【一起葡過的假期~葡萄牙自駕遊】Day3 童話皇宮佩納宮

一起葡過的假期~葡萄牙自駕遊  童話皇宮佩納宮

Day 3 - 6月9日  星期五  大致天晴

行程: Sintra - Negrais - Obidos  97km

住宿: Hotel Josefa D Obidos (Standard Twin Room, 包早餐, 免費泊車, 72歐)

里斯本近郊的Sintra(辛特拉)係舊時貴族的度假區, 所以建有不少皇宮城堡, 現時大部分仍然保存完好, 因而被聯合國睇中, 將Sintra及附近皇宮城堡一併列入世界遺產。Sintra觀光地圖清楚列出各個世遺景點位置, 步行及乘車所需的時間, 分別有辛特拉古城、Sintra National Palace(辛特拉國家皇宮)、Pena Palace(佩納宮)、Moorish Castle(摩爾人城堡)、Seteais Palace(瑟特阿斯宮)、Monserrate Palace (蒙塞拉特宮及花園)等等。由於今日時間有限, 只會去最熱門的佩納宮和摩爾人城堡, 而評價最高的Regaleira Palace and Gardens(雷加萊拉皇宮及花園), 最後決定放棄

Sintra有幾條巴士線, 穿梭各個景點, 方便遊覽

另有觀光巴士線遊走Sintra各個景點

今早先行過去Regaleira Palace and Gardens門口睇下, 由酒店行去, 大約十五分鐘, 沿路景物充滿澳門Feel

Sintra巴士站

Regaleira Palace and Gardens(雷加萊拉皇宮及花園)外觀殘殘舊舊, 但內裡隱藏著獨特地下建築及迷宮地道, 據聞可觀性甚高

再行前有座建築物, 事後睇Google先知係由皇宮改建成五星級酒店Tivoli Palácio de Seteais

因為唔知係酒店範圍, 所以摃咗入去, 穿過大牌坊後有個觀景平台, 可以欣賞酒店內的迷宮花園及Sintra鎮部份景色, 可惜今早非常厚雲

沿路返回酒店, 路過仍未開門的遊客中心

辛特拉國家皇宮, 老遠已經見到廚房位置的孖煙通, 一定要唔會認錯

室內結構圖, 網上資訊話幾值得入去參觀

今日揀咗無早餐嘅酒店plan, 本來想喺廣場搵食, 但附近一帶嘅cafe尚未開檔

最後隨便食啲乾糧就退房出動

第一站去最醒神嘅Pena Palace(佩納宮), 由酒店到佩納宮約十幾分鐘車程, 上山路段以單程行駛, 所以唔難揸, 沿路除有少量路邊位, 還有四個免費停車場, 路邊有電子顯示屏標示停車場位置及景點入口位置, 路線先經過摩爾人城堡, 最後我們把車泊到最尾的爛地停車場, 但其狀況極差, 地面凹凸不平而且有好多巨窿, 睇返相片, 地理位置及狀況最好的停車場應該是第三個停車場, 即相片中由下數上第三個

九點多來到入口處, 已有遊客等候入場, 門外有售票處及自助售票機, 唔想排隊可到自助售票機買票, 九點半開始放人入場

查實佩納宮是在Pena Park(佩納公園)之內, 坐落於公園山坡頂, 要到佩納宮先要買公園門票, 門票有兩種, 第一種是公園門票, 每位7.5歐, 此票已經可以參觀所有佩納宮室外地方, 另一種是全票, 每位14歐, 門票包括進入皇宮室內地方, 我們買了佩納宮全票及摩爾人城堡的套票, 兩人39.9歐

入口處有電能巴上半山, 想行少啲可以俾多3歐坐電能巴

佩納宮結構圖

由公園入口到佩納宮, 大約行十五分鐘

皇宮入口, 地圖特別指出塔上一個叫Coat of Arms的皇室徽號石章

佩納宮算係一個重點行程, 但當時天色差, 非常厚雲, 心情大受影響

宮內最有特色的拱門Triton, 拱門上有雕功精細的半人半魚海妖像

穿過海妖拱門來到佩納宮背面, 又有另一番景象, 天色變得時晴時陰, 此時天空出現了少量藍天

把握藍天機會, 返回佩納宮正面補影幾張相, 陽光下的佩納宮, 色彩更加鮮明, 童話味更濃

佩納宮全景

室內外各式各樣的瓷磚

再次走入海妖拱門來到佩納宮背面, 呢度有個大平台及小教堂

平台的景觀, 可惜仍然非常厚雲

小教堂

跟著係宮內部分, 對佢興趣不大, 叫做來到睇埋, 無時間可以唔睇, 仲慳返幾歐

天花板都做足裝飾

皇后寢宮

以及房外嘅The Queen's Terrace

宮內隨影

跟其他城堡一樣, 廚房放到最尾

Pena Park範圍好大, 除咗著名嘅佩納宮外, 仲有好多地方行, 無乜可能行得晒, 所以揀多一個叫High Cross嘅地方睇下, 景點位於Sintra山最高點, 由佩納宮行去要行二十分鐘有多, 仲要行斜路上山, 攞命!

