【日本関西自駕遊】Day5 京都楓景

日本関西自駕遊  Day5 京都楓景

Day 5 - 11月23日  星期三  多雲

行程: 大阪北浜 - 嵐山 - 天龍寺 - 嵐山竹林 - 北野天滿宮 - 京都 - 大阪北浜

住宿: ホテルブライトンシティ大阪北浜 (素泊, 14620円)

今次旅行安排咗兩日去京都睇楓景, 第一日先去嵐山嵯峨野一帶, 往來大阪京都兩地有好多交通方法, 由北浜區出發的話, 可以乘搭京阪電鐡的京阪本線, 由總站淀屋橋駅到京都的祇園四條駅, 然後轉乘阪急京都線, 由河原町駅到嵐山駅, 所以抵達大阪當天已買定京阪電鐡兩天乘車券, 在有效期內任何兩天可以無限次乘搭京阪電車

七點前由酒店出發, 行去京阪本線總站淀屋橋駅, 總站可以保證有位坐, 約一小時車程就到達京都的祇園四條駅, 係車站買了熱咖啡才上車

在祇園四條駅出閘後, 要行幾分鐘路去阪急京都線的河原町駅, 轉乘阪急京都線到嵐山駅, 呢程每位要220円, 廿分鐘車程

充滿懷舊風設計的嵐山駅

到達嵐山駅已有不少遊客

行出嵐山駅後, 立即覺得唔妥, 點解咁寒, 雖然著咗件薄羽絨, 但係都凍到震, 相比前幾日, 溫度跟香港差唔多, 都係著件Tee, 最多加件薄外套就好夠, 咁樣點捱成日呀, 大件事!

渡月橋及周邊景色

過了渡月橋後, 行入大街, 就見到金奬可樂餅店, 今朝未食早餐, 即刻買個可樂餅食, 原味150円及咖哩味200円

金奬可樂餅店對面係嵐山電鐡四条大宮站

站內的收費足湯

站外面有人氣店ARINCO KYO ROLL アリンコ, 提早食個綠茶甜點, 350円

紅葉第一站天龍寺

寺內的寶嚴院, 入場費每位500円, 今日紅葉狀況係見頃, 可惜天色差, 又凍又著唔夠衫, 行入裡面, 仲人頭湧湧, 當堂無晒心情欣賞紅葉及影相

行完天龍寺, 路過嵐山うどん, 門外已有人在排隊等十一點開門, 睇落可以首輪入去就跟排, 趁機入去暖下, 等咗十分鐘就可以入去

嵐山うどん係嵐山著名烏冬店, 點了兩款烏冬, 有鴨肉烏冬

牛肉烏冬, 合共1980円

食完烏冬, 條街仲多咗人, 周圍都水洩不通

跟著行去嵐山竹林小徑

又係人迫人, 完全係排著隊行, 想人景合照都相當困難

行到竹林盡頭就到嵐山小火車站, 呢個時侯開始有返陽光

小火車トロッコ嵐山駅

呢架觀光小火車好爆, 要坐就必須提早網上買票, 或者早上排隊買當日嘅walk in票

跟著行去紅葉第二站常寂光寺, 入場費每位400円

繼續係人頭湧湧, 不過有太陽無咁凍, 紅葉都靚啲

行到半山嘅景色

行完常寂光寺, 到清京寺附近嘅おきな豆腐店開餐

おきな豆腐係出發前睇到蘋果日報介紹的, 差不多兩點到達, 唔使等就有位了

店內嘅食客主要係日本人, 多數點湯とうふ定食, 我地就點了一個湯とうふ定食及一個鰻魚定食, 不過大嬏說鰻魚係即劏即煮, 要等30分鐘, 食店嘅餐牌, 價格還未包稅

湯とうふ定食, 定食跟天婦羅、味噌茄子、類似琵琶豆腐, 湯及果子

主菜嘅豆腐湯, 一人份有兩磚豆腐

鰻魚定食

果子係半個心形柿, 好甜好味, 呢餐食得好清淡, 味道都唔錯

食店對面係另一間豆腐舖-嵯峨豆腐森嘉, 由食午飯前到午飯後一直都十幾廿人排隊, 店外充滿豆香味, 所以食完午餐, 都再去豆腐舖跟排買啲來食下

店外有齊各款豆腐食品樣本, 排隊時已經不斷諗食邊款, 又諗下會唔會剛才嘅餐都係由佢供應豆腐

原來即買即食只有兩款, 類似琵琶豆腐嗰件跟剛才食過的味道完全一樣, 所以應該係佢供應的, 另一款炸豆皮, 油到不得了, No Good, 兩款合共443円

附近有清凉寺嵯峨釋迦堂

嵯峨野周邊案內圖

沿途隨影

之後返回嵐山大街行下, 見古都芋本舖好多人排隊買團子

跟隊買份紅豆團子, 180円

嵯峨とうふ稲門口又有人排隊, 再跟!

有雪糕及湯皮湯買

凍凍地, 飲返個湯皮湯, 300円

嵐山站前

跟著搭嵐電到北野白梅町駅, 每人210円

再行十分鐘路到今日紅葉第三站北野天滿宮

寺內免費參觀

但別苑要收入場費, 每位700円

別苑內隨影, 裡面都有唔少遊人

影返個天滿宮寶號, 提醒自己去過嘅地方

稻荷社、一之保社、一夜松社

鶯橋

參觀後, 在出口處的茶室梅交軒憑票尾可免費品茶及食甜點, 一杯到肚成個人暖返晒 !

之後直接坐巴士到京都河原町附近, 每人230円, 行去先斗町勝牛本店食飯

職員叫我們到前面公園排隊等候, 其實都不太明, 不過照行去睇下, 搵咗一陣, 先發現原來叫我們在公園前的欄杆到等, 未食飯先食西北風, 有位時會有職員來帶位

勝牛係杜如風嘅関西攻略所介紹的吉列牛扒店

點咗兩款牛扒, みぞれ牛ロースカツ膳, 1782円

牛ロースカツ京玉膳, 1490円, 有啲驚喜, 比預期好味, 可以一試

先斗町入口, 行返去京阪電鐡嘅祇園四條站搭車返北浜, 不過無諗到九點幾十點都咁多人, 完全無位座, 好好彩過咗一個站, 我們企正個位有兩個人落車, 可以有位坐, 否則就要罰企五十分鐘

上一篇: 日本関西自駕遊 Day 4
下一篇: 日本関西自駕遊 Day 6