駕世遊: 【一起葡過的假期~葡萄牙自駕遊】Day6 砵酒名城波圖

一起葡過的假期~葡萄牙自駕遊砵酒名城波圖

Day 6 - 6月12日星期一晴

行程: Guimaraes - Porto 79km

住宿: Douro Apartments - RiverTop (One-bedroom Apartment on 2nd floor with River View, 99歐, 泊車20歐一日)

Porto(波圖)為葡萄牙第二大城市, 有幾個主要景點集中在Douro River(多羅河)兩岸, 分別有座落在北岸的舊城區Ribeira, 南岸的酒莊區, 及地標建築Ponte Luis I(路易一世大橋), 其部分區域又被列入世界文化遺產, 更重要是河岸一帶環境優美, 因而成為遊客們的集中地, 所以在波圖兩天時間裡, 我們選擇住在Ribeira之內, 方便隨時隨地欣賞波圖美景

今日先由大滿足早餐掀幕, 用餐區對著旅館的後花園

早餐食啲乜? Check in時職員已經俾比咗早餐紙我們揀食物, 仲話如果紙上無嘅都可以盡力安排, 我們隨意tick咗餐紙上約四份一嘅食物, 先有Egg Benedict

一份鬆餅

兩兜新鮮嘅麵包, 本來以為會似英式早餐咁一碟上, 知點每款食物不斷續碟上, 份量又多, 放滿全枱, 食物又有水準, 唔想嘥嘢, 最後硬著頭皮全部食晒!

仲有一大樽鮮榨橙汁, 太好飲, 乾埋去, 最後頂到上喉嚨!

走之前要出去消化下, 酒店外觀

呢個係入旅館嘅路口, 尋日升咗條鐵柱封著條路, 所以睇漏眼搵唔到入口

散步時隨影

Praça da Oliveira(奧利維拉廣場), 左邊係Restaurant Buxa

出發到波圖前, 揸車去埋附近嘅Castelo de Guimarães(吉馬良斯城堡), 城堡外有個免費爛地停車場, 有個吉卜賽女人示意幫我們看車, 心諗總好過偷呃拐騙, 就俾咗1歐佢幫忙看車

城堡入場費每位2歐, 撞正有小學團參觀

城堡內隨影

裡面有個室內展館介紹城堡歷史

跟埋小學團去睇Church of Sao Miguel do Castle

再去埋Palace of the Dukes of Braganza嘅門口睇下, 就出發去波圖

旅行前已經跟公寓職員以電郵確定泊車安排, 地點在Jardim do Infante Dom Henrique(亨利王子廣場)的地下停車場, 位於Riberia背後, 算係最近的停車場。到達波圖把車泊好後, 跟職員聯絡, 約了兩點在公寓大樓等侯, 先沿多羅河畔睇下, 順便搵埋公寓實際位置。行出地下停車場就是亨利王子廣場

旁邊是Palácio da Bolsa(證券交易所)

廣場中央樹立了Monumento ao Infante Dom Henrique(亨利王子紀念像)

雖然經過呢座紅色建築物幾次, 但係始終無入過去, 估計係商場之類

市內電車

由廣場過馬路行落河邊就係舊城區Ribeira

沿河畔向路易一世大橋方向行, 去到個大地及碼頭就係Praça da Ribeira(里貝拉廣場), 亦係Ribeira最熱鬧地方, 附近區域就係世界文化遺產

對出係Ribeira碼頭, 船河團及水上的士都會喺度上落客, 連接南北兩岸嘅鐵橋就係波圖地標Ponte Luis I(路易一世大橋), 對岸是酒莊區

沿著河畔, 佈滿餐廳食市, 旁邊一幢幢七彩舊樓房係Ribeira嘅特色, 令整個舊區增添不少活力

行到尾就係路易一世大橋, 橋分上下兩層, 上層行輕鐵, 下層行汽車, 而行人就兩層都可以使用

時間尚早, 決定先去Majestic Cafe食個輕食, 因為中午實在太熱, 行斜路去市中心太辛苦同伴, 而大橋入口對面就係纜車站Funicular Of Guindais, 所以坐纜車去Batalha區, 每位要2.5歐

全程坐唔夠五分鐘就到站, 唔抵搭, 車站出來就係City Tour電車總站

途中經過Praça da Batalha(戰鬥廣場)前的Igreja Paroquial de Santo Ildefonso(聖伊爾德豐索教堂), 被外牆的巨型藍白繪畫瓷磚所吸引, 在藍天襯托下特別靚, 可惜今日教堂無開, 無得參觀

擁有近百年歷史的Majestic Cafe, 午餐時間, 全店滿坐, 要等近十五分鐘先有位

Majestic Cafe被喻為歐洲十大最美咖啡店, 亦係羅琳寫作時打疐地方, 店內保留原有的裝潢

店內所用的原木真皮座椅

相比捷克嘅Cafe Imperial, 我覺得Cafe Imperial更靚更有歷史味道, 咖啡店靚唔靚都係因人而異, 但食物就肯定係一般級數, 今日太熱又飽飽滯滯, 所以只係點咗Chocolate Cake, 5歐

