2017年9月3日 星期日

【一起葡過的假期~葡萄牙自駕遊】Day1 里斯本耶穌像

一起葡過的假期~葡萄牙自駕遊  里斯本耶穌像

Day 1 - 6月7日  星期三  晴

行程: 里斯本 - Almada - Lagos  330km

住宿: Hotel Marina Rio (Standard Twin Room, 包早餐, 118.5歐, 不包泊車)

今晚搭廿三點夜機出發, 夠鐘放工就匆匆走人, 中途諗諗下都係要買個密碼鎖來鎖背囊, 先趕去買鎖, 返屋企梳洗後又趕巴士去機場, 然後再急急腳喺lounge食晚餐, 全程趕頭趕命。今次係第一次坐英航, 亦係叫做第一次喺倫敦駁機, 有啲擔心會有甩漏, 希望一切順利!
英航可以喺24小時前做網上check-in揀位, 今程航機係A380型號, 上層2-4-2排位而下層3-4-3排位, 所以揀咗上層窗邊位, 原來窗邊有個細柜, 成個背囊都放得落, 真係鄉下佬出城, 咁都玩一輪!
上餐前先派飲品, 揀汽水的話, 主動每人派兩罐, 唔似國泰孤孤寒寒, 另空姐見到香港客識得自動轉台, 唔似國泰咁係要講英語, 整體服務水準高過國泰
頭程有晚餐及早餐供應, 晚餐仲有支水跟, 幾好
十三小時後, 準時早上五點前抵達希斯路機場, 起初都擔心倫敦轉機會好麻煩, 仲要由Terminal 5轉去Terminal 3, 原來過程好方便快捷, 沿路指示清晰, 跟著紫色牌行去搭巴士, 全程在機場禁區內毋須出入境, 進入Terminal 3前要通過安驗, 唔駛廿分鐘就去到Terminal 3, 途中仲有時間睇日出
Terminal 3唔係好大, 裡面有免稅店及餐廳, 好快就行完一轉
等咗兩個鐘, 終於可以上機飛里斯本, 但最估唔到係呢程機連一水杯都無, 所有飲食都要自費, 唔係廉航都咁做, 相當離普!
準時約十點半到達里斯本, 首先去租車公司攞車, 入境後轉右向停車場方向行, 盡頭位置就係租車公司櫃台
今次喺Sixt租車, 經網上訂車, 毋須登記信用卡資料, 而機場店外亦設有自助取票機, 相比其他公司要排隊等候, 更為優勝。當日店內開盡六個櫃台, 不到五分鐘就可以辦理手續, 過程中店員不停游說升級車款及使用免滿油還車方案, 但都被我們一一婉拒及維持原訂選項, 不過在簽賬時發現價錢跟訂價不同時, 職員竟謊說因訂價未計入機場稅, 後來發現被加入Roadside Protection, 估唔到大行職員都有操守問題 !
辦好手續後, 就憑單據到隔離停車場大厦二樓的Sixt office, 領取車匙及取車
今次架車係日產Micra, 只係行咗千幾公里, 近乎全新, 旅程行駛了1722公里, 超過八成車程行高速收費公路, 高速費用合共105歐, 總油費為214歐, 折算約1.1港元公里, 以新款車計, 非常食油, 另八天車租連全保、各類保險及電子道路收費服務為484歐, 加埋停車場使費, 合共近八千港元, 總支出一啲都唔平! 另外Sixt會在信用卡先扣車租、300歐按金及75歐高速費用, 還車後, 再從信用卡收實際價錢
原訂計劃係盡快去三百公里外的Lagos, 但因為今朝未食早餐, 加上今日所有事情進展非常順利, 十一點半就可以出發, 所以决定先去Almada區醫肚, 進入里斯本時經過的水道古跡
由里斯本往南面走, 必須通過4月25大橋時, 橋上可以看到里斯本耶穌像, 結果老毛病發作忍唔住先去耶穌像一轉
隨便將車泊在紅磚建築物外的路邊, 穿過紅磚建築物才發現裡面有大量免費泊車位
穿過紅磚建築物就看到Santuário Nacional de Cristo Rei里斯本耶穌像
耶穌像坐落廣場中央位置, 廣場本身亦係個觀景台, 可以近距離觀看4月25大橋, 及對岸里斯本的景色
廣場上的藝術雕像
耶穌像入口, 售票處就在地下入口
每位5歐, 然後搭電梯上耶穌像觀景平台
平台好細, 正直正午時份, 太陽係正耶穌像上面
平台周圍有葡式瓷磚做裝飾
擁有更佳觀看4月25大橋的位置
遠望Almada區的碼頭
室內有紀念品店及小教堂
地下有空中十字架
耶穌像後門
耶穌像入口前的紅磚建築物
