2014年5月1日 星期四

【挪威芬蘭極光之旅】預備篇

Photo from Arctic Guide Service on 2014-Feb-01

挪威芬蘭極光之旅 預備篇

見到咁靚嘅極光相, 就好想去睇下, 所以一直都心思思想搞次極光之旅, 而近年又不斷見到好多Blogger睇到極光, 成功率好似幾高, 啲極光相仲一個靚過一個, 再加上近年又是每十一年的極光循環高峰期, 所以希望趁高峰期尾水, 快快趣趣趕上睇極光的尾班車, 安排一趟極光之旅, 首先要搞清以下問題


到那裡看極光?
較為熱門睇極光地方有芬蘭北部, 北挪威, 冰島及加拿大黃刀鎮等等, 去黃刀鎮啲機票又貴又煩, 冰島就去過無耐, 而挪威就洗費好似幾貴, 所以最初只考慮芬蘭, 萬一睇唔到極光, 都仲可以玩雪狗拉車, 睇馴鹿, 參觀聖誕老人村及坐破冰船等等行程, 點知一開始在Inari訂房就有阻滯, 要用八日年假先遷就到, 所以索性用十日年假, 玩足兩星期, 而為求睇到極光, 行程還加入北挪威有「極光之城」美譽的Tromso, 當中計劃在Tromso住四天及芬蘭北部的Ivalo一帶又住四天, 一於用足八晚去望天打卦, 務求可以一擊即中, 如果可以睇到幾晚極光就更加Perfect!

看極光的最佳期間?
關於睇極光一直都有兩個疑問, 邊個月份好? 極光會否受月亮的光芒影響或遮蓋?

由於北半球由9月開始至3月, 日照時間較短, 所以這段期間是看極光的好時機, 據聞當中以9-10月和2-3月更是最佳月份, 因深秋及初春時份, 雨水較少, 天清日子一般較多

至於月光會否影響觀看極光, 網上有兩個主流觀點, 第一個是如果在沒有月亮的日子, 當極光很微弱也有機會看到, 所以建議應在新月(初一)日子附近, 另一個是無須理會有沒有月亮的日子, 如果是想影極光的話, 有月亮的日子會更好, 因月光可令周圍景物更清晰, 最好就梗係睇到加影到靚相, 由於今次目標是要睇極光, 以穩陣為原則, 所以鎖定沒有月亮的新月日子, 約初一的前後兩星期, 綜合以上的因素, 決定行程在2月尾新月期間的日子

航機問題
由於行程以芬蘭為主, 所以會以芬蘭首都赫爾辛基為中心點分三部分:

1. 香港至赫爾辛基
a. Finnair芬蘭航空
直航的話, 似乎只有Finnair, 零晨機去夜機返, 航班時間好, 機票價錢亦算合理, 在11月初, 即出發前3個多月, 網上票價連稅約8000

注意事項:
i) Finnair揀位要額外收費, 每程每位收215港元, 買機票時, 多手揀埋位, 結果多付860港元
ii) 另外, 如果加多一程內陸機(例如Ivalo)或一程到挪威機票(例如Oslo或Tromso), 用Multi-destination買, 價錢更抵, 最便宜只須加約400港元起

2. 赫爾辛基至Tromso

a) Finnair航空
直航機, 機程約2時, 不過班次疏落, 只有一、三、五一班夜機, 如果行程是在星期一、三、五由香港出發, 用Multi-destination買機票, 絕對是個好選擇, 價錢好, 中間一整天的空檔時間又可先到赫爾辛基觀光, 這個選舉雖然方便, 因未能配合去程的日子, 加上晚上才到達Tromso的話, 會浪費當晚睇極光的機會, 所以當時不作考慮

b) SAS航空Norwegian航空
另外選擇有SAS航空及Norwegian航空, 但需經挪威奧斯陸轉機到Tromso, 或經丹麥哥本哈根轉到挪威奧斯陸再轉機到Tromso, 一般價錢約2500港元, SAS航空的價錢較Norwegian航空便宜少許, 航班每天有數班次, 所以容易配合去程日子及時間, 又能於當天下午到達Tromso

在11月初計劃行程時, 剛看到SAS航空做優惠, 由赫爾辛基至奧斯陸約500多港元, 而由奧斯陸至Tromso約700多港元, 非常抵, 所以當時已經決定用混合方式購買機票:
由赫爾辛基至奧斯陸: Finnair, 用Multi-destination買, 08:30-09:00, 約加400港元
由奧斯陸至Tromso: SAS航空, 13:55-15:45, 約680港元

