【挪威芬蘭極光之旅】Day3 挪威極光之旅 Arctic Fishing Adventures極光團

挪威極光之旅  看不見的極光

Day 3 - 2月24日  星期一  雨
極光指數 - 3 (Moderate)

行程: Tromso市內觀光 - Arctic Fishing Adventures極光團
住宿: Rica Ishavshotel (1845克朗, 包早餐, 免費wifi)

繼昨晚的極光團之後, 今晚將會參加另一間公司Arctic Fishing Adventures的小巴極光團, 內心不斷期求一定要有極光, 不要再食白果喇!

今早除了要轉去附近的Rica Ishavshotel, 亦為了每天的主糧早餐, 所以就算極之不願, 亦要起身食早餐, 之後留到last minute才退房, 轉去距離只有兩、三分鐘路程的Rica Ishavshotel, 酒店正進行維修翻新, 正面點睇都唔似酒店, 以藍色貨櫃作入口, 有冇咁離譜!?

原來不只外部裝修, 內部亦一樣, 用間無乜裝修的大hall做櫃檯, 不過可以立刻check in入房, 櫃檯已經算企理, 上客房條路更離譜, 先要搭貨𨋢到二樓再轉客𨋢, 穿過櫃檯後, 沿路都被木板圍住, 條路又爛, 一樓及二樓係地盤, 而餐廳就在一樓, 用間function room頂檔, 認真過份!

總算客房樓層沒有裝修工程, 房間內觀

雖然不是對正大橋一面, 但景觀還算開揚, 對著碼頭沿岸一帶

今早天氣不太好, 落著毛毛細雨, 只好到商店街(Storgate)及超市逛逛 

Storgate

市內餐廳的主菜, 一般約250克朗起

Tromso有幾間全球最北的連鎖店, 有無印良品

還有Burger King, 但一個最便宜的Burger餐, 由一百零幾克朗起, 可以慳返

路邊小教堂

高處有座搶眼的建築物, 上去看看, 順便睇下個半山景

可惜個景不好

到超市看看物價

蔬果價格, 相對便宜

肉類價格亦不算貴, 三文魚扒比香港買的還貴些少, 如果住民宿自己煮飯, 一定會擦返餐挪威三文魚, 食方面亦可以慳返些少, 不過點都唔夠而家食麵咁慳

500ml樽裝啤酒約30克朗, 好貴! 而一罐可樂, 印像中約20港元, 太貴太唔值!

再去Arctic Guide Service查詢大巴團的資料, 辨公室位於Radisson Blu Hotel後面, 職員非常好人, 解釋及告訴我們相關詳情, 他們會根據天氣狀況及極光預測指數, 從而估計當天的機會率, 由客人自行判斷參加與否, 只要在每天五點半前報團, 就保證有位, 因為我們是詢問明天的團, 所以建議明天五點半前再來查詢及決定

之後再去遊客中搵下其他大巴團的資料, 無意中看見昨晚所食的維生食品, 當然把握機會影底食過的兩款味道, 原來每包售價要89克朗

是日晚餐為褔麵、午餐肉及當地出產的啤酒

可惜越接近集合時間, 天氣就越差, 所以出發前已經打定輸數了

今晚的小巴團是Arctic Fishing Adventures, 沒有接送服務, 六點半在Radisson Blu Hotel集合, 位置在Rica Ishavshotel的對面, 為免要分開坐, 提早到集合地點等候

今晚全車滿坐, 有十五位團友, 一名司機及導遊阿Mark, 共十七人, 人齊後立即開車, 阿Mark會先講下今晚的天氣及路線, 而禦寒裝備有Overall(夾乸衣), 已放在車尾, 供需要者使用, 接著播放小電影介紹極光的天文現象

根據阿Mark所講, 今晚的路線會沿南而下, 尋找合適地點等候極光, 直至芬蘭邊境, 吓! 又去芬蘭邊境, 我哋專登將芬蘭行程加入挪威Tromso, 係貪呢邊嘅景色有山有海, 影出來嘅極光更靚, 又可以與芬蘭有分別, 如果係咁我哋就不需要來挪威Tromso啦! 中途會有個休息站上洗手間, 約一小時的車程, 阿Mark叫我們先休息一下, 呢一刻真係好擔心又會行返昨晚的相同路線, 經歷相同過程, 再一次飽受相同的折磨及催殘, 真係好驚! 點算好呀!? 