然後揸車到Cacilhas食午餐, 即係由Cais do Sodré坐渡輪到Almada區的碼頭, 先將車泊在電車站旁邊的收費停車場
今日午餐揀咗老店Restaurante Vale do Rio
Sangria係西班牙及葡萄牙常見的一款水果雞尾酒, 呢度有三款Sangria, 分別以白酒、紅酒及香檳所溝的Sangria, 揀咗用白酒所溝的Sangria de Vinho Branco, 10歐一瓶, 內有菠蘿、橙及薄荷葉, 豐富水果味加清新薄荷香, 可以話係夏日消暑飲品, 不但好飲, 顏色又靚
餐具除咗刀义外, 各人仲有一個法官鎚, 用來扑蟹殼之用
主菜點咗個Mixed Seafood 30歐, 有蝦、麵包蟹及蟹膏
除左麵包外, 仲有即焗豬仔飽多士一碟, 自動跟海鮮上, 2.5歐, 用來配蟹膏食, 而麵包就食一個收一個錢, 每個0.5歐, 另外侍應會上芝士橄欖, 如果唔食可以叫佢收返。呢餐味道只係一般, 蝦蟹太乾身, 只有蟹膏配多士好味啲, 食晒全部都幾滯
餐廳內有葡式瓷磚裝飾, 第一日見到, 所以感覺特別新奇, 畫作就係外面小鎮入口景觀
飯後在鎮內行下, 順便消消酒氣
再到碼頭及海邊行下
遠眺對岸Belem、Baixa及Alfama區
碼頭放左一艘古船
近三點先至出發去Lagos, 車程約三百公里, 大部時間在E1高速公路行駛, 全段公路非常沉悶, 無風景可言。今晚住宿的Hotel Marina Rio, 貪佢喺Lagos舊城附近, 方便食飯之餘, 夜上又可以行下舊城。酒店客房好似半翻新過, 算得上乾淨及光猛, 整體評分俾7, 不過價性比不高, 因為係全個Trip最貴嘅酒店
有個小露台
對著長途巴士站
酒店外觀, 酒店右邊有泊車位, 3歐可由早上泊到零晨十二點, 零晨至早上約九點免費
酒店對著避風港
安頓後已經下午六點, 先揸車去Farol da Ponta da Piedade燈塔, 呢度有步道可以沿著海岸線行下, 燈塔外邊有免費停車場
Ponta da Piedade一帶海岸景色, 風景都算OK, 呢度海岸線好似澳洲十二門徒石嘅景色, 但不及澳洲十二門徒石咁精彩
附近有不同boat trip遊覽海岸景色
有條長梯級路直落海邊
原來呢度叫Ponta Da Piedade
偶然會有快艇兜客遊覽附近海岸
直落海邊的梯級路
沿海一帶有大大小小的沙灘, 由燈塔至住宿的酒店有幾個較出名的沙灘, 揸車沿路往酒店方向走, 先經過Praia do Camilo, Praia是葡語沙灘的意思, 未到沙灘先見到O Camilo餐廳
要落一段長樓梯才能到達Praia do Camilo
中途已經可以看到整個沙灘, 沙灘面積好細, 一眼睇晒, 正在猶豫是否繼續, 同伴已經沖咗落去
近岸處的兩座大石
落得輕鬆, 回程就要還, 行到氣咳
直到呢刻所見到嘅景色都唔覺好突出, 風景只算OK, 心諗特登改行程來Lagos, 會唔會做錯? 加上太遲來到, 錯過最佳時間, 光線反差太大, 影相又唔靚, 如果跟原計劃先來Lagos就啱啱好, 真係好後悔。行完Praia do Camilo之後就直接返去Lagos舊城行下, 位於舊城內的Igreja de Santo António教堂
城內有零星紫花樹, 幾靚
行到九點先開始日落, 又去埋對面沙灘及城堡望下, Forte da Ponta da Bandeira
Praia da Batata
圖中紅頂建築物就係啱啱去過嘅燈塔及步道, 呢道有獨木舟及boat trip可以參加
Castelo de Lagos
舊城內隨影
今晚無特定目標餐廳, 所以邊行邊搵, 來在呢間睇餐牌時, 有個正在用餐的亞洲女仔向我豎起母指示意好食, 見都幾多人, 又有單人份量嘅Cataplana, Lagos傳統食品類似蕃茄薯仔魚湯, 咁就揀佢Restaurante Marisqueira
餐飲揀用紅酒溝嘅Sangria, 12.9歐一瓶, 相比之下, 下午飲嗰個Sangria好好多
Cataplana, 14.8歐, 啲魚係普通貨式, 味道差過自己煮嘅蕃茄薯仔魚湯
吞拿魚扒Tuna Fish Algarvia style, 11.90歐, 呢餐都係好普通
再周圍行下影下, 返到酒店已經差不多十一點了

