2018年1月13日 星期六

【一起葡過的假期~葡萄牙自駕遊】Day10 電車慢遊里斯本

一起葡過的假期~葡萄牙自駕遊  電車慢遊里斯本

Day 10 - 6月16日  星期五  晴

行程: Lisbon

住宿: Hotel Lisboa Tejo (Twin Room, 97歐)

趁朝早人少, 先去坐一轉超人氣28號電車, 靜靜地『慢』遊里斯本幾個主要小區Baixa、Alfama及Chiado & Bairro Alto, 沿途望著電車在橫街窄巷之中穿梭, 欣賞這片獨特景物, 真係別有一番風味, 呢程車坐得相當舒服過隱。早上人少車少, 由頭站Martim Moniz到尾站Campo Ourique, 約需時大半小時, 過了Bairro Alto區, 亦趨向平淡, 提前一個大站在Estrela站前的公園落車, 公園入口有個28號電車頭造型的雪糕檔
對面是Basílica da Estrela
然後坐返28號到商業廣場落車
原因附近有間人氣罐頭店, 由1930年開業至今的Conserveira de Lisboa, 店內所賣清一色全是魚罐頭, 各款魚罐頭整齊地放滿店內的木櫃
所有罐頭均以人手包裝, 維持以往的傳統, 枱上有齊各款罐頭樣辦, 供人選購
我們買了十五罐做手信及自用, 除必選的沙甸魚外, 亦盡量多揀幾款試下。以為滿載而歸返屋企, 點知當中只有鹹鱈魚(左邊第二行上面嗰罐)係好食, 沙甸魚款味道還可以, 其他完全唔得掂, 最難食係左邊第二行下面嗰罐, 開罐後才知道是魚子, 淡味得來又勁腥, 最後頂唔住, 掉咗, 事後睇返價錢, 呢罐仲要收六歐, 其餘各款約二至三歐, 總括來講, 除鹹鱈魚外, 全部都唔太好食
附近另一間用年份做包裝的罐頭店
Praça da Figueira(無花果廣場), 朝早有好多Tuk Tuk等客
今日食早餐的地方亦是間老店, 由1829年開業至今, 有近二百年歷史
四個小生去旅行介紹過呢度名物Bolo Rei(皇室麵包), 不過見唔到有, 阿姐又唔識英文, 所以即刻Google幅相比佢睇, 跟著佢嘰哩咕嚕一輪, 都唔理你識唔識聽, 最後唯有隨便揀幾個包及咖啡, 共6.45歐
跟著去埋間傳統葡國雜貨舖Manteigaria Silva買馬介休
老闆都係唔識英文, 不過知我想買馬介休, 就開雪櫃俾我揀, 魚肉價錢每公斤12.5歐, 魚鮫就每公斤6.8歐, 幫襯四件魚肉兩件魚鮫, 合共20歐, 用來炒飯炒菜, 味道一流
之後返酒店嘆下果汁汽水
所住客房的景觀面向內街舊樓, 無景觀可言, 但勝在有陽光照到, 光線充足
里斯本市中心大致分為三個小區域, 有Baixa、Alfama及Chiado & Bairro Alto。Baixa區又叫Lower Town, 是里斯本最繁華的地方及市內交通樞紐(Rossio), 我們就住在Baixa區, 由Rossio, Rua Augusta至海邊的Praça Do Comercio都屬於Baixa區內。與Baixa為鄰的Chiado & Bairro Alto區, 又叫Upper Town, 區內有不少餐館、酒吧、小店潮店, 出名的Fado餐廳都集中在此, 昨日下午已經行過此區, 而今晚我們亦會在區內的Faia餐廳食晚餐。Rossio一帶
Rossio廣場上有間當地著名小酒吧A Ginjinha, 專賣Ginja(櫻桃酒), 即係在舊城Obidos飲過的Ginja, 行入去八掛下, 裡面有個大嬸即買即飲, 仲叫我一定要試, 話very good喎
旁邊的Igreja de São Domingos