果然中途休息站是昨天的油站, 幸好不同的是頭頂上多了片星空, 意味著看極光的主要條件已經存在, 人多上厠時間自然長, 一個厠格十多人使用, 結果浪費了近半小時, 再次出發後不久, 終於到了第一個合適地點, 竟然是個路邊停車場, 而且地上結了冰, 跣到飛起, 有了昨日的經驗, 今次唔理三七廿一, 立刻跣去邊位, 快速地架起腳架影相, 這時雙眼完全看不見天上有任何極光的蹤影, 但相機卻拍到了淡綠色的極光, 呢一刻極之迷惘, 老遠走來睇的極光就係咁樣? 乜極光唔係幻彩詠香港嘅加強版咩? 這種肉眼看不到的極光和期待的絕對不同, 但這時亦不能多想, 只好繼續無奈地以機械動作不停影相

不到十分鐘時間, 雲層中的缺口亦漸漸消失了

繼續出發到芬蘭邊境, 此時肯定了路線與昨日相同, 但分別在於昨天因天氣關係而中途折返, 到達後再要行約五分鐘的路程, 這裡比剛才的停車場偏僻, 光害亦較小, 地理環境更適合等候極光, 第一幅相已經影到了淡綠色的極光, 但肉眼依舊看不見任何極光蹤影, 所以只好繼續周圍亂影, 盡可能找尋較多極光的方位

Canon相機所影的相片

當大家各自散去搵地盤等極光時, 阿Mark和司機就去堆營火, 中段時間就叫大家到營火旁集合, 回氣取暖及開餐

食物是預先煮好及存放在保溫壼的茄汁薯仔雜肉, 賣相及味道都比昨天的維生食品好好多, 最重要是食物夠熱, 而且大家圍在營火一起進食, 更有氣氛

之後再繼續等候極光, 今晚芬蘭邊境的天氣都不算差, 雲層時多時少

雖然天色越夜越清, 但極光始終沒有公開露面, 而相機所影到的綠光亦越來越淡

後段時間, 天空已經變成高清, 但始終無緣看到真正的極光, 最終亦要失落地離開, 雖然如此, 但比起昨晚, 情況已經很好, 總算有實際行動及等候極光機會, 不用困在車內, 回程時間約三小時, 到達酒店已經三點多了

在挪威已經三晚了, 但心情就每況愈下, 今日嘅打擊亦係最多, 原本預期今日有靚酒店住, 但現實係爛酒店一間, 原本期望嘅極光係好璀璨, 實際係國王的極光, 用肉眼係睇唔到, 要靠相片加幻想, 原本天氣好差等到一片星空, 但極光就係唔肯露面, 從未試過去旅行去到個人咁"頹", 但好在阿Mark最後的話說, 對大家非常抱歉今晚未能看到極光, 總算令我們對極光挽回些少期望, 而家只係剩底最後一次機會, 食粥食飯就睇明晚, 希望唔好再咁黑仔啦!

Arctic Fishing Adventures極光團的補充資料:
1. 基本: 費用1550克朗, 約9小時, 沒有接送服務
2. 裝備: Overall(夾乸衣), 好隨意放在車尾, 開餐時又會用來做坐墊, 感覺不太清潔, 幸好當晚不凍, 毋須穿著
3. 膳食: 預先煮好及存放在保溫壼的茄汁薯仔雜肉之類, 味道不錯, 最重要夠熱, 而且又會堆營火取暖
4. 流程: Radisson Blu Hotel集合~尋找合適地點~去程洗手間~尋找合適地點~開餐~回程洗手間~Radisson Blu Hotel解散
5. 感受及評語
- 價錢很貴, 但既然為極光而來, 所以點都要報過熱門小巴團試下, 免得日後後悔
- 導遊阿Mark都幾cool, 不會主動去social, 說話很少, 只在開場講下天氣行程路線等等及埋尾說話, 等極光時, 會周圍巡下及問下團友有無問題, 開餐時又會安排坐位, 舖夾乸衣比團友坐, 整體上招呼算周到, 少說話多做事嗰類, 唔會覺得佢寸, 感覺上幾專業
- 無諗過會去到芬蘭邊境咁遠, 一直疑為只會在Tromso附近峽彎一帶追光, 可能因天氣情況, 才會駛去芬蘭邊境, 所以車程非常之長, 扣除車程及二次洗手間時候, 實際等極光時間少過兩小時, 如果天氣好而行走路線又在Tromso一帶的話, 相信應該有更多時間等極光
- 追光方法及路線, 唔覺有任何儀器或技術協助, 估計出發前已經因應天氣選定行走路線
- 人數較多, 影相時間中會被閃光燈影響或會有人在鏡頭行過
- 車廂座位是三個團之中最狹窄
- 兩間小巴團, 個人認為Arctic Fishing Adventures較好

上一篇: 挪威芬蘭極光之旅 Day2
下一篇: 挪威芬蘭極光之旅 Day4