2018年1月21日 星期日

【絕色挪威~郵輪之旅及自駕遊】行程篇

挪威有太多靚爆風景名勝, 最為人熟悉有幾個著名峽灣、挪威縮影、雪之路、老鷹之路、精靈之路、聖壇岩、惡魔之舌、奇蹟岩、冰川、羅浮敦群島等, 數之不盡, 當中印象最深刻一定是羅浮敦群島, 每次看到相關相片遊記, 都被深深吸引, 好想下個目的地就是挪威!由於挪威的地形窄而長, 道路又被峽灣分隔, 計劃一趟滿意的自駕行程極不容易, 若以兩星期行程為上限, 又想多去一些地方的話, 必須以長車程做代價, 分分鐘得不償失, 加上2014年一役後, 對挪威的高消費實在怕怕, 因此至今未再成行!在2016年中, 看過【Mr.R環遊世界紀錄】的羅浮敦群島遊記後, 我决定先去羅浮敦群島, 有了明確目標後, 計劃行程變得簡單了, 就以羅浮敦群島為主, 再加一至兩處地方, 行程大概十天吧!

相比當年只為極光而去, 結果捧蛋而歸, 今年挪威之遊就充實得多, 清單上的兩大項目亦順利達成, 第一項是登上Reinebringen
第二項是希望可以欣賞一場精彩的極光舞動
另外今次所見的景物不再是黑白灰, 而是色彩豐富的挪威美景, 七色有齊, 首先海邊一定見到的紅色漁屋, 不過絕大多數都是新建及出租用途
橙色的日落日出美景
見得最多就是沿途的黃葉景色
偶然一見的綠草地
今人難以忘懷的北極光
只要天朗氣清, 在郵輪上就一定看到天海一色
最後勉强地加個紫色的北角展館, 集齊七色, 成就今次絕色挪威之旅!
航線
今次的旅程由平機票而展開, 一月份見到卡塔爾航空來回奧斯陸經濟艙機票只需三千多起, 便立即計劃出發日期, 根據天氣網的資訊, 七至八月份天氣最佳, 九月份開始轉為雨季, 這是我最擔心的問題, 因為想順便再去碰碰運氣睇極光, 而當時九月份機票價錢是最平, 又可連十、一假期, 可以少用一天年假, 考慮了幾日, 天氣因素都係無得計, 决定買下九月尾的機票, 連稅每位3547港元。初步計劃在Tromso住兩晚等極光, 然後由Tromso自駕遊至羅浮敦群島的Å鎮, 再由羅浮敦群島的Svolvær飛回奧斯陸。之後繼搜集資料, 研究如何妥善地把北角納入行程內, 找到【海陸空遊世界】的行程, 除羅浮敦群島及北角, 還多一個三日兩夜郵輪之旅, 對於我們簡直是個絕佳組合, 一於抄佢。行程大致定好後, 開始留意內陸機票價格, 當地主要內陸航線有SAS、Norwegian Air及Widerøe, Norwegian Air的價格較隱定而SAS較飄忽, 復活節前終於忍不住購買了剩下的兩程內陸機, 有SAS奧斯陸至Kirkenes, 連稅加揀位每位1449港元, 以及SAS由Evenes至奧斯陸, 連稅每位1008港元, 每人機票總費用為6004港元, 如果自己不太心急的話, 等到復活節期間才出手, 每人可以再慳多一千大元, 令機票總費用低過五千港元, 可惜!

郵輪
從觀察所得, 價錢視乎日期、當時入住率及個別郵輪而定, 我們買了機票後才計劃行程, 因此日期及郵輪已別無他途選了。預訂Hurtigruten挪威郵輪航線, 可透過官網訂房, 但先要付兩成訂金, 出發前60日再繳付餘額, 一般情況下不設取消及改期, 所以盡量等到最後才訂房, 直至出發前三個月才出手。
郵輪房間除了幾間套房外, 主要有三種客房選擇, 分別是Polar Inside(最平及無窗), Polar Outside及Arctic Superior(最貴), 以三日兩夜計, 最平與最貴每位相差約100歐, 各種客房可選基本膳食plan(只包自助早餐)及Fullboard(包早午晚三餐), 上次去挪威太過孤寒, 令我們對挪威無乜好回憶, 今次唔做cheap精, 揀最好的Arctic Superior房及Fullboard(包兩日早餐, 三日午餐及兩日晚餐), 選擇Fullboard會加送全程免費Wifi及咖啡茶任飲, 每位681歐
另外一個選擇Arctic Superior的原因是希望可以留在房內舒舒服服欣賞極光, 相片攝於郵輪上的電視廣告
租車
因為異地還車關係, 必需以兩地有車行分店為先决, 所以選擇了Avis及訂了Compact自動波車款, 四天車租連基本保險、異地還車費及稅項, 約3700挪威克朗(簡稱克朗), 取車當日再另購全保, 合共4700克朗。今次自駕遊所用的車款型號是標緻2008, 行車里數不到二萬, 外表非常簇新, 標緻2008是一輛小型SUV車, 引擎只有1200cc, 但馬力卻比1500cc房車更强勁, 內籠比一般房車寬敞, 加上一個特大天幕車頂, 提高行車時的視覺享受, 整體上對操控、馬力及舒適度各方面都相當滿意, 唯一不足是車內沒有CD/MP3機, 必須以iphone連接來播放音樂。今次全程行走了600公里, 全程油費632克朗, 約637港元
上網SIM卡
從網上得知挪威上網SIM卡於便利店有售, 購買時需要登記護照, 使用時再要透過SMS啟動, 略為不便, 所以沒有特別準備資料, 打算到時隨便買張。當日出境後經過便利店, 有個臨時櫃台售賣Lycamobile SIM卡, 查詢後建議我們買價值149克朗的SIM卡, 同時幫我們登記及解決設定問題, 不過店員手腳太快, 將所有包裝掉了, 無得留低及影相, 至於網絡覆蓋及速度, 無乜大問題, 在郵輪上, 亦主要以SIM卡上網, 因為速度快過Wifi