個位可以遠眺佩納宮, 不過好一般, 唔太值得行上來

公園內的手信店, 質數及價錢比之前兩日見到都高幾級

跟著繼續行程, 行過去摩爾人城堡, 經過Pena Park另一個入口, 可遠觀佩納宮

約十分鐘步程到達摩爾人城堡入口, 沿路見到好多Tuk Tuk兜客, 原來呢區都興Tuk Tuk

入場位置只係摩爾人城堡核心外圍, 仲要行十多分鐘路至去到核心範圍, 呢度有最重要嘅廁所

城堡地圖, 簡單介紹各個位置名稱及資訊

走出佩納宮後, 天氣續漸轉晴, 估唔到來城堡後, 所有厚雲幾乎吹散晒。呢度係武器廣場, 城牆中央升起一支印有阿拉伯文字的綠色旗, 文字是Sintra意思, 代表城堡嘅起源, 因為古時嘅摩爾人就係阿拉伯人。城牆向左右兩邊伸延, 左邊盡處是Royal Tower

而右邊盡處是Castle Keep

先行左邊嘅城牆

全段要不斷往上爬

向Castle Keep方向嘅城牆景, 陽光下嘅城牆, 都幾壯觀

沿城牆行, 可以欣賞Sintra舊城全景, 原來舊城好細, 最易認係國家皇宮嗰條孖煙通

長長的石級, 行到索晒氣, 到頂可見到佩納宮

沿路隨影

最高點嘅Royal Tower, 與佩納宮遙遙相對

眼前所見, Royal Tower高過另一邊嘅Castle Keep好多

全段城牆都無遮無掩, 晒到頭頂出煙, 睇完風景就要立即回頭去Castle Keep

右邊城牆景色

回望Royal Tower

Castle Keep四周景色

結束Sintra行程, 已經一點有多, 午餐去返昨日計劃咗而無去到嘅Restaurante O Caneira Lda食燒乳豬, 餐廳位於Negrais鎮, 約三十分鐘車程

可能過咗午飯時間, 全店只有幾枱客

因為無英文餐牌, 大叔又唔識英文, 搵咗個都係唔識英文嘅後生仔招呼我們, 用下單字及身體語言, 指著餐牌點咗燒乳豬, 估計有兩個不同部位嘅乳豬。飲品點咗可樂1.9歐及啤酒1.8歐

餐前小食, 咸咸地又唔似炸馬介休, 食完先知食幾多收幾多, 每條0.7歐, 共4.2歐

麵包, 1.2歐

仲有兩嚿類似芝士物體跟麵包上, 無乜味道, 起初以為用來搽麵包, 侍應見到我們咁食, 就走過來, 將佢倒出來切片, 真失禮, 3.6歐

切片後, 可加鹽及楜椒粉來食

主菜係兩人份燒乳豬, 28歐, 乳豬都叫皮脆肉嫩多汁, 味道過得去, 不妨一試

乳豬醬

配菜有沙律, 2.4歐

以及免費但油油哋嘅薯片

之後見到門口餐牌, 有隻用乳豬器皿的Cream Brulee甜品, 如果早見到, 一定會點來試下

今晚住Obidos, 訂酒店時已經註明無泊車位, 但booking.com啲評語話酒店及城牆之間嘅路邊可以泊車, 可惜當時泊滿車, 所以將車泊喺舊城入口的收費停車場, 先用5歐泊著幾個鐘

