2013年6月15日 星期六

2013濟州釜山賞櫻遊Day7上

釜山賞櫻遊  鎮海余佐川櫻花

Day 7 - 2013年4月1日 星期一  晴

余佐川 - 慶和火車站 - 鎮海軍港節 - 帝皇山公園 - 余佐川夜櫻

住宿: 東橫INN 釜山站1 (Package包的酒店, 包早餐及WiFi)


今日的行程是到尚慶南道的鎮海, 可以講係釜山這段行程的重頭戲, 近年來, 鎮海之所以咁受遊客歡迎, 主因是鎮海內周圍有數以萬計的櫻花樹, 櫻花真係多到可以叫佢做櫻花城, 每到櫻花季節, 很多旅遊雜誌都會介紹鎮海, 今次終於可以去鎮海, 親身睇下這個櫻花城, 及順道參觀鎮海軍港節, 因為大清早就要起身出發, 所以連東橫Inn的早餐也不食了, 希望可在人潮未殺到前, 影返些無乜人潮嘅相

食完昨日預備好的早餐後就立即出發, 據網上的資料, 到鎮海市的交通方法, 很多人都是到沙上站的市外巴士客運站, 乘坐長途巴士,  所以首先乘地鐵到西面站, 再轉二號地鐵線至沙上站, 從五號出口離開, 就會見到市外巴士客運站大樓
大約七點左右就到達沙上站, 出了地鐵站, 就立即看到外牆有Food Court紅字的建築物, 就是巴士客運大樓
行入去就是售票處, 事前巳準備好鎮海的韓文, 交給售票員看, 就順利買到巴士票, 車費每人5100韓元, 每隔十五至二十分鐘一班, 車程約1個半小時, 車票印有乘車站月台號碼
然後就行出去17號月台上車, 起初不是太多人, 但慢慢都巳經滿了, 最後還遇到在同一天由香港出發, 經釜山到濟州的一對老夫婦, 往後時間也遇見他們, 其實在旅途中遇上同機出發的旅客, 並不是一件新奇事情, 因為大家行程都會有相似地方, 最奇的事情是在5月中去北海道旅行時, 坐在侯機室等上機的時候, 這對老夫婦及一位同行女子來到我們面前的座位座下, 竟然再次遇上他們, 可惜亞伯依然勁Cool, 如果他們坐到其他座位, 就算是同機, 也未必遇見, 太巧合了, 假如他們沒有一位同行女子的話, 那一刻真係會有啲邪邪地感覺
因為太早起身, 在車上半睡半醒之下, 就到達鎮海, 我們坐到總站才下車, 不過之前有一班人在早一個站就巳經落車, 可能是去海軍學校

