【意大利多羅米提山區自駕遊】Day2 Adolf Munkel Trail

意大利北部山區自駕遊  Adolf Munkel Trail

Day 2 - 6月14日  星期五  晴

行程: St. Maddalena - Adolf Munkel Trail - Saint John in Ranui - Bressanone Brixen - St. Maddalena  69km

住宿: Haus Tannenburg (One-Bedroom Apartment with Mountain View, 連稅每晚82.1歐)

Villnoss(富內斯)一帶有好多遠足路線, 當中以Adolf-Munkel-Weg最為出名, 原因是這條遠足徑的中段會經過山屋Geisleralm, 山屋座落在山上一個小平原, 周圍環境不單止勁靚, 仲擁有近距離据齒山(Odlegruppa)的無敵靚景。Villnoss的官網介紹了這條路線的兩個行法, 第一個行走全程, 由Zanser Alm停車場開始, 順序行6及35到山屋Geisleralm, 再到山屋Malga Brogles, 然後行28號線去到Maddalena的Ranui教堂, 全程13公里, 約行四個半小時。第二個以環迴路線行法, 同樣由Zanser Alm停車場開始,  順序行6及35到山屋Geisleralm, 然後行36號線經山屋Malga Dusler返回Zanser Alm停車場, 全程9公里, 約行三小時, 相對較適合自駕人仕, 所以我們揀了第二個行法, 路線圖如下

昨天在超市所買的簡單早餐, 另有水果留作行山時的補給

由民宿揸車到停車場Zanser Alm, 需時大約十幾分鐘, 停車場入口有收費亭, 因為當時無人, 直接駛過, 諗著泊車後再算

入到停車場, 車都未泊好, 有個阿伯唔知係邊到走出來, 向我們收錢, 我話自己出去買飛, 佢話比佢就可以, 跟手開咗張手寫飛

之後到入口巡下, 現在寫遊記時才見到收費亭亦有標示用交通卡可減至2歐

停車場附近的餐廳Treffpunkt Zans

餐廳旁邊有間好似遊客中心的建築物, 不過未開門, 只能隔著玻璃影, 諗著稍後再來, 不過最後又無咗件事！

呢度有好多不同路線, 而最經典的Adolf Munkel Trail就有獨立看版介紹

周圍八掛下, 攪咗大半個鐘後, 於在九點前起步, 首先沿6號線的Sass Regais方向開始, 好快就到Sass Regais民宿, 當時經過民宿感覺好荒涼, 落晒閘好似無做, 後來返到香港再査, 証實結業了

民宿斜對面有間山屋, 對著無敵個靚景, 呢度山屋多數做埋餐廳, 而門外一定掛著刻有山屋名及高度嘅寶號牌, 呢間山屋叫Zanser Schwaige, 標高1685m, 不過已經係六月中, 仲未開始營業

過了民宿後, 依然繼續行碎石路, 沿路景觀都被大樹遮擋, 絕大多數時間都係無景, 唔太好行, 仲要全程上斜, 都幾悶幾辛苦, 好偶然才會見到据齒山

沿路的河流及碎石路

挨了半個鐘完成6號線, 來到分义路口就開始見到有Adolf Munkel Trail路牌, 在這裡要轉入35號線, 最初看路牌時會感覺很亂, 同一路線, 有不同方向的指示, 但只要知道每條路線的山屋就是中途站, 路牌上都以路線編號及山屋作為方向指示, 只要緊記所編的路線及沿途要經過的山屋, 習慣後就不覺太亂。我們下一個中途站是山屋Geisleralm, 所以跟第五個指示牌行

轉入35號線後, 景觀變為開陽, 亦有休息設施

同時又在最好位置設有長櫈, 俾人坐定定同靚景合照

35號線的路是正常山路, 比前一段好行得多

好快見到第一個水源, 雖然無列明, 但估計可以飲用

除分义路口設有路牌外, 沿路樹上亦劃有路線編號

在35號線上大約要行個半小時, 頭半段路有兩個地方值得停低, 第一個停點在通住Klettergarten的分义路口附近, 而第二個停點就在GeiBiergruppe附近

第一個停點可以見到据齒山近距離呈現眼前, 我哋亦跟山友剷入碎石坡影相

靚位如常設有長櫈休息, 可慢慢欣賞景色

行咗一小段通住Klettergarten的掘頭路, 見景觀分別不大就回頭

第二個停點在GeiBiergruppe附近, 呢度有個Adolf Munkel Trail記念牌

仲有棵好似由石頭爆出來的巨樹

影完相就順便休息, 食下生果

繼續沿35號線行, 呢度開始標示有啲亂, 要跟石上標示及黄黑標誌杆行, 順帶補充全段路只有極少量位置收到數據及電話訊號, 但GPS就幾乎全段收到, 可以不時睇住有無行錯方向

