2018年2月3日 星期六

【絕色挪威~郵輪之旅及自駕遊】Day1 北部港口小鎮Kirkenes

郵輪之旅及羅浮敦自駕遊  挪威北部港口小鎮Kirkenes

Day 1 - 9月22日  星期五  多雲

行程: 香港 - 多哈 - 奧斯陸 - Kirkenes

住宿: Thon Hotel Kirkenes (1420克朗, 海景房包早餐, 免費wifi)

旅程由挪威北部港口小鎮Kirkenes開始, 從香港出發要坐三程機, 經多哈至奧斯陸, 再轉去到Kirkenes, 前前後後用了超過一日時間, 相當折騰。登機前到Lounge解決晚餐, 一號登機口附近的Lounge正在裝修中, 旁邊開了間臨時鋪, 抱著有新試新的心態, 點知新不如舊, 這裡九點後停止供應魚蛋河之餘, 連樽裝水及罐装飲品一律欠奉, 只有少量熱食
第一程坐00:55 - 04:25機飛多哈轉機
晚餐
早餐
在多哈機場等候轉機時間約兩個半小時
多哈機場都稱得上新淨靚裝, 設施充足
中央位置的巨熊公仔擺設
A、B區與C、D、E區之間, 設有無人駕駛列車往返兩區
車卡用了近乎落地玻璃, 通透感十足, 來過幾次都無坐過, 就坐返轉玩下
有趣的太陽眼鏡廣告
第二程機07:05 - 12:45, 多哈飛奧斯陸
有個早餐
及輕食
準時到達奧斯陸機場, 過海關入境都好快, 先去SAS辦理自助登機及寄行李, 再去便利店睇下SIM卡, 剛巧便利店有個哥仔擺臨時檔賣Lycamobile SIM卡, 查詢後建議我們買價值149克朗的SIM卡, 然後就帶我入便利店比錢, 再幫我們登記及解決手機設定問題, 唔駛自己動手, 真爽!
Lycamobile SIM卡, 149克朗, 有1G數據, 30天有效期, 至於網絡覆蓋及速度, 都OK無乜大問題, 郵輪上大多數時間都收到
所有事情辦好後, 離轉機時間還有三個多小時, 所以決定去市中心行下, 由機場到市中心, 可以坐高速火車(Flytoget Airport Express Train)及普通火車(NSB), 兩者時間差不多, 車程約20分鐘, 但價錢就相差一倍, 分別是190克朗及93克朗。奧斯陸機場航厦連接著火車站, 所以機場內有自助售票機, 收現金或信用卡, 亦有職員在旁協助旅客。由於網上有太多討論關於在北歐國家的自助售票機使用信用卡付款的問題, 究竟是否要另行申請一個4位數字的晶片密碼, 我問過幾間銀行又得唔到滿意答案, 所以實地一試, 我張匯豐Visa信用卡已加入了儲蓄戶口, 先試不用密碼, 再試4條0, 都是密碼錯誤, 第三次用信用卡的6位數字密碼就成功, 最後收到賬單, 相關賬項都計入信用卡戶口, 所以大家所討論的4位數字晶片密碼, 應該就是大家所設定的信用卡晶片密碼, 分別是香港銀行多數用6位數字作密碼而已
普通火車票每位93克朗, 預計兩人來回一轉就要用近四百大元車費, 但只有兩個半鐘玩, 後來發現車票不是一次性, 而是有2.5小時的間限, 真係計都無咁啱, 回程可以慳返唔駛再買飛, 太好了!
機場及月台有顯示火車資訊, 市中心為Oslo S站(即Oslo Central Station), 右邊細字列出NSB所停的車站, 最近一班車停Oslo S站是14:43
高速火車(Flytoget Airport Express Train)
NSB車廂內部都幾寬敞, 上車後不久就有職員査飛
車廂內顯示火車到站資訊, 15:06到達Oslo S站, 車程23分鐘
火車準時到達Oslo S站, 先視察由室內通道行去Comfort Hotel的路線
火車站前的The Tiger銅像, 今日有節目, 老虎被人包圍
老虎像旁邊就是Comfort Hotel, 回程時最後一晚所住的酒店, 最左邊紅色的建築物就是遊客中心
Oslo S火車站一帶
時間不多, 只夠時間在Oslo Opera House(奧斯陸歌劇院)兩岸行下, 由對岸望去奧斯陸歌劇院, 全部都是天秤, 大煞風景
海上的帆船雕塑
郵輪碼頭一帶
奧斯陸歌劇院
歌劇院的兩旁建了兩段又是屋頂又是行人路的斜坡, 由海邊一直仲延至歌劇院頂部, 讓人直接由海邊行上天台, 自自然然成為大家的觀景台
興建中的奧斯陸圖書館
由天台離開的路上感覺更有特色
行過歌劇院後, 差不多到回程時間, 上火車前跟職員確認及証實車票有效。五點到達機場, 禁區內最特別就是自助貨幣找換機, 不過匯率麻麻
今日第三程機坐17:55 - 20:00機奧斯陸飛Kirkenes, 今程機唔想分開坐, 買機票時加錢揀位坐窗邊位, 上到機見到所坐的行數無窗, 不禁問自己點解咁失策? 當晚同伴無意中發現我們買機票時揀了經濟位第一行6A及6B, 但辦理自助登機時卻被改為7A及7B, 原來SAS都咁衰格, 咁無信用, 真金白銀買咗位都靜雞雞改, 仲要改去無窗嗰行!
Kirkenes機場好細, 行出大堂就見到行李輸送帶
行出機場, 門口已經有架112號巴士等候, 入城每位50克朗, 收信用卡或現金, 當然繼續實測以信用卡付款, 跟著準備入密碼之際, 點知車長叫我簽名啦!
巴士上有銀幕清楚顯示沿路站名, 由機場到酒店約25分鐘車程
今晚特登揀住海景房, 盼望第一晚就可以睇到極光, 客房尚算新淨整潔, 不過稍為迫夾
安頓後立即出去酒店行下, 圍住酒店附近行咗一圈, 跟預期一樣, 周圍靜過鬼, 無嘢行無嘢食, 而且非常厚雲, 酒店外觀
今次旅程自備了熱水壺, 方便煲水, 另帶了四個杯麵、一罐肉丁及一罐午餐肉, 預咗今晚食一餐, 剩低一份以備必時之需。酒店大堂有少量免費甜點供應, 第一餐食杯麵, 加甜品做宵夜, 連罐頭都懶開
今晚訓得唔好, 不斷起身視察天色, 可惜都係非常厚雲, 與極光無緣了, 食白果!

