【意大利多羅米提山區自駕遊】Day1 Sunnseitnweg-Panoramaweg

意大利北部山區自駕遊  Sunnseitnweg-Panoramaweg

Day 1 - 6月13日  星期四  晴

行程: 意大利米蘭國際機場 - St. Maddalena - St. Pietro - St. Maddalena  370km

住宿: Haus Tannenburg (One-Bedroom Apartment with Mountain View, 連稅每晚82.1歐)

有据齒山之稱的Odlegruppa(Geisler group)是意大利多羅米提著名山脈之一, 也是吸引我們計劃到此區旅行最大原因, 今趙旅程亦由這裡開始, 網上大家都推St. Maddalena為遊覽Odlegruppa的最佳據點, 所以St. Maddalena的住宿相當爆, 六至八月為旺季, 很多熱門民宿及旅館, 最低要求要住三晚或以上, 因此旅程第一站就安排住在St. Maddalena三晚, 期間計劃行三條遠足徑, 分別是Sunnseitnweg-Panoramaweg, Adolf Munkel Trail及Malga Zannes - Rifugio Genova - Kreuzjoch/Forcella S. Zenon。今晚坐零晨機直航飛米蘭, 登機前例牌食個免費餐

預定航班(01:05-07:30), 時間到了仍遲遲未能登機, 國泰職員一貫慢吞吞作風, 然後才廣播空管, 航班延遲, 最後遲了個半小時起飛！

機上的晚餐

及早餐

原定早上七點半抵達米蘭, 結果遲了一個鐘有多, 入境時似有飛機剛抵達, 非歐盟護照的關口排了長長的人龍, 但只開放幾個關口, 心想可能要排很久, 其後持美國護照分了出來, 日本人分出來, 關員又突然盲做, 加速放人入境, 最後不到半個鐘就過了關。入境後, 第一時間去租車公司登記攞車, 雖然無客人, 但係又要等, 似乎未有合適車輛, 職員不停打電話, 又叫同事出去搵車, 搞了半個鐘終於可以攞車, 架車內外有啲污糟, 似係架剛還的車, 未完全清潔, 不過係我想要的車款Audi A3, 又有GPS, 可以收貨！

然後又要去搵電話卡, 原本打算買TIM電話卡, 但在入境及出境大堂都找不到任何電訊店, 最後只能在找換店買到Vodafone上網卡, 價錢50歐, 包30多Gb數據流量及一些通話時間, 附送一張價值4.5歐米蘭一日交通卡, 打開包裝後發現內含兩張電話卡, 可供兩機同時使用, 咁就唔算太貴

搞到十一點依然未能上網, 唯有用著車內的GPS, 開車出發由米蘭去多羅米提區, 途中因塞車情況, GPS更改了路線, 結果經過四次收費站, 總收費為32.40歐, 收費站分有Telepass, self-service及人手收費, 如果要用人手收費站, 就揀有人頭公仔及人手的收費亭, 而自助收費機可接受紙幣及硬幣, 並自動找續

沿途高速公路的車不多, 公路上亦設有休息站

最終用了四個半小時到達民宿, 比預計一點前到達, 遲了近三個鐘, 連食晏時間都無埋, 我們到達時, 民宿女主人正在門外打理花草, 佢唔太識英文, 帶我們上二樓單位及作簡單介紹, 而佢個仔就住在地下, 有事可以找他

睡房及浴室幾濶落, 而且好新淨, 似翻新後不久

反而客廳的新凈度一般, 可能受梳化影響

客廳窗外的景色, 面向据齒山, 因為窗前有屋簷, 要坐低先可以看到窗外山景, 而簾篷下面就是自家停車位

房外有個長露台, 連接客廳與睡房, 整體上民宿新淨企理, 景觀亦不錯, 以80歐價錢, 幾抵住, 美中不足就是沒有早餐供應

民宿還提供了一星期的交通咭, 可以免費乘搭市內巴士, 因為無計劃坐巴士, 所以沒有留心其優惠, 直到臨走前一晚, 才看到優惠包括Malga Zannes的停車場, 可以由6歐減至2歐, 我們還在這個停車場連續泊了2天, 除此以外, 持交通咭還可免費乘搭指定登山纜車及吊車