又見另一個水源

在35號線上會遇到兩次36號線的分义口, 跳過第一個36號路口, 繼續跟35號線及山屋Geisleralm方向行

直至去到第二個36號線的分义口才轉行36號線, 沿路好少山友, 所以要用電話GPS再確定位置正確, 以防行錯

見到一個大平原就是最後大直路

正午前, 山屋終於出現眼前

立即入去揀個陰凉位坐低叫嘢食, 先叫兩杯可樂(每杯4歐)及芝士蛋糕(3.2歐), 可樂無冰, 有啲失望, 但山旮旯地方有得飲有得食, 已經好正仲想點

餐牌以輕食為主, 最後點了甜食及鹹食各一, Cut up and sugared pancake with cranberry jam (8歐)

Sausage with bread (4.5歐)

雖然唔係乜嘢美食, 但在山野間又被美景包圍下, 非常滿足

食飽飽出去影下山屋, 呢間山屋係Gschnagenhardt Alm, 標高2006m, 吓！點解唔係Geisleralm？原來係我哋衰心急, 一見到山屋就衝入去, 應該係再前一間先啱, 唔怪得menu同印象中有出入

午餐期間, 疑似老闆仲走出來同每枱客傾下, 然後再表演手風琴

其實呢間山屋外觀都幾靚, 有個大陽台, 一邊有少許遊樂設備, 另一邊就設有躺椅, 餐後可以來個日光浴

四周被群山所包圍, 風景好靚, 加埋些少原始遊樂設備, 比端士山區環境, 更似飄零燕所住的山區

當然要去躺椅抖下及打下卡

離開Gschnagenhardt Alm, 再向前行就係Geisleralm

山屋Geisleralm, 標高1996m, 山屋範圍比較前一間大好多, Menu仲有正餐食物選擇

旁邊遊樂場亦都好大, 又有小童版zipline玩

另一邊山坡, 遠望好似有多好人, 睇真啲原來係長長一排嘅人形木雕像

盡顯心機嘅佈置

山坡上仲有好多不同款式木雕躺椅, 從高處所看到的環境

据齒山脈各個山峰的名稱

停留咗兩個鐘左右, 又係時候繼續行程, 沿36號線落山, 經山屋Malga Dusler返回Zanser Alm停車場, 行過開始的木橋路後, 要挨一段爛路及指示不清楚的路段, 要不時用電話GPS確認位置

之後開始見到清楚路牌

山屋Dusler Alm, 標高1800m, 呢間山屋好慘, 地理位置唔好, 完全無生意

尚有20分鐘就可以返回停車場Zanser Alm

今日所行的路線圖, 九點開始, 約三點返回停車場, 整體難度我覺得屬中級

跟著順便去埋村內的地標教堂Church of Saint John in Ranui, 入面泊車要錢, 所以將車泊在街口的免費停車場, 再行入去, 約行五分鐘

教堂外嘅圍欄仲設置咗幾個相機託位給人影景

對面山坡上的民宿, 可以遠望教堂靚景

教堂屬私人地方, 但可經特設入口到教堂外參觀

周圍環境

Church of Saint John in Ranui

教堂沒有開放, 門上寫有建造年份

路旁設有自助售賣果醬車仔

教堂附近有幾個收費停車位

離開教堂, 仲有時間, 揸車去20公里外的Brixen舊城區行下

市內地圖

舊城內

地標教堂Duomo di Bressanone, 今晚有活動, 正門前放滿餐枱

城內隨影

Torre Bianca

城門

搵唔到啱地方食晚餐, 行完超市後去埋火車站, 買定由威尼斯到維羅納及米蘭火車票就走人

晚餐去咗在San Pietro的Viel Nois食飯, 門口企滿人飲酒

一杯生啤加一支無酒精啤酒, 共7歐

身處意大利, 當然要試Pizza及意粉, 所以點咗一個Pizza of the week (9歐), 味道無特別

意粉點咗個Spaghetti of Today (11.5歐), 成個咖喱味嘅中式炒麵咁, 完全唔掂, 以為Pizza意粉無得輸, 事實係無絕對！

最後一個節目係返去Sass Rigais睇下有沒有昨晚錯過咗嘅日落金光

結果夕陽被雲遮了, 今晚無日落金光

上一篇: 意大利多羅米提山區自駕遊 Day 1
下一篇: 意大利多羅米提山區自駕遊 Day 3