大約九時到達市外巴士總站, 巴士站距離鎮海火車站約一公里, 由這裡步行約15分鐘就可到達鎮海站, 之後諗返, 可以先由這裡搭的士去慶和站, 再返余佐川, 順路之餘, 慳時間又唔駛行咁遠
總站對面有間7仔(在上圖的位置1), 先由7仔左手邊馬路開始一直行, 沿路已經有好多櫻花樹
中途會經過帝皇山公園入口
一直行到馬路盡頭後就往左邊行, 好快就會到達鎮海站, 站外有幾個觀光社的帳篷檔口, 不過仲未開檔
個站可自由出入
車站外面有些資料, 原來今年係第51屆鎮海軍港節, 還有地圖簡介了鎮海的賞櫻名所及其位置, 分別是:
1. 長福山公園
2. 帝皇山公園
3. 安民道路
4. 海軍士官學校及海軍鎮海基地司令部
5. 余佐川浪漫橋
6. 南部內水面研究所(內水面環境生態公園)
7. 慶和站
本來打算先去余佐川浪漫橋望下, 就立刻坐的士去慶和站, 因為好多人都話, 慶和站晏咗會好多人, 由火車站行去余佐川穚, 當見到這穚, 由穚底穿過去(在上面地圖的位置3), 就到達余佐川
人流唔算太多, 唔駛人逼人先影到相
連個流動公廁都在櫻花樹下
行行下見唔太多人, 結果都係變咗行完余佐川, 先再去慶和站
兩旁有好多小食檔攤, 好多都未開
中段開始有樓梯, 可以落去穚底行
中段這個位置應該係最靚
開始有食檔開市
好少見有豆沙餅賣, 又見熱辣辣, 買咗包試下, 一包7個2000韓元
中段之後開始見到有油菜花, 可惜太過疏落
行完直路嗰段, 再轉彎行多陣, 見都係差不多, 就回頭折返, 其實再向前行多一段路就到長福山公園
在余佐川行了以下路段
在折返的位置附近, 有個大叔買燒雞串, 見幾好味咁, 買咗串食下, 原來大叔會再返熱佢, 好味, 盛惠3000韓元
經過內水面環境生態公園, 入去去個廁所之餘, 順便行下, 雖然沿路都有放置臨時洗手間, 不過就無水洗手, 在這裡又撞到香港來的老夫婦, 不過亞伯就繼續勁Cool
公園入面都有少少櫻花睇下, 不過部分品種不是五片花瓣的王櫻花
唔知又邊套韓劇在這裡取景
有新郎新娘影婚紗相, 不過無Friend及攝影師幫手, 要自己一手包辦, 新娘子件婚紗又幾靚喎
不知不覺行到正午, 兩旁的食檔已經開晒
買咗魷魚, 一片3000韓元, 二片就5000韓元
加料櫻花燒雞串, 這裡一帶食檔, 食物款式都幾多
行返出去鎮海站時, 經過一檔賣蒸蛋糕的小食檔, 買咗個試下
仲有飄花睇添
估唔道又幾好味, 我們一致認為係今日最好味嘅小食, 個蛋糕入面仲有隻雞蛋, 名副其實嘅雞蛋糕
行到鎮海火車站, 打算坐的士去慶和站, 本來就有好幾架的士停在門口, 幾個司機亦出晒來吹水, 咁就比張寫咗韓文慶和站的紙佢睇, 點知佢地冇一個想去, 你一句我一句咁, 咁啱又有一個司機剛剛來, 咁又去問下佢, 佢又諗咗一陣, 就在那時候, 有個司機帶咗一對中國男女來, 說佢地又係去慶和站, 咁個司機就叫我們一齊上車, 心諗:咁好, 比我們一齊坐?

上到車後, 就跟佢地傾下, 原來係中國留學生, 已經在韓國住了幾六年, 幾分鐘車程就到慶和站, 咪錶車費是4100韓元, 個男仔就先付錢給司機, 我們正打算給回2100韓元給他們時, 個司機竟然同個男仔說, 我們也要付4100韓元, 意思就是, 我們每組人要付4100韓元, 我們四人都不明為什麼, 個司機就笑笑口講咗一堆說話, 對男女就轉譯返司機個段說話: 在韓國, 如果唔相識的人一齊坐的士, 各人都要付正價, 不是share,  那對男女看似也沒有聽過這規舉, 但亦沒有任何反應, 我們只好各組人付錢落車

老實說, 我們雖然不確定是否熟實, 但就不太相信, 似司機呃人囉, 真係到到都有呢D害群之馬

講返火車站, 人流真係多到不得了, 全條路軌差不多都企滿人, 路軌兩旁都是滿開的櫻花樹, 都相當靚
去到慶和站沒多久, 就有火車由鎮海站方向駛來
人群亦爭搵好位影火車經過的一刻, 又襯機與火車合照
慶和站雖然停用了, 但還會有火車經過, 所以每當有火車將會經過時, 工作人員就會響鐘, 吹哨子, 拉起繩及趕遊人離開路軌, 不過呢邊趕完, 另一邊啲人又走返入去, 趕來趕去仲有人, 直到最後一刻, 先清到場, 行咗一陣, 在我們前面的工作人員又吹雞, 我們就對住佢指一指剛才火車駛來的方向, 他就指了相反方向來回應, 原來今次係駛向鎮海站方向, 立即霸返個好位先, 可惜當火車接近時, 前面有幾個好Pro攝影亞伯伸咗出來, 在我前面頂住, 攪到好多幅相都影到佢個頭  
最係逼於無奈, 成個人伸出去影呢一幅相時, 比司機響按"砵"咗一下, 嚇咗一大跳
真係好多人呀
咁又玩咗成個鐘
回程就唔再幫襯的士, 改搭公巴307返去鎮海站, 站外有巴士站, 每位1200韓元
慶和站的位置, 距離鎮海站約3公里多


2 則留言:

  1. 請問有沒有想過在斧山自駕遊

    回覆刪除
    回覆
    1. 因為主要在釜山市內活動及怕塞車, 所以無考慮自駕, 除非會去慶州全州。
      另外關於釜山自駕遊, 可參考網友1733的blog
      http://luk1733.blogspot.hk/

      刪除