【一起葡過的假期~葡萄牙自駕遊】Day7 喜愛波圖

一起葡過的假期~葡萄牙自駕遊  喜愛波圖

Day 7 - 6月13日  星期二  大致天晴

行程: Porto  0km

住宿: Douro Apartments - RiverTop (One-bedroom Apartment on 2nd floor with River View, 99歐, 泊車20歐一日)

波圖晚上氣溫比預期涼快, 無冷氣下都訓得舒服。一覺醒來, 外面矇矓一片, 原來是落雨, 心諗好天日子已經過去, 輪到落雨天了, 好彩第一站係參觀Livraria Lello(萊羅書店), 落雨都不太影響, 出動前飲杯朱古力頂下肚, 晏些少再去食早餐

今日行程鬆動, 除萊羅書店外, 打算一定會去睇有兩座藍磚教堂、牧師塔、傳統市場及主教座堂, 其他就視乎情況而定。未夠八點出動, 外面依然落著雨, 今日由亨利王子廣場行上市中心, 呢邊有部分石板路好斜, 在濕滑石板路上斜, 一定要好小心, 否則隨時跣到灘灘腰。未到九點到達萊羅書店, 之前睇過網上資料話九至十入場方可影相, 十點後就禁止影相, 買飛時已經確定十點開門, 但驚被老點, 都係九點前去睇睇, 現場所見, 店外得我哋兩丁友, 以及清潔工在打掃, 無跡象十點前開門, 查實由2017年開始, 書店十點才開始營業, 無分影相時段, 改為全日任影, 搵真銀!

入場前先去食個早餐, 沿路隨影, 天色依然烏雲密佈

Café Guarany另一間咖啡老店, 相片係昨日路過影低

點了Cappuccino, 2.65歐, Milk Coffee, 1.6歐及兩件葡撻, 每件1歐, 食物咖啡只係一般, 葡撻唔熱已經輸晒, 叫做唔難食

萊羅書店被Lonely Planet評為全球十大最美書店第三位, 除了古老而聞名外, 亦因為哈利波特的作者羅琳居住波圖時, 經常來構思創作的地方。書店準時十點開門, 而九點四十五分開始售票, 每位四歐

好彩預早買了飛, 做到第一個衝入書店, 店內最具特色就是中央位置的紅色樓梯, 可惜有幾個員工企正正响隔離。樓梯以實木打造, 配合木製天花板的精細雕飾, 望上去的確華麗典雅

書店有兩層, 二樓是這樣的

可以清楚睇到全條曲線弧形樓梯的形態

天花板的彩繪玻璃, 將陽光滲入室內, 令書店顯得更加迷人

曲線弧形樓梯始終都是大家的焦點, 各人都排隊等影合照, 加上人群不停左穿右插, 眼見龍友們等到頭擰擰, 只能隨意影幾張就算

從二樓望落地下, 有條唔知有乜用嘅路軌

天花板的雕飾

臨走前, 再等下影多幾張樓梯正面相

行出萊羅書店, 好似由隨意門返出來咁, 環境天色完全改變了, 烏雲變回藍天, 補返張書店外觀

門外的金屬牌有萊羅書店的簡介

萊羅書店位於聖本篤火車站西面, 附近還有Igreja do Carmo及牧師塔, 適合一併遊覽。先去Igreja do Carmo, 原來是兩座相連教堂, 左右分別是Igreja dos Carmelitas Descalços和Igreja do Carmo

主角是Igreja do Carmo右邊的牆身, 以藍白繪畫瓷磚覆蓋整幅牆身, 令人眼前為之一亮

之前的遊記提過, 葡萄牙的重要景點都樹立了相中的金屬牌作簡介, 對遊客方便之餘, 我亦可以寫少幾句簡介, 原來教堂是世界文化遺產

旁邊的Igreja dos Carmelitas Descalços亦是世界文化遺產

圍繞著廣場有相連教堂外

還有波圖大學, 外觀完全唔覺

Café D'ouro位於波圖大學旁邊的老店, 雜誌介紹有時間可以停低試下波圖獨有的Caldo Verde(椰菜湯), 一款普通而地道的菜湯

行多三、兩分鐘就是Torre dos Clérigos(牧師塔), 又叫波圖觀光塔

跟教堂Igreja dos Clérigos相連一起

教堂及觀光塔的門票, 每位4歐

資料顯示觀光塔高76米, 登頂要行240級梯級, 唔算辛苦, 但中段開始梯間非常狹窄, 同時有人上落會好勉强, 塔頂通道同樣狹窄, 稍為有人已經舉步維艱。眼前所見, 觀光塔似是市內最高建築物, 景觀開揚, 以順時針行一轉, 中間位置是聖本篤火車站

面向多羅河的景色

波圖大學

塔頂景觀很一般, 稍為有人已經非常擠迫, 睇完又要辛苦迫落樓, 唔上好過上

門票包括參觀展館及教堂

觀光塔旁的街道(R. Campo dos Mártires da Pátria), 有間買沙甸魚罐頭店幾特別

罐頭以年份來包裝沙甸魚, 年份由1910年至2017年

旁邊有間好多人的炸馬介休店, 睇真啲係Casa Portuguesa do Pastel de Bacalhau, 原本是計劃在里斯本食, 既然波圖有分店, 擇日不如撞日, 就今日食咗先

