吓

Hot 'N' Troppo, 16.75澳元, 自煮牛扒肯定好過呢餐多多聲

飯完再到碼頭曬月亮吹吹風, 完結疲累的一天！

上一篇: 烏魯魯自駕遊及悉尼自由行 Day 8
下一篇: 烏魯魯自駕遊及悉尼自由行 Day 10