Naif Cup - Chocolate, vanilla ice-cream and whipped cream, 6歐

Coffee with whipped cream, 5歐及Cafe au Lait 4.5歐, 整體上呢餐得個貴字

時間比預算遲晒, 又想去埋Livraria Lello書店買入場券, 要緊急通知公寓職員改到三點攞房, 路過Câmara Municipal do Porto(波圖市政廳)

Café Guarany又係一間咖啡老店, 安排了明天食早餐

Livraria Lello書店, 入店費四歐, 千奇唔好似為我哋鐘意讀書到要俾錢都要去, 而係書店被喻為世界最美書店之一, 又俾呢味嘢氹咗入場

打算明天一早入店參觀, 所以先去打聽可否預售明日門票, 售票處在另一間商店購買, 預售及即日票都係4歐一位

到咗約定時間, 公寓職員原來係個哥仔, 蕉咗個C朗髮型, 即係踢完全場波都唔會亂嗰隻, SaSa滾嗰類, 幾型仔健談, 先來介紹下公寓及講解停車場泊車, 20歐泊24小時, 40歐換咗2張24小時的泊車証, 用來出車計時間之用。今明兩日所住的公寓比期望好得多, 樓房有電梯, 不過先要行上半層, 公寓在二樓, 一廳一房間格, 稱得上寬敞整潔, 不過係全程唯一無冷氣嘅住宿, 之前好擔心會好熱, 可能樓房用花崗岩建造, 所以幾涼快, 唔覺太熱, 似開咗少少冷氣咁

睡房

浴室

最重要係個景, 廳房各有一個小露台, 個景同相片一樣, 合乎預期, 非常滿意, 正望酒莊區

斜望路易一世大橋

手機全景相

公寓內備有波圖觀光地圖, 唔駛再去遊客中心

今日再無乜特定安排, 午睡後再次出動到河畔兩岸閒遊, 河畔的七彩舊樓房, 每間屋的窗户都好整齊無雜物, 似乎大部分都轉做遊客生意

北岸的酒莊區及Mosteiro da Serra do Pilar修道院

路易一世大橋由巴黎鐵塔設計師的徒弟Teófilo Seyrig所設計, 所以大家都話大橋似巴黎鐵塔

相中的梯級路係行上Batalha站或者大橋上層, 大約十層樓高, 覺得行樓梯辛苦, 左邊亦有纜車搭上去

路易一世大橋將南北兩岸連接起來, 行人可以由大橋上、下層行過對岸

南岸河畔可以睇晒全個舊城區Ribeira

沿河岸除咗酒莊, 亦有不多流動攤檔售賣手工藝品, 而河邊更植有草地, 相比北岸, 呢邊令人感覺愜意游閒

波圖以砵酒馳名於世, 密佈酒莊的南岸一般都有導賞團, Calem是其中一間老牌酒莊, 佢嘅導賞團除咗參觀酒窖及試酒外, 仲有國技Fado(法朶)表演, 一雞兩味, 既然路過Calem就先參加導賞團, 但今日full晒, 佢地只賣即日飛亦不設預訂, 叫人明天請早!

另一間老牌酒莊, Sandeman斗篷酒莊, 屋頂有個黑斗篷人招牌好易認, 可惜導賞團無Fado表演, 無晒興趣

沿路插咗各家酒莊招牌, 而沿海就泊有酒莊嘅船

過咗Sandeman酒莊無耐, 就是吊車站Teleférico de Gaia, 吊車行走南岸碼頭與大橋頂之間, 纜車一程收6歐一位, 都幾劏客

但係叫做可以從另一角度欣賞波圖, 上車前會影返張相, 落車時再sell人買相, 5歐跟一張相及波圖磁貼, 見張相影得唔錯, 價錢唔貴, 就破例買咗

呢邊吊車站出口通往路易一世大橋上層

橋嘅上層只行輕鐵, 無車時可以行出路軌

吊車站出口亦好接近另一世界文化遣產Mosteiro da Serra do Pilar修道院, 行一段上斜路就到修道院, 不過修道院唔知今日係無開定收咗, 總之摸門釘

修道院對出的平台係觀賞波圖全個舊城區及日落嘅最佳位置

離日落尚有一段時間, 都係唔等, 決定邊行邊睇行去Estação de São Bento(聖本篤火車站), 再轉搭火車去Campanha食晚飯。從大橋望返修道院, 喺光線配合下, 景色非常美麗

大橋上層的電車路

波圖舊城區全景

多羅河上流方向的景色

大橋南端盡頭接近城牆遺趾, 旁邊係中午乘坐過的纜車

城牆遺趾

Sé do Porto波圖主教座堂

Estação de São Bento(聖本篤火車站)

火車站一帶的建築群

連街上石頭都好有葡國特式

聖本篤火車站嘅精彩之處係站內的繪畫瓷磚

牆身舖上數以萬計的繪畫瓷磚, 每塊瓷磚畫功細徵, 非常精彩, 令車站充滿葡國特色, 絕對不能錯過的車站

今晚食飯地方要搭一個站去Campanha, 到售票處買飛時, 職員不斷用葡語, 後來又加少少英語, 當然唔太明, 估佢叫我去售票機買飛, 正當無語之際, 佢又打咗兩張票比我, 其後估佢應該叫我去買張Porto card再自己Top up, Porto card加一程火車去Campanha, 每人1.9歐