上一篇: 一起葡過的假期~葡萄牙自駕遊 行程篇
下一篇: 一起葡過的假期~葡萄牙自駕遊 Day 2

20 則留言:

  1. 國泰既空中服務員表現,跟英航無得比較。國泰實在太差喇。尤其是佢地對一啲唔識英文英語既乘客,一開口都係講英語,最憎佢地係咁。

    回覆刪除
    回覆
    1. "無得比較, 因為實在太差", 真係講好啱 ! 但我覺得國泰o既空中服務員係知, 但唔改, 非常變態!!

      刪除
    2. 蝦自己人,仲要係老弱唔識英文既人,又覺得自己高人一等,咁既心態,最唔要得。

      刪除
  2. 你好呀,請問葡萄牙租車既話有乜要注意,同埋高速收費係點計?

    回覆刪除
    回覆
    1. 其實同一般歐洲租車沒有大分別, 我們為安全起見, 都會買全保. 全程行了1700公里, 大部是高速公路, 收了105歐

      刪除
    2. 哈, 謝回覆, 今次係我第一次係歐洲自駕, 我用SKYSCANNER搵出租車, 你有無邊個租車網站推介? 我睇一D介紹話葡萄牙有兩套高速收費既SYSTEM, 如果唔買係咪都有人手收費站? 我暫時打算由LISBOA自駕上PORTO,直接係PORTO還車。

      刪除
    3. 網誌管理員已經移除這則留言。

      刪除
    4. 我多數用rentalcars格價, 然後直接到租車公司官網訂車, 因為經租車agent多數要自己settle保險賠償問題, 再去claim錢, 直接在租車公司買保險, 簡單方便, 不過貴啲!
      好似係有兩套收費系統, 因為部分收費過左兩星期先收錢, 但Auto Toll都適用! 當時所見所出口都有人手收費站。
      暫時打算由LISBOA自駕上PORTO,直接係PORTO還車 - 正確選擇, 另外喺Sixt租五日或以上, 可免括免異地還車費用, 當時我都諗過Porto還車, 然後坐車返Lisbon !

      刪除
    5. 多謝您既回覆😀,買保險我見好多都有3個options,全包,包部分同唔包。有d額外choice,例如車胎之類,有個叫additional driver, 我係2個人輪流渣,係咪要除左我之外,渣車既旅伴都要買一份全包車險,定只買人頭?好羡慕你渣車自由行,希望今次開始之後日後我都可以“駕世遊✌”

      刪除
    6. 一般保險會包第三保, 即係對第三者人身傷亡及財物損毀的法律責任, 我估即係你所講嘅"唔包"。
      一般保險只包一個指定driver, 非指定人揸而出事保險唔包, 分分鐘賠死, 例如代客泊車出事 ! 如果兩個人都揸就要買additional driver, 乘客係包在保險內, 毋須跟人頭買。
      通常我會買zero excess reduction (i.e. 全包), 有乜事都唔駛俾錢。另外歐洲仲有其它全保唔包嘅項目, 例如偷車、車胎、車窗等等, 呢啲options可以加錢買埋。一般我都會買埋, 令支出封頂, 有限錢, 好過出事俾錢。

      刪除
    7. 即係有ZERO EXCESS = 0% 戈個OPTION就係HI野既話全部保險賠晒~ICIC. 想再請教一下, 導航向租車公司租好, 定買張數據咭靠GOOGLE MAP好?導航向車公司租好貴 =_= , 但GOOGLE MAP又怕數據跟唔上。

      刪除
    8. zero excess reduction即係香港叫零墊底費, 所有HI野又係全保嘅範圍都唔駛俾錢, 但要報警落案及即時上報租車公司。另外, 最值得買嘅option係偷車保。個人認為第一次租車, 買全保再加有用options, 最穩陣!
      導航一定係GOOGLE MAP加sim card, 十歐攪掂, 我都係用手機Google map。好過租gps, 又貴, 上車落車又要收起, 麻煩, 又怕吸引賊佬, 太多缺點!

      刪除
    9. 我都係用google map架,慳返同租車公司租GPS既錢嚟買附加保險好過啦!

      刪除
    10. 好彩我無衝動,咁要預備個電話支架至得。我呢2日上sixt搵車款,最平auto係大眾,日租460hkd左右,最平係佢啦~無其他車款。3個26吋喼勉強放得落,好彩,另外兩個旅伴都瘦瘦的。

      刪除
  3. 在歐洲自駕,我都係經rentalcar,不過係直接在rentalcat租車。但additional 保險就唔在網上租車時買,係去到租車公司辦手續攞車時先至買。

    回覆刪除
    回覆
    1. 請教買保險戈陣有咩要注意?

      刪除
    2. 如果訂車時有得揀zero excess reduction, 我會訂埋, 冇就到時再問! 其他就由1733補充, 呢範佢好熟! 哈哈 Thank You !

      刪除
  4. 我都係會買埋0墊底架,買左迷當份附加保險係租車費用既一部份,輕輕鬆鬆開車,無咁多壓力嘛。

    我點夠你熟呀,我來來去去都是玩嗰幾個地方咋。

    回覆刪除
    回覆
    1. 哦, 我似為你多數買basic保險, 諗著可以share下啲經驗及注意事項添!

      刪除
    2. 唔會喇,畀多少少錢,減低開車時既壓力,咁仲會增加旅遊既樂趣架。
      唔係話買左附加保險就會亂嚟,我一定唔會。但大吉利士,都唔洗擔心錢既問題。

      刪除