注意事項:
往來赫爾辛基及奧斯陸的航班, 星期六的班次特別疏落, 其次是星期日, 星期一至五的班次最頻密

3. Tromso至Ivalo
沒有直航, 只研究經赫爾辛基轉機的選項, 如上, 由Tromso經奧斯陸至赫爾辛基, 可以先選乘SAS或Norwegian, 而由赫爾辛基至Ivalo, 可選乘:
a) Norwegian航空
每星期三班, 星期二、四及日, 08:35 - 10:15, 單程價錢約50歐元起, 間中有優惠, 見過最便宜是25歐元
b) Finnair航空
每天兩班, 購價變化很大, 正價要300歐元以上

後來發現Finnair有更好選擇, 由Tromso經赫爾辛基到Ivalo的單程票, 星期一、三、五有機, 不過轉機時間要等10小時, 但價錢只是1000-1200挪威克朗 (約1600港元), 所以由Tromso至Ivalo, 亦選定這個航線

就以上的喜好選擇, 計一計, 六程機, 每人約10700港元, 價錢幾好, 假設當中700港元是由赫爾辛基至Ivalo的機票錢, 每人只係多付2000港元就可以去埋Tromso, 抵, 所以飛行路線就一錘定音!

今次由Inari訂房遇上阻滯, 到第二日已經决定更改行程, 加入Tromso, 計劃及定好飛行路線, 非常有效率, 但係就等到第三晚先出手買Finnair機票, 點知機票價錢又出現調整:
去程: 香港經赫爾辛基至奧斯陸 
回程: 赫爾辛基至香港 
由8400港元增加至9900港元

為免夜長夢多, 所以改變計劃, 立即改買Finnair香港至赫爾辛基來回機票, 點知又衰多手, 揀埋座位, 結果變成每位8500港元, 以及Finnair由Tromso經赫爾辛基至Ivalo單程機票, 每位約1600港元

跟著就當然係買埋由赫爾辛基經奧斯陸至Tromso, 點知價錢不但貴了, 連早上航班也消失了, 等了幾天情況依舊, 只好改買較差的航班:
SAS由赫爾辛基經哥本哈根至奧斯陸, 10:40-11:20, 13:25-14:35, 每位約1200港元
SAS由奧斯陸至Tromso, 19:00-20:50, 每位約1200港元

結果每人機票錢由預算10700港元增加至12500港元, 事後當然繼續關注Finnair機票價格變動, 在11月尾竟然回復至原來的8400港元, 而聖誕過後更跌至7600港元的低位, 機票錢貴了也算, 最在意是航班又差又轉接, 到步時間又遲了5個多小時, 白白浪漫首晚參加追光團的機會, 非常後悔, 事後檢討, 應該"停一停, 再諗一諗", 時間唔啱就唔應該買, 應改為提早一天出發更好, 全程搭Finnair, 每位不到一萬元, 平而直接, 至今仍然非常後悔......

芬蘭交通
由於今次旅行不是自駕遊, 所以要花時間去研究交通方法, 幸好發現兩個Blogger的旅遊網誌, 相關的交通資訊, 非常有用, 又夠新, 全程只要照板煮碗就無衰, 所以在此推介一下:
AABB Happy Travel 遊世界
炯仔的天空

開支
每人基本開支(不計手信)約37000港元, 玩足兩星期, 又去埋挪威、芬蘭及愛沙尼亞, 除咗食方面差啲, 都抵過跟團, 平均如下:
機票(挪威)-約3400港元
住宿(挪威)-約4300港元
Tours(挪威)-約5300港元
其他(挪威)-約500港元
挪威基本費用每人約13500港元

機票(芬蘭)-約9100港元
住宿(芬蘭)-約6050港元
Tours(芬蘭)-約5500港元
交通(芬蘭)-約1500港元
膳食(芬蘭)-約1450港元
芬蘭基本費用每人約23600港元

貨幣
芬蘭及塔林所使用的貨幣是歐羅(EUR), 兌換率約1歐羅對10.64港元, 而挪威所使用的貨幣是挪威克朗(NOK), 兌換率約1克朗對1.31港元, 據聞在香港只有匯豐銀行有挪威克朗對換, 基本上挪威大多數地方都收信用咭, 所以我們只在奧斯陸機場用€100兌換了764克朗, 作為傍身之用


下一篇: 挪威芬蘭極光之旅 裝備篇

13 則留言:

  1. 終於等到您寫喇, 我好掛住Tromso, 等睇
    男士真係特別利害, 計晒各項洗費, 我係完全冇呢方面o既概念(只得一個概念係銀行戶口入面越多越好, 呵呵)

    回覆刪除
    回覆
    1. 都係想留返個Record咁o者!