為爭取失去的時間, 攞房後立即揸車去St. Pietro的超市補充物資, 及買麵包飲品作為簡單的午餐

下午五點, 終於可以開始今天計劃行的路線Sunnseitnweg-Panoramaweg, 這條路徑是圍繞St. Maddalena及St. Pietro兩個村莊之間的循環路線, 在Maddalena一邊的盡頭就是觀看這裡最具代表性的畫面, 据齒山及Maddalena村莊的最佳位置, 所以路線名叫Panoramaweg(Panoramic trail), 如由Maddalena村莊入口開始行, 約二十分鐘就能到達, 非常方便。據官網資料, Sunnseitnweg-Panoramaweg路線全長6.6公里, 屬容易級別, 約需2小時十分, 圖中藍線是其路線, 上路是Panoramaweg而下路是Sunnseitnweg。計劃由St. Maddalena村莊行去最右邊的位置, 然後經Panoramaweg(上路)行去St. Pietro, 再行Sunnseitnweg(下路)返回民宿

依Google Map指示, 由民宿起步, 行上一條街已經穿過村莊主屋群, 進入Magdalenaweg路後, 眼前景色變為翠綠山坡

沿Magdalenaweg往上行, 兩旁全是翠綠草地, 而且非常乾淨, 就係飄零燕海迪通山走果種草地, 隨時可以坐低訓低攤抖

向上行一段路後才有指示牌, Sunnseitnweg以太陽圖案標示, 跳過Sunnseitnweg路口, 繼續沿Magdalenaweg向前走

漸漸地隱若看到Santa Maddalena教堂在右手邊出現

之後的第一個分义路口, 右行是前往Santa Maddalena教堂, 左行即有指示牌往Panoramaweg並以据齒山剪影圖案標示

期待以久的Odlegruppa据齒山及Santa Maddalena教堂慢慢浮現眼前

沿路約有三處位置設有長木櫈給人欣賞這個明信片般的靚景, 第一個位置最低, 稍被前排樹木遮擋

繼續往上行, 到達農莊(Lippenhof Magdalenaweg)後, 再沿路往右走

地勢更高更開揚

來到大樹下的長木櫈位置就是今日計劃的起點, 即是Panoramaweg於Maddalena的最邊端位置。雖然St. Maddalena的住宿非常爆滿, 但村內外卻不見太多遊客, 沿路只遇到十多人, 以韓人及泰人為主, 眼前所見他們都在這裡回頭

從這裡開始行山路, 行大約五分鐘斜路就到達第三張長木櫈位置, 亦是全程最高點

全段路以這個位置最好

之後山路主要在樹林中, 而且不太好行

偶然可以看到少許据齒山景, 其中一處可同時看到山景及Maddalena的兩座教堂

沿中經過一個路口可以轉落去Sunnseitnweg, 所以決定提早回程

之然轉落去行Sunnseitnweg, 回程返Maddalena, 沿路景風

途中又會經過一些民房

又有山水供飲用

亦會經過一間民宿, 周圍好有心機佈置了不少裝飾

最尾段竟然無路行, 要沿欄杆行返去開始時經過的農莊(Lippenhof Magdalenaweg)

農莊(Lippenhof Magdalenaweg)

回程時, 順路去埋Chiesa di Santa Maddalena教堂

教堂好似屬於私人擁有的

所以只係外圍睇下

綠線是今日所行的路線, 藍星是長木椅位置, 紅線是行去Chiesa di Santa Maddalena教堂的路

今晚決定食好啲, 揀了村內最好的酒店Hotel Tyrol食晚餐, 每位30歐元, 四道菜, 飲品另計, 亦可以選擇四選三或四選二, 今日無食午餐, 豪啲食四道菜

自助沙律, 尾水關係, 沙律吧只剩低餸頭餸尾

啤酒兩杯, 共9歐元

第二道菜, 三選二, 揀了果汁Peach and passionfurit drink及Carrot - ginger cream soup

主菜三選二, 揀了Tender saddle of veal with herb crust, 細細份

而"Millefoglie" eggplant就真係得兩件好細嘅eggplant

甜品就要Tiramisu, 呢餐以酒店級數就唔貴, 但味道只係一般亦唔抵食

酒店外觀及周邊景色

食飯時見在整座据齒山染紅晒, 好靚, 可惜影唔到, 諗著仲有兩晚機會, 唔駛急, 因為天氣預報, 未來兩天繼續好天, 可惜天氣話變就變！

今日雖然有啲阻滯, 但總算可以完成行程, 返到民宿仲見到少少晚霞

上一篇: 意大利多羅米提山區自駕遊 行程篇
下一篇: 意大利多羅米提山區自駕遊 Day 2