駕世遊: 【一起葡過的假期~葡萄牙自駕遊】Day5 Costa Nova童話裡的小屋

一起葡過的假期~葡萄牙自駕遊 Costa Nova童話裡的小屋

Day 5 - 6月11日星期日大致天晴

行程: Coimbra - Aveiro - Costa Nova - Braga - Guimaraes 258km

住宿: Casa do Juncal (Suite with Garden View, 包早餐及泊車, 105歐)

昨天的行程順利完成, 預留的時間多了出來, 所以略為修改今天的行程, 加入有葡萄牙小威尼斯之稱的Aveiro, 再前往Braga, 最後到尾站的Guimaraes。今日酒店的早餐, 款式少味道又差, 令人失望!

餐廳在酒店頂層, 除室內座位外, 仲有幾個露台好位, 享有大學景色

另外酒店天台有個休憩區, 同樣對著大學, 環境唔錯, 可惜知得太遲

今早天色好差, 似快要落雨, 當堂謝晒

臨走前到酒店後面的火車站行下

經過一間餅店, 主打都係昨天所買的甜食Pasteis de Tentúgal

酒店外觀

跟著出發到六十公里外的Aveiro(阿維羅), 到達舊城外圍時, 入城道路都封晒, 警察又叫人兜路走, 最後要將車泊到較遠的超市停車場, 再行入城, 白白浪費近一小時, 火都嚟埋! 好彩天色續漸變為晴朗, 行到Centro de Congressos de Aveiro才知道今日舉辦跑步活動

附近的Hotel Melia Ria, 外觀夠晒型格

Aveiro(阿維羅)又被稱為葡萄牙小威尼斯, 皆因市內建有人工水道, 主要交通是一種叫Moliceiro的傳統木船, 船身顏色鮮艷, 船頭又畫上一幅獨特的彩繪畫, 非常搶眼。睇返地圖, 呢度係水道嘅盡頭位置, 有幾艘Moliceiro泊喺碼頭等客, 一程價錢好似大約十歐, 沿路都見好多人坐船, 沿著水道行, 兩旁住宅大厦又新又靚, 周圍完全唔似舊區

經過橋底, 見到一幅靚壁畫, 睇真啲, 鯊魚尾畫成Moliceiro嘅船頭, 有趣

繼續行就到Forum Aveiro商場, 商場有冷氣及洗手間, 啱晒中途降溫

過咗商場, 終於見到舊城區, 眼前的大迴旋處似係新舊區分界線, 本來想將車泊喺附近, 結果兜兜轉轉個幾鐘頭後才到達

路牌有遊客中心指示, 先跟行睇下有無地圖攞

葡萄牙嘅舊區, 行人路多數舖到靚一靚, 以黑色石塊砌出簡單對稱圖案, 整齊美觀, 睇得出葡國人有心之處

行到去Igreja de Vera Cruz都未見遊客中心, 又被路牌老點

沿著水道的街道Rua Joao Mendonca, 係最多人流, 最多特色店舖嘅街道

Aveiro傳統甜食叫Ovos Moles, 店內有得試食, 外皮微脆, 裡面是蛋製甜餡

店舖內有不可或缺的瓷磚彩繪畫

要收錢的美術館

差不多要走喇, 先至見到遊客中心

對出係坐Moliceiro木船嘅碼頭, 除咗Moliceiro木船外, 呢度都有Tuk Tuk遊城, 五至十歐一位, 部分仲去埋Costa Nova

回程路上, 沿路有零星紫花樹, 唔知係咪澳洲嗰類

Aveiro觀光地圖

下一站係臨時要求同伴加插的Costa Nova, 離Aveiro約十公里外的海邊, 沿岸有大量車位, 可能今日係星期日, 全部泊滿車, 最後都搵到個偏遠啲嘅車位。Costa Nova有一條長長海岸線, 沿著海岸有一排排彩色條紋屋, 每間小屋有自己嘅主色, 配上白色相間條紋, 色彩極之鮮明搶眼, 感覺唔太真實, 好似入咗卡通童話世界咁, 心情即時輕鬆開心晒

可惜天公不造美, 所以諗著坐低食埋昨天所買嘅甜點Pasteis de Tentúgal加朱古力奶做午餐, 然後走人, Pasteis de Tentúgal意外地好味, 隔咗一晚, 外皮依然好脆, 蛋製內餡跟Ovos Moles相似, 不太甜, 幾好味

食完午餐, 陽光返來, 條紋屋配上藍天, 令顏色更加鮮豔, 靚到不得了, 條紋屋外觀雖然非常新淨, 但原來它們已經有過百年歷史了!

行人路及坐椅亦做得靚一靚, 以海洋生物做主題, 美觀又特別

行到尾段, 有個市場, 賣海鮮疏果

市場外的公廁, 亦都整得好童話feel

對著嘅海岸

現時的條紋屋, 多數用作出租渡假屋

第三站是Bom Jesus do Monte修道院, 修道院座落於Braga(布拉加)郊外的山坡上, 大家叫呢度做耶穌山, 唔揸車的話, 可以坐纜車上耶穌山, 山頂有停車場, 收費1歐, 最高處係一座教堂

教堂前面係條之字形長梯級, 一直伸延至纜車站

每層階梯都一座不同造型的水泉

兩旁建有聖像描述一段段聖經歷史

由下而上的觀景

階梯最底處, 兩旁各有座旋轉水泉

階梯最底處為欣賞全座教堂最佳位置, 整個建築非常華麗, 最後要等一段時間至影到張無人相

回程路最幸苦, 在猛烈陽光下暴晒之餘, 沿路無遮蔭地方, 身上又無水, 仲要不斷上梯級, 行到索氣

唯有每層停低影下水泉

之後又參觀教堂

教堂外邊, 有個鐘乳石洞, 好多人都聚集洞內抖涼

山上觀景台的景色

離開耶穌山後, 順路過去Braga尋找葡萄牙最古老的教堂Sé de Braga, 鎮內有好多歷史建築, 有Igreja de Sao Marcos

Igreja de Santa Cruz

兜咗一轉, 終於搵到萄牙最古老的教堂Sé de Braga, 入場費每人2歐

教堂正門入口, 不過售票處在左邊, 參觀範圍有兩個教堂及一個室外遺趾

室外

最後的教堂, 內部比較金碧輝煌

教堂外觀

附近的建築物

離開Braga後就直去今晚住宿的Guimaraes舊城, 入到去又係兜來兜去都搵唔到路去住宿門口, 最後要將車泊低問路, 原來入口被鐵柱欄著, 要透過對講機叫人放行, 經職員講解後, 原來星期日限制外人進入及泊車, 所以取房後, 要將車泊到指定停車場, 職員跟我們講解停車場位置及介紹了幾間餐廳的位置

停車場位置在Centro Comercial São Francisco商場地庫, 順便入去商場及超市行下, 葡國飲品及罐頭

Guimarães(吉馬良斯)係葡萄牙第一任國王誕生地, 因而有葡萄牙搖籃之稱的名城, 從商場走出來, 就是開闊的大馬路Largo da Republica do Brasil(巴西共和國大道), 大馬路盡頭是一座十分顯眼教堂Igreja de Nossa Senhora da Consolação (奧利維拉聖母教堂), 頂部有兩個雙尖塔, 外牆舖上花瓷磚, 前方還有一片長長的花圃, 遠睇十分美麗