      刪除
    2. 都係,正正係寫blog嘅目的,記住想記嘅事情。

      刪除
  2. 唔好為過左去既"心急"而後悔.....將來仲會去咁多地方,今次既失就當借鑒吧!

    回覆刪除
    回覆
    1. 係後悔因為咁而錯失在挪威可以睇到極光的唯一機會。

      刪除
  3. 作者已經移除這則留言。

    回覆刪除
  4. 你好,我打算明年2月去芬蘭同挪威~有D疑問想請教你...請問如果坐SAS由HEL去BERGEN,中轉站經哥本哈根,停留時間只有40分鐘/1小時30分左右(有兩班機時間我都OK),請問足夠嗎??需要自己清關同攞行李嗎? THX!!

    回覆刪除
    回覆
    1. 假如你是買由Helsinki經哥本哈根去BERGEN的話(我意思係不是分兩段買的話), 我覺得SAS賣得比你, 應該就無問題, 如果由Helsinki去BERGEN有乜閃失而delay咗, 我相信SAS會幫安排next flight, 如果順利的話, 半小時轉機應該剛剛好。不過International flight transit好似要有指定minimium轉機時間, 你可以上網查下, 但我係你的話, 我會揀後果班機,穩陣D嘛!

      如果你是買由Helsinki經哥本哈根去BERGEN的話(不是分兩段買的話), 行李一定係直接寄倉去BERGEN的(即係唔使出境攞行李, 然後再寄倉、入境), 其實你可以睇到行李是否直接寄倉去BERGEN的, 在Helsinki搭SAS普通機位, 要去自助機寄倉及印行李帶貼紙, 部機會問你需唔需要行李寄倉, 幾多件行李, 印象中仲會問D寄倉行李嘅目的地(即係第一段定最終目的地), 之後條行李帶貼紙會有最目的地, 咁你可以check清楚係咪BERGEN, 想再穩陣D, 攞攪掂咗嘅行李去counter入倉時, 再問地勤confirm多一次, 咁就應該無錯。

      還有SAS在香港有office的, 有乜唔明打電話去問。

      刪除
    2. 多謝你的回覆!! =D 我由SAS直接訂HEL->BERGEN(中轉站:COPENHAGEN 不是分兩段),其實我初時都冇諗過轉機呢個問題,因為我覺得如果轉機時間唔夠導到CATCH UP唔到下一班機,AIRLINE需要安排另外一班機俾我(因為唔係我問題)...但琴日睇網友話要自己清關同攞行李(佢由LONDON->BERGEN,中轉站OSLO)差D MISS左,有一個又話要再買機票,咁SAS咁平...所以先有咁既疑慮. 咁啱睇到你既BLOG,你經HEL->COPENHAGEN->BERGEN,同我差不多,所以想8下你係COPENHAGEN時需唔需要清關&自提行李~

      另外,你既BLOG好有用,我PLAN芬蘭行程時遇到問題都參考你既分享~所以我既行程幾乎同你一樣~HAHA! 謝謝你喔~

      刪除
    3. 是否因為不同airlines, 再加國際轉內陸缐, 所以要攞行李,再Checkin ?
      以你嘅情況, 我都認為SAS會有安排, 而且佢地又有transit乘客資料, 問題應該不大。
      芬蘭嘅行程我都係抄人, 大家玩法都係大同小異!

      刪除
  5. 我EAMIL問左SAS HK,回覆係直掛行李到BERGEN~所以我已經訂左機票la! ^^

    你坐過SAS怕唔怕好差?? 睇背包話SAS麻麻地 =( 我要坐3程SAS機,睇完人地咁講真係驚驚地

    回覆刪除
    回覆
    1. 去程我都坐咗3程SAS, 短途一、兩個鐘, 無乜話好唔好, 以佢地機票全包只係幾佰港毛, 有杯嘢飲咁, 我覺得好抵, 最緊要架機安全, 平安地步, 不過呢樣嘢好難睇得出。
      好多comments, 是以娛樂設備, 食物等來定好與壞, 我唔認同, 用近價的航班才是比較。我就prefer機票平D, 好過要娛樂設備, 食物等lor :P

      刪除
    2. THX!! 睇完你既回覆我都安心好多~ =D 我最擔心安全問題,食物同娛樂我都冇咩要求,話晒都咁短程無咩所謂...背包連空難都講埋,真係被佢嚇死~ T^T

      再次多謝你的回覆!! ^^

      刪除