上一篇: 郵輪之旅及羅浮敦自駕遊  行程篇
下一篇: 郵輪之旅及羅浮敦自駕遊 Day 2

11 則留言:

  1. 149克朗即係=幾多港元?

    回覆刪除
    回覆
    1. 當時克朗對港元, 約1對1, 今次最易計算。

      刪除
  2. 雖然有幾個小時等轉機,我都唔敢離開機場,怕遇上交通問題,趕唔到返機場上機。

    回覆刪除
    回覆
    1. 都係嘅, 不過都係又想出去行下, 咪博下囉!

      刪除
  3. 試過幾次搭國泰,揀左位都一樣被改位。

    問點解唔同左個位,佢話轉左機種,吹脹。

    回覆刪除
    回覆
    1. 今次我俾$買位, 所以有啲嬲!

      刪除
  4. 我今年都會第一次經多哈轉機.

    回覆刪除
    回覆
    1. 如買平飛, 佢都唔差。不過我咗like佢要坐shuttle接駁, 上機落機都係!

      刪除
    2. 如買平飛, 佢都唔差。不過我唔like佢要坐shuttle接駁, 有時上機落機都係!

      刪除
  5. You said staying hotel was Clarion Hotel Bryggen. Would it be a mistake? I thought you were staying at Thon Hotel.

    回覆刪除
    回覆
    1. 你啱, 應該係Thon Hotel Kirkenes!

      刪除