駕世遊: 【怡保檳城為食自駕遊】Day3 寶盛園榴槤

怡保檳城自駕遊寶盛園榴槤

Day 3 - 6月8日星期一間中大雨

行程: 喬治城 - 浮羅山背 - 升旗山 - 峇都丁宜濱海區 76km

住宿: Golden Sands Resort by Shangri-La (Deluxe Double, 連稅636馬幣)

旅程第三日係最期待嘅日子, 幾乎所有行程都係為食而行, 當中最期待就係到榴槤果園寶盛園食當日的新鮮榴槤, 以及近年受各大吹水食家追捧的河魚王忘不了魚

旅行嘅每一日, 幾乎都係天未光就開始準備, 外面剛開始日出, 房外景色

客房景觀, 對著檳城最高大廈Komtar, 而周邊大部份都係兩、三層高嘅舊民房

約七點鐘就要退房出發喇, Reception嘅女職員個個都晒載白色假髮, 以及木口木面

首先去食早餐, 目的地係台灣節目詹詹自喜遊介紹嘅福建麵, 據聞有檳城最好味嘅福建麵, 間舖無招牌, 地址是Jalan Perak 126, 離酒店約1.5公里, 七點半去到都未開舖, 門口有十個、八個車位, 揸車來都方便, 舖頭外邊已經坐咗一男一女, 原來就係福建麵檔嘅老闆夫婦, 約八點舖頭開門, 麵檔老闆娘就揮手, 示意我們入去, 做了今日第一個客, 原來裡面又係一舖數檔格局, 福建麵只係其中一個檔口

舖頭開門後, 老闆夫婦立即開始準備, 相信湯底已做好, 只待煮滾

呢個檔口, 只賣福建麵, 獨沽一味, 每碗5元, 十分鐘後第一碗麵送上, 湯底好濃郁蝦味, 混合了兩種麵底, 米粉及油麵, 材料都唔少, 有蝦仁及肉片, 如果成羹辣醬撈晒, 會太辣, 一半就夠, 我就食咗差唔多兩碗, 連湯底都飲晒, 非常好味, 呢個麵係全個旅程中排第二好味, 值得去食, 但係一定要早, 因為賣完即止

走嘅時候, 麵檔已經有好多食客

麵檔位置

在檳城泊車, 要用parking coupon俾錢, 一般便利店有售, 今日係平日, 泊車要錢, 所以先去便利店買parking coupon, 買了一疊十張的半小時parking coupon, , 共4元, 即係每半小時4毫

然後繼續昨天未完的壁畫路線, 先是位置Q的Children Playing Basketball

位置R的Brother and Sister on a Swing

附近的壁畫作品

位置E的Trishaw Man

其他作品

往功夫少女壁畫時, 經過天后廟, 附近有不少精品酒店

位置D的Kungfu Girl

時間尚早, 把車泊到近位置O的Lebuh Cannon街, 附近集中了很多的壁畫, 方便行喬治城, 又可重看街頭壁畫

位置N的Lion Dance, 旁邊有間舖頭, 有很多壁畫的產品, 質數都唔錯, 好啱做手信

所有檳城、怡保壁畫的名信片及磁貼都有齊

位置C的Boy on Chair

位置O的Magic

位置N的Lion Dance

位置F的Cultural Girls及其附近的作品

位置I的No Animal Discrimination Please

位置A, 聚集最多遊客的Kids on Bicycle

位置M的Cats and Humans Happily Living Together

位置B的Old Motorcycle及其附近的作品

位置J的Bruce Lee

及其附近的作品

位置H的Skippy

位置L的Love Me Like Your Fortune Cat

跟住食返2杯椰子雪糕及椰青, 雪糕每杯6元, 椰青7元

然後出發前往位於浮羅山背(Balik Pulau)的寶盛園, 嘆最期待的新鮮榴槤, 除咗食之外, 寶盛園仲有得住, 本來好想住返一晚, 方便食多幾次榴槤, 朝早都可以食到最新鮮嘅樹上熟榴槤, 不過旺季日日都爆晒, 所以無得住