炸馬介休球配白酒, 8.5歐, 件炸馬介休球好香, 不過中間包著嗰舊芝士好騷, 唔啱我口味

行完火車站西面的景點, 又到午餐時間, 目的地是市政廳附近的Conga餐廳

行去Conga的路上, 又停了幾個地方, 包括參觀過的Estação de São Bento(聖本篤火車站), 內裡依然人頭湧湧

火車站對開的Igreja dos Congregados

波圖麥當奴

Câmara Municipal do Porto(波圖市政廳)

邊行邊睇, 終於到達雜誌介紹的Conga, 佢係波圖公認最好味的豬扒包店

波圖豬扒包叫Bifana, 同澳門豬扒包不同, 佢唔係夾豬扒, 而係用一堆辣味豬肉片, 所以豬肉唔覺鞋, 少少辣, 麵包外脆內軟, 真係幾好味, 不過個包超細, 當正餐食, 打孖上都未必夠, 因為仲有一餐要食, 所以一人食一個就算, 價錢每個2歐, 啤酒, 2.1歐, 可樂, 1.3歐

食完抖完又行過, 位於市政廳背後的Igreja dos Trindade

Bolhão地鐵站附近的傳統市場Mercado do Bolhão, 裡面感覺似東南亞的市場

海鮮檔必定有得買的兩種海產, 鬼爪螺及沙甸魚

見到一間餐廳廣告有款好吸引的燒乳豬包, 可惜搵唔到間舖

市場內有好多手信店, 有各式各樣的瓷磚圖案磁貼, 最平五歐五個, 見有Porto嘜頭, 我都要買返五個

傳統市場入口前的古老葡國雜貨店

Bolhão地鐵站

跟著係另一間重點藍磚教堂Capela Das Almas(聖靈教堂)

相比今早睇過的Igreja do Carmo, 聖靈教堂的瓷磚舖得更徹底, 正面和側面的外牆都舖上藍白瓷磚繪畫, 給人更大視覺震撼, 精彩程度無法表達, 我呆企咗近半個鐘先影到一幅較少人的相片

罰企完畢, 去附近Cafe Santiago食另一款波圖名物Francesinha(葡式三文治), 餐廳曾被選為最佳波圖三文治餐廳

點了一份Francesinha Santiago, 9.5歐, 可樂, 1.5歐及檸檬茶, 1.4歐

Francesinha麵包內放入火腿、雞蛋、芝士、牛扒等, 表面又鋪滿芝士片, 加上醬汁, 一人一份絕對會食到漏, 一份share食就啱啱好, 好味值得試下

食飽之後, 決定行埋波圖主教座堂就返去休息, 邊行邊睇, 經過幾個無乜睇頭的景點, 有Jardim de Marques de Oliverira

Convento de Santo Antonio Da Cidade

Igreja Paroquial de Santo Ildefonso(聖伊爾德豐索教堂), 今日有開, 順便入內參觀

行程內的最後景點Sé do Porto(波圖主教座堂)

教堂側邊是Paco Episcopal(波圖主教宮)

Pilloyr of Porto

Sé do Porto全景

Torre da rua de D. Pedro Pitões, 又係遊客中心

外形好似大三巴的Igreja dos Grilos

之後走入舊區橫街小巷, 尋找波圖本地名牌肥皂店Claus, 售價只比香港略平

原來肥皂店的街道Rua Das Flores(花街)都薄有名氣

花街入口有Igreja da Misericórdia

入口前的廣場好不熱鬧

過了花街廣場就返到享利王子廣場

無意間看到公寓樓房背後有楝綠色門的樓房Antiga Bolsa dos Comerciantes, 放了世遺牌匾, 原來是波圖舊交易所

回到Praça da Ribeira(里貝拉廣場)

右邊數起第四楝就是公寓樓房

行咗大半日, 返公寓休息, 閒坐在露台欣賞波圖景色

今晚在里貝拉廣場食晚飯

餐廳開七點, 我們七點零五分到達, 以為剛開門唔會太多人, 點知只剩下六個位, 當中只兩個位未被預訂, 再遲就無位, 餐牌是葡文, 我們在Tripadviser上指著相片來落單

Dourada so Sal, 16歐

侍應將魚去皮起骨, 魚肉非常幼嫰香滑, 可惜分量太少

Arroz de Marisco, (二人份量海鮮湯飯) 31歐, 材料新鮮, 魚湯鮮甜, 好食

另加是日甜品, 4歐, 今餐非常有水準

餐廳好細, 一眼睇晒, 只能容納廿人左右, 如沒訂位可以在開舖時間來碰運氣, 或者等第二輪

多羅河畔, 越夜越熱鬧

飯後沿著多羅河畔散步, 再行上去Mosteiro da Serra do Pilar修道院前的觀景台欣賞日落, 行到路易一世大橋上層, 日落已經完了

波圖的最後一晚, 留在露台欣賞多羅河的美麗夜景

上一篇: 一起葡過的假期~葡萄牙自駕遊 Day 6
下一篇: 一起葡過的假期~葡萄牙自駕遊 Day 8