2013濟州釜山賞櫻遊Day9

釜山賞櫻遊  沙上站櫻花路

Day 9 - 2013年4月3日 星期三  晴

沙上站櫻花路 - Spaland Centum City汗蒸幕 - 甘村文化村


今天是韓國賞櫻旅行的最後一日, 晚上就要返香港, 前八日都有安排賞櫻行程, 所以今天亦不例外, 但賞櫻地點是臨時加插的, 地點是在沙上站, 因為在第一天到達釜山時, 坐單軌鐵路看見在掛法站附近, 有一條長長的櫻花路, 今日行程的第一站就是到這裡看櫻花

執拾好行李, 就去退房及寄存行李, 沒有食東橫inn的早餐, 因為今天去Angel-in-us coffee食早餐, 本來酒店隔離有一間, 但係諗著去到沙上站才食

坐地鐵到達沙上站後, 在3號出口離開, 沿單軌鐵路方向行

行到達掛法站後上天橋, 再向前行多少少就看到櫻花路, 由沙上站到此步行大約十分鐘

這裡嘅櫻花路很長, 數量亦不少於之前所到的櫻花熱點, 最好的就是沒有車路, 只是單車徑及行人散步路, 而且不似之前去過的地點咁多遊人, 主要都是散步的居民, 行得舒服, 影得又開心, 一啲都唔差過前幾日所去嘅地方

唔太清楚究竟條路有幾長, 我地只係慢慢咁行咗一段就回頭, 大約停留咗個半鐘

臨走前, 當然要影下單軌電車同櫻花啦

以上櫻花路的位置

大約11點離開, 就行返去沙上站, 搵下有沒有angel-in-us coffee, 沙上巴士站大樓的Food Court, 隔離的Apple Outlet及周圍都搵唔到, 唔刻意搵就周時見到, 想食嗰時就點都搵唔到

唯有邊行邊搵, 又行下Apple Outlet, 都有啲嘢睇, 搵下行下, 反而見到柳家炒辣雞店, 這間店舖, 我們之前都有諗過食, 所以就食佢當早午餐

點了一份辣雞加八爪魚(7000韓元), 一份炒飯(4500韓元), 及一份芝士(2000韓元)

個侍應會負責炒飯餸, 先炒雞肉, 跟著再加八爪魚, 佢會間中返來睇下及炒下

完成品, 個份量唔太夠兩人, 一人又有啲多, 味道都不錯

然後就去位於新世界Centum City內的Spa Land, 是間五星級的韓式汗蒸幕, 在離開Centum City站, 就已經看到Centum City, 這個商場應是比較高級的, 可以看到LV, Gucci等名店, Spa Land位於二樓

原來入面唔可以影相, 入場費每位12000韓元, 限時4小時, 付款後, 每人有條Locker匙及浴衣, 條匙上有個號碼, 用來開放鞋Locker及更衣室Locker, 然後就各自入去更衣室及浸浴區, 在浸浴區內有一個小房間, 提供推角質的message

我們先在浸浴區外匯合, 再行一圈視察下環境, 同伴就去做角質message(即係捽老泥), 她選了四十五分鐘的course, 35000韓元, 是全身角質推拿加面部護理

我就無去捽老泥, 因為多年前跟旅行團試過, 比個男人係咁捽, 都幾核凸, 咪攪我, 所以我就去浸下浴, 再去每個汗蒸幕房間試下

這裡有很多不同特色的汗蒸幕房, 是不可以拍照的, 但見好多人都拎住個電話玩, 所以就返更衣室攞部Note II出來, 周圍影相

離開浸浴區之後, 向前行再左轉就係汗蒸幕區, 右轉就係室外足浴區, 左轉後就見到下面嗰個蒸房

之後就係小食部及休息區

上一層就是不同特色的汗蒸幕房, 其中的幾間

有個小休息區 

再上層係一個更大的休息室及電視區, 之後就去足浴區 

最後再試下米水及雞蛋先走

離開後, 就出發去今日最後一個景點甘村文化村, 先坐地鐵到土城站, 在6號出口離開後, 再轉的士到甘村文化村, 車費2800韓元, 因為坐巴士比較費時, 的士司機在落車時, 還指示它的方向給我們

在甘村文化村入口處, 有工人正在在房屋外繪畫

經過間Cafe

在Cafe附近有間遊客中心

有路行上遊客中心的屋頂, 周圍有很多七彩小屋

亦看到遠處有很多櫻花樹

另一邊可以看見釜山塔

Cafe屋頂

剩返好少時間, 所以要急急腳行, 個景有啲似九份嗰條樓梯

再周圍搵下有無好位影返個全景, 可惜呢個時間大背光

沿路上山, 急急腳行咗一小圈

甘村文化村的位置

之後就搭的士落返土城站, 再轉地鐵返酒店, 呢個景點趕到有啲氣咳

返到酒店, 見仲有少少時間, 就去隔離Angel-in-us coffee, 食返個Tea, 點咗杯熱Mocha, Americano(本來想要熱, 但是應該店員聽錯, 比咗杯凍)及一份Waffle

食完就返酒店攞行李, 再搭地鐵去機場, 搞完check in手續, 就去睇下有乜嘢食, 見到有兩間食店, 不過唔係好啱, 就諗著入到禁區先食, 點知入面仲少嘢食, 只係得Duty Free, Donut店及Coffee shop

最後, 在無選擇的情況下, 買咗杯飲品及Donut, 去咗Free Internet Zone嗰邊食

回程航班只提供簡單飛機餐 

今次賞櫻之旅亦順利地完成