入門口條大斜路已經見到幾棵好高嘅榴槤樹, 亦係生平第一次見到榴槤樹, 樹下面置有繩網, 用來接住熟咗跌落來嘅榴槤, 以及防止路人中頭獎

約十二點到達, 已經有好多人食梗榴槤

果園內的榴槤樹

可以選擇食任食榴槤, 每人75元起, 或者單買

我地驚食唔到咁多, 所以叫姐仔介紹兩款當造榴槤俾我地, 之後做part-time嘅鬼仔就幫我地開榴槤

第一個係坤寶, 果肉帶紅, 味道清甜中帶點甘, 肉質順滑, 非常好味, 食晒成個都唔覺滯, 極品, 非常大滿足, 可惜鬼仔開到個榴槤好樣衰

第二個係D24, 味道較甜, 肉厚順滑, 一樣好味, 不過比較鍾意坤寶, 兩個榴槤共110元, 兩個榴槤食晒都唔覺滯, 枱上仲有半個任食團的榴槤, 俾我跟手免費殺埋, 都仲未全飽, 另外, 寶盛園榴槤係全個旅程最好味嘅食物, 真係不負所望

中途, 雨越落越大, 想周圍行下都唔得

呢兩間係寶盛園裡面嘅普通客房, 只須180元一晚

趁雨稍為細返啲立即揸車走人, 去下個地方再食, 在離開的路上, 這時才留意到浮羅山背沿路一帶有好多榴槤樹, 間中仲見到有榴槤跌到馬路中, 返去市中心時, 經過的觀景台, 有榴槤樹及榴槤檔

繼續去食嘅係亞參叻沙, 舖名叫Pasar Air Itam Laksa, 地址是11500 Air Itam, Jalan Pasar, 差不多兩點, 檔口周圍都仲係人, 兜咗一陣, 在附近搵到個私人爛地停車位, 收費五元, 行返去叻沙檔, 啱啱見到個檔側邊有位, 即刻沖去坐底, 睇住兩位主廚, 一老一嫩, 兩人完全做唔停手, 每十秒、八秒就出一碗, 跟住就有人送走

叻沙檔的格局, 其實係街邊檔, 沿住牆邊擺滿枱, 直到盡頭, 我呢邊只有兩張枱

佢個嘜頭

一碗碗嘅叻沙, 除咗送去自己嘅枱, 仲送去對面嘅排檔, 睇住一碗一碗咁出唔停, 都未到我地, 諗住坐正老闆側邊會快啲, 點知都要等20分鐘, 仲焗到成身叻沙味添, 4.5元一碗的亞參叻沙, 湯頭好鮮甜好濃, 混合大量爽口蔬果, 香料味不太重, 比較平均, 好過愉園茶室多多聲, 我唔太鐘意亞參嗰種香料都覺得唔錯, 值得一試

靠到好碼頭的鮮窄庶汁檔, 每杯2元, 基本上食叻沙嘅人, 都會幫襯買杯飲品

下一站係檳城升旗山(Bukit Bendera), 入口側邊有多層收費停車場, 2小時4元

來回纜車票30元, 呢站好嘥時間, 好辛苦, 排足一個鐘先上到纜車, 如果早知等咁耐, 一定走人

升旗山地圖

山頂觀景

仲有蜘蛛俠

停咗唔夠15分鐘就走人, 因為落山又要排隊, 纜車控制台

怱怱一遊後, 又繼續前往峇都丁宜區(Batu Feringgi), 今晚住的金沙酒店

預期一樣, 酒店頗為殘舊, 客房質數只屬一般, 完全唔值呢個價錢

好在露台的觀景非常開揚

酒店環境

酒店對出的沙灘有各種收費活動, 而環境都幾普通

六點後, 沿著沙灘馬路邊的攤檔, 陸陸續續開始開檔, 都算熱鬧, 當中又有大排檔

食返隻燒鷄翼, 2.2元一隻

順便行去巡下食晚飯嘅Golden Thai Seafood Village

有唔少生猛海鮮, 不過全部都係劏客價

巨型冰鮮虎蝦

目標物係河魚王忘不了魚, 每100克乸脷價58.8元, 佢查實係鯉魚的一種, 來自馬來西亞的野生河魚, 生長於急流河域, 當地人叫佢Empurau, 據聞此魚肉質鮮美, 滑嫩香甜, 入口即溶, 魚唇和魚翼是忘不了魚最肥美的位置, 食到的油香, 令人一試難忘, 係咪咁誇, 今晚試過就知, 順便跟亞姐訂張海景枱, 先去行街, 今晚八點入席