另一區是Alfama, 在市中心的東南面, 是里斯本最歷史悠久的區域, 區內到處都是縱橫交錯的街道和古舊的民房建築, 著名景點有Castelo de Sao Jorge(聖若熱城堡)、Sé de Lisboa(里斯本大教堂)及幾個觀景台。前往Alfama區, 可以選擇由Martim Moniz總站坐28號電車
28號電車總站前, 不停有Tuk Tuk招生意, 遊說大家不要口竹人土時間等車, 即時出發遊市區一大堆景點, 其實都係一個不錯的選擇, 快遊主要景點後, 可以多啲時間慢慢探索里斯本舊區, 行下街 睇下小店
想有位坐就要多等幾班車, 結果等了近半小時
先由Miradouro da Senhora do Monte觀景台開始, 個景只係一般
Igreja e Convento da Graça
教堂外的觀景台
沿途不時見到28號電車在大街小巷之中行駛
Igreja de São Vicente de Fora(聖文森修道院)
Igreja de Santa Engrácia(聖安哥拉西阿教堂)
跟著再行去Castelo de Sao Jorge(聖若熱城堡), 沿途景物
中途要行一段梯級路, 天時暑熱下特別辛苦
停一停補充水份
城堡入口
入場費每位8.5歐
城堡地圖, 左邊範圍為收費區, 大致分成上中下三個區域, 最左邊仲有條城牆路通往半山位置
下區域是景觀平台及室內展館, 相當開揚, 可飽覽里斯本全景及近海一帶景色
景觀平台仍保留著城堡的炮台
室內展館
繼續餘下的範圍
中間區域是城堡主體
通往半山的城牆路, 怕回程太苦辛, 無行
遠看Igreja e Convento da Graça
天氣太熱快快行完走人, 原來由城堡行返去無花果廣場非常近
途中見到件好得意的公雞Tee, 啱晒送俾姪仔, 16歐
返到無花果廣場時, 撞到一隊小型車隊, 原來有呢種玩法, 如果毋須載頭盔, 應該更吸客
今日的late lunch係無花果市場所買的炒葡國雜香腸(5歐), 及超市所買的水果、飲品
返酒店開餐
晚餐前再去坐多轉28號電車到Alfama區
在Igreja de Santo Antonio落車
真正目的係去Sé de Lisboa(里斯本大教堂)前影張經典電車相
不過呢個位人多車多, 用咗半個鐘先影到幾張唔太雜亂嘅相, 真辛苦
之後由大教堂行去Chiado & Bairro Alto區食晚餐, 路過雪糕店Amorino, 見無人排隊, 食個花形雪糕先, 每個3.5歐, 店員手法純熟, 十幾秒就做好花形雪糕, 勁!
今晚訂了Faia餐廳食飯睇Fado表演, 餐廳設有最低消費每人50歐, 所以我們點了兩個套餐, 每位49.5歐包湯, 主菜及甜品, 飲品另計
Fish soup with fresh river mint, 餐湯味道可以, 主菜及甜品完全唔掂, 幾乎係全個Trip最差一餐
主菜二揀一, 有Chicken thigh stuffed with 'alheria' (Portuguese sausage) oven roasted或Sea Bass fillet
甜品亦係二揀一, Crumble of pear with ice cream或Floating Island dessert
餐廳內的溫馨提示
大約八點半, 客人陸陸續續到齊
九點左右開始有歌手獻唱Fado, 歌手唱了二、三首怨曲就停, 心想咁快唱完, 原來係每隔半小時一節, 每節換歌手表演, 共有四位歌手輪流獻唱, 呢餐飯坐足三個幾鐘
離開餐廳時已經近零晨了, 但周圍的餐館、酒吧、以及街頭巷尾都人潮洶湧, 估唔入夜後的Chiado & Bairro Alto更熱鬧, 可謂愈夜愈精彩!

上一篇: 一起葡過的假期~葡萄牙自駕遊 Day 9
下一篇: 一起葡過的假期~葡萄牙自駕遊 Day 11

沒有留言:

張貼留言