去到酒店發現正門有八個車位, 一問之下原來住客可免費使用, 白白浪費5歐

客房環境, 比相片新淨及光猛, 有冷氣, 似剛裝修過

浴室好寬敞, 不過有啲渠嗅味, 可能舊屋去水唔太好

窗景對著馬路, 不過種咗花花草草擋著

Obidos地圖, 個城好細, 全城被城牆包圍

安頓後, 出動入城行下, 酒店在城牆旁外, 鄰近入口, 右邊大樹後面, 位置方便, 行人路中線舖了石磚, 方便拖篋客

Obidos係個好歷史悠久的古城, 公元前三百年已經有人居住, 左邊是城門, 中間是教堂, 右邊對出就是Obidos的收費停車場

行入城門就見到連教堂的一幅牆身, 裝飾了葡萄牙傳統藍白瓷磚

穿過城門, 眼前一亮, 周圍全是白色石屋, 中央有個小廣場

沿左邊的梯級行上就是城牆的入口, 整個古城被城牆包圍, 沿城牆行可以繞城一週, 全段城牆有幾個出入口, 方便隨時進出, 相片中列出城牆八個城塔及邊門

先行上城牆行轉, 沿途俯視城門入口

登上城牆後, 觀景更為開揚, 中間位置是入口廣場, 左邊為古城的主街, 貫穿古城南北入口, 大部分店舖都集中在街上兩旁

左邊城牆位處較高, 以順時針行的話, 可在正光環境下, 沿途以居高臨下角度欣賞古城景色

由城門上開始, 以順時針方向行的話, 首先到達城牆上最高點的瞭望塔

登上瞭望塔便看到城外的長長水道, 水道前有兩個停車場, 沙地是免費停車場, 而瀝青地是入口旁的收費停車場, 為免擔心治安問題, 所以到達時把車泊在收費停車場

身處最高點的瞭望塔景色

回望瞭望塔

城牆上只有寥寥可數的遊客, 格外寧靜愜意

沿著城牆行, 能夠欣賞到小鎮全貌和城外田園景色

古城內的天主教教堂Igreja de Santa Maria

由城堡改建的Castelo de Óbidos城堡酒店

從城堡位置附近離開城牆, 到城堡一帶行下

Castelo de Óbidos現改成酒店, 本來計劃今晚到城堡食飯, 不過裡面好冷清, 要改變計劃了

隨影

離開城堡後, 趁店舖收檔前, 先行咗主街Rua Direita, 盡頭位置是Church of Santiago, 原來已經變為書店

Rua Direita街上, 是古城內最熱鬧的地方, 大街兩旁都是店舖

有葡萄牙傳統公雞圖案的用品

街上隨影

Igreja de Santa Maria

內部裝飾當然有葡萄牙不可或缺的傳統藍白瓷磚

Rua Direita大街, 中線一樣舖上平滑石磚, 方便拖篋

街上除咗有賣Sangria飲品

最多就係地道櫻桃酒Ginja, 一律以朱古力小杯盛載, 試了一杯, 1.5歐, 店員仲醒多一粒櫻桃俾我

天時暑熱, 食杯軟雪糕真係涼透心, 2杯3.5歐

Igreja de São Pedro

Rua Direita

比較特別係街上的一間舊書店

街上隨影

古城入口的廣場上, 有支石柱, 睇落好有南美感覺

回到古城入口, 决定返酒店小休一陣

再次出動, 先去水道睇下, 有一小部分係跨越馬路

1575年建成的水道Stone aqueduct

停車場旁的旅行社

跟著返入古城, 城內的遊客幾乎無晒, 格外寧靜, 從另一條行人街散步到城堡方向去, 沿途順便睇下有無晚飯好地方

到達城堡附近, 再次登上城牆, 繼續未行的城牆部分

臨近日落時份, 光線倍感柔和舒服

沿著城牆行下, 可以偷望古城內民居及酒店, 其中一間酒店

呢間都幾靚喎, 原來係住梗嗰間酒店

古城最熱鬧嘅入口位, 幾乎無晒遊客

行咗一圈都無啱心水嘅餐廳, 最後决定留喺酒店餐廳食飯, 估唔到餐廳set好晒枱之後, 個樣都好高檔好靚, 可惜忘記影相。今日要點返杯白酒飲下, 一杯3.5歐, 又幾好飲喎, 大支礦泉水3歐, 啤酒2歐

餐包由個童工驚驚青青咁送上, 2歐

經侍應介紹的前菜, 有三款醬搽麵包及橄欖, 叫Couvert, 3歐, 全部都好味, 連橄欖都掃晒

主菜用咗個好巨型嘅半球不銹銅蓋冚著送上, 嘩, 好高級咁! Sea Bass Fillet 15歐, 魚肉滑嫩好味

Shrimps Risotto 12.5歐, 一樣好食, 呢餐喺無期望下, 竟然有驚喜

今日行程豐富, 玩足一日, 食又唔錯, 住得舒服, 相當滿意, 美中不足係喺行佩納宮時嘅天氣太厚雲了!

上一篇: 一起葡過的假期~葡萄牙自駕遊 Day 2
下一篇: 一起葡過的假期~葡萄牙自駕遊 Day 4