貨幣
挪威貨幣是挪威克朗NOK(簡稱克朗), 國內幾乎所有交易都接受信用卡付款, 為安全起見, 都要準備少量挪威克朗, 在香港有克朗兌換的地方不多, 今次經匯豐銀行兌換挪威克朗, 原來手續相當方便, 只須透過電話理財熱線預訂所需的貨幣及金額, 在三個工作天後, 到預約的分店提取貨幣, 今次兌換三千克朗, 匯率約1克朗相1港元, 相比2014年1克朗對1.31港元, 抵玩好多, 跟其他歐洲國家消費相差不大!
行程
經過一輪改動後, 最終參考【海陸空遊世界】的行程, 先由挪威北部的Kirkenes開始三日兩夜Hurtigruten郵輪之旅, 到羅浮敦群島的Svolvær落船, 然後以自駕遊方式遊覽羅浮敦群島, 再由Harstad返回奧斯陸, 路線如下:
Day 1  香港 - 奧斯陸 - Kirkenes, 由香港坐01:25機經多哈到奧斯陸, 再轉機到挪威北部的Kirkenes(北緯69.7度), 到達酒店已是晚上九點了, 住宿市內的Thon Hotel Kirkenes
酒店有個無敵海景, 第一晚的節目就是等北極光
Day 2  開始三日兩夜的Hurtigruten郵輪之旅, 上船港口是Kirkenes, 而開船時間為12:30, 沿途停十七個港口, 航線如下:
這趟郵輪之旅的輪船是Nordlys號
入住房間是Arctic Superior, 面積比日本商務酒店房間大, 而且比預期舒適
Day 3  參加Nordkapp Tour到北角半日遊及食早餐
其餘大部分時間睇住個海
Day 4  郵輪之旅尾聲, 亦是全段最精彩一段, 當中郵輪會駛入一個超窄的峽灣
然後掉頭, 兩邊崖壁接近擦身而過, 非常精彩
今晚落船的港口是羅浮敦群島的Svolvær, 住宿的旅館是市內的Svinoya Rorbuer, 入住她的漁屋, 不過四周環境麻麻
Day 5  開始羅浮敦群島自駕遊
目的地是Hamnoy, 今明兩晚都住在Eliassen Rorbuer的漁屋, 右下角第二間漁屋, 從外圍望過去, 簡直係人間仙境
Day 6  進入旅程高潮, 就係要登上Reinebringen, 從高處觀看被喻為世界最美麗的漁村Reine及附近一帶的美景
Day 7  開始回程向北走, 今晚落腳點在Svolvær外圍的Kabelvag, 住宿於Nyvagar Rorbuhotell, 繼續住漁屋
Day 8  離開羅浮敦群島繼續往北走, 前住Harstad, 住宿市內的Clarion Collection Hotel Arcticus, 方便明天前住機場, 亦俾多個機會再等極光
Day 9  Harstad - 奧斯陸, 住宿市內的Comfort Hotel Grand Central
Day 10-11 奧斯陸市內觀光後回港, 行程無太多指定景點, 主要邊行邊睇, 慢玩十一天!

下一篇: 絕色挪威~郵輪之旅及自駕游 Day 1

14 則留言:

  1. 作者已經移除這則留言。

    回覆刪除
  2. 嘩嘩嘩嘩!超級吸引呀!

    回覆刪除
    回覆
    1. 我睇人哋嘅羅浮敦遊記, 都睇到流晒口水, 所以立即行動!

      刪除
  3. 超靚呀! 唔駛寒冬睇極光都好喎。

    回覆刪除
    回覆
    1. 我都係咁諗唔駛凍著睇極光, 一舉兩得, 不過最擔心係天氣, 日日暗暗沉沉又落雨的話就大件事!

      刪除
  4. 回覆
    1. 係呀, 最正就係大多數時間天氣都好好!

      刪除
  5. 冇來你的blog好耐,越看越精彩!

    回覆刪除
  6. 你好。你說的都很吸引。但是我在網上Hurtigruten官網找到的都是六日的行程。想問問如何能訂到你的三日兩夜之行程。謝。

    回覆刪除
    回覆
    1. 聽朋友講, 今年起, 如不是坐全程的話, 改為以email聯絡及訂房, 可能想盡用所有房間
      https://global.hurtigruten.com/practical-information/port